ក្នុងសង្គមប្រជាធិបតេយ្យ ពិសេសសម្រាប់អ្នកដឹកនាំដ៏វៃឆ្លាត គណបក្សប្រឆាំង ឬក៏ក្រុម ប្រ ឆាំង គឺប្រៀបបានទៅនឹងកញ្ចក់ទិព្វមួយ ដែលអាចឆ្លុះឲ្យឃើញពីអ្វីដែលខ្លួនមិនបានឃើញ។ មានន័យថា គណប្សកាន់អំណាចត្រូវទទួលយកការរិះគន់ របស់គណបក្សប្រឆាំង ដើម្បីកែ តម្រូវកំហុសរបស់ខ្លួន។
គណបក្សប្រជាជនកម្ពុជាបានឈ្នះការគ្រប់គ្រងអំណាចជាថ្មីម្ដងទៀត ខណៈដែលគណបក្ស ប្រឆាំងធំពីរដែលបញ្ចូលគ្នាជាគណបក្សសង្គ្រោះជាតិ បន្តរក្សាការបរាជ័យ។ បរាជ័យមានន័យថា គណបក្សសង្គ្រោះជាតិ បានក្លាយជាបក្សប្រឆាំងតែមួយគត់ជាមួយគណបក្សកាន់អំណាច។
សម្រាប់សម្ដេចនាយករដ្ឋមន្ត្រី ហ៊ុន សែន ក៏ដូចជាសម្រាប់គណបក្សប្រជាជនកម្ពុជា ការវាយបក និងទប់ទល់ជាមួយគណបក្សប្រឆាំងនាប៉ុន្មានអណត្តិកន្លងមកនេះ មិនមែនជាការលំបាកនោះទេ។ ប៉ុន្តែចាប់ពីដើមអណត្តិទី៥នេះតទៅ ការប្រឈមមុខដោះស្រាយបញ្ហាជាមួយពលរដ្ឋទើបជារឿងដំលំបាក ។
អនុសាសន៍ និងការសន្យា របស់សម្ដេច នាយករដ្ឋមន្ត្រី ហ៊ុន សែន នាឱកាសបើកសម័យប្រជុំគណៈរដ្ឋមន្ត្រីថ្មីកាលពីថ្ងៃថ្ងៃពុធកន្លងទៅ ត្រូវបានពលរដ្ឋម្ចាស់ឆ្នោត សម្ដែងការស្វាគមន៍ និងសាទរ ដោយភ្ជាប់ជាមួយការប្រុងប្រយ័ត្ន។ ប្រុងប្រយ័ត្នមានន័យថា ពួកគាត់នឹងបន្តតាមដានការអនុវត្តការសន្យា និងអនុសាសន៍ទាំងនោះ។
ជាការពិត ដោយសារការប្រែលប្រួលនៃបរិបទសង្គម ម្ចាស់ឆ្នោតក៏ដូចជាពលរដ្ឋទូទៅ ពួកគាត់បានផ្លាស់ប្ដូរផ្នត់គំណិត ពីការស្ងៀមស្ងាត់ ទៅកាន់ភាពក្លាហាន តាមរយៈការចេញមុខសម្ដែងមតិ និងតវ៉ាចំពោះរឿងអយុត្តិធម៌ដែលបានកើតឡើងក្នុងមូលដ្ឋាន ក៏ដូចជាក្នុងប្រទេសរបស់គាត់។ ម្ចាស់ឆ្នោតចាប់ផ្ដើមស្គាល់ពីតម្លៃនៃសន្លឹកឆ្នោតរបស់ខ្លួន។
ដូច្នេះ ប្រសិនបើអនុសាសន៍របស់សម្ដេចនាយករដ្ឋមន្ត្រី មិនត្រូវបានមន្ត្រីក្រោមឱវាទយកចិត្តទុកដាក់ អនុវត្ត ឲ្យមានប្រសិទ្ធិភាពទេនោះ គណបក្សប្រជាជនកម្ពុជា នឹងត្រូវប្រឈមមុខជាមួយនិងប្រជាពលរដ្ឋម្ចាស់ឆ្នោតមិនខាននោះទេ។ ការប្រឈមនោះគឺ លទ្ធផលនៃការបោះឆ្នោតអណត្តិទី៦ ឆ្នាំ២០១៨ ៕
No comments:
Post a Comment
yes