លោក សុរិយា ស៊ូប៊ែឌី អ្នករាយការណ៍ពិសេសអង្គការសហប្រជា
ជាតិប្រចាំកម្ពុជា
មហាសន្និបាតរបស់អង្គការសហប្រជាជាតិ ជំរុញឲ្យរាជរដ្ឋាភិបាលកម្ពុជា និងភាគីពាក់ព័ន្ធនៅកម្ពុជា សហការយ៉ាងពេញទំហឹង ជាមួយអ្នករាយការណ៍ពិសេសរបស់អង្គការសហប្រជាជាតិ លោក សុរិយា ស៊ូប៊ែឌី និងអនុវត្តអនុសាសន៍ ដែលមានក្នុងរបាយការណ៍របស់លោក។
មហាសន្និបាតរបស់អង្គការសហប្រជាជាតិ ចេញផ្សាយរបាយការណ៍ប្រចាំឆ្នាំកម្រាស់១៦ទំព័រជាភាសាអង់គ្លេស ស្តីពីស្ថានភាពសិទ្ធិមនុស្សទូទៅកម្ពុជា នៅថ្ងៃទី១៩ខែកញ្ញា។ របាយការណ៍ ឲ្យដឹងថា មហាសន្និបាត មានជំនឿថា ការិយាល័យនៃឧត្តមស្នងការទទួលបន្ទុកសិទ្ធិមនុស្ស(OHCHR) នឹងបន្តការផ្តល់ជាជំនួយ និងការគាំទ្រដល់រដ្ឋាភិបាលកម្ពុជា និងប្រជាជនក្នុងការពង្រឹងការងារការពារ និងការលើកតម្កើងនៃសិទ្ធិមនស្សក្នុងប្រទេស និងសង្ឃឹមថា អនុស្សារណៈរយៈពេល២ឆ្នាំ ទាក់ទងនឹងជំនួយផ្នែកបច្ចេកទេសរវាង OHCHR និងកម្ពុជា នឹងត្រូវបានបន្តសារជាថ្មី នៅចុងឆ្នាំ២០១៣នេះ។
របាយការណ៍បន្តថា OHCHR បន្តគាំទ្រកិច្ចការរបស់អ្នករាយការណ៍ពិសេសអង្គការណ៍សហប្រជាជាតិ លោក សុរិយា ស៊ូប៊ែឌី ដែលបានធ្វើទស្សនកិច្ចនៅកម្ពុជា កាលពីខែធ្នូ ឆ្នាំ២០១២ និងខែឧសភា ឆ្នាំ២០១៣។ មហាសន្និបាត បារម្ភពីការវាយប្រហារដោយផ្ទាល់ជាច្រើនមកលើអ្នករាយការណ៍ពិសេសពីសំណាក់តំណាងរដ្ឋាភិបាលកម្ពុជា។ មហាសន្និបាតរបស់អង្គការសហប្រជាជាតិ ជំរុញឲ្យរដ្ឋាភិបាលកម្ពុជា ធ្វើការជាមួយលោក សុរិយា ស៊ូប៊ែឌី ដើម្បីដោះស្រាយបញ្ហានៅកម្ពុជា ដូចដែលមាននៅក្នុងអនុសាសន៍របស់លោក។
របាយការណ៍នោះ ក៏បានលើកឡើងពីកិច្ចការ ដែល OHCHR គាំទ្រ រួមមាន បញ្ហាសិទ្ធិដីធ្លី លំនៅដ្ឋាន នីតិរដ្ឋ ការគាំទ្រកំណែទម្រង់ពន្ធនាគារ សេរីភាព និងផ្នែកអង្គការសង្គមស៊ីវិលជាដើម។
កន្លងទៅ ការងាររបស់លោក សុរិយា ស៊ូប៊ែឌី ត្រូវបានរដ្ឋាភិបាលកម្ពុជា ជាពិសេសលោកនាយករដ្ឋមន្ត្រី ហ៊ុន សែន ផ្ទាល់ រិះគន់ដោយមិនសំចៃដៃ។ មិនតែប៉ុណ្ណោះ លោក សុរិយា ស៊ូប៊ែឌី ត្រូវបានក្រុមនិស្សិតច្បាប់មួយក្រុមតូច រិះគន់ដោយពាក្យសម្តី លើការងាររបស់លោក កាលពីលោកបានបំពេញទស្សនកិច្ចនៅកម្ពុជា កាលពីខែឧសភា ឆ្នាំ២០១៣។
កន្លងទៅ លោក សុរិយា ស៊ូប៊ែឌី មានប្រសាសន៍ថា លោកមកកម្ពុជា ដើម្បីធ្វើការងារមួយដ៏មានសារសំខាន់ សម្រាប់អង្គការសហប្រជាជាតិ ដោយមានគោលបំណងជួយប្រទេសកម្ពុជាជួយប្រជាជន ដើម្បីសន្តិភាពយូរអង្វែង ការអភិវឌ្ឍសេដ្ឋកិច្ច និងស្ថិរភាពដើម្បីប្រជាជនអាចរីករាយ នឹងលទ្ធិប្រជាធិបតេយ្យ។
របាយការណ៍ប្រចាំឆ្នាំរបស់លោក ស៊ូប៊ែឌី បានផ្តោតជាសំខាន់លើកំណែទម្រង់ប្រព័ន្ធយុតិ្តធម៌ រដ្ឋសភា កំណែទម្រង់ប្រព័ន្ធបោះឆ្នោត បញ្ហាជម្លោះដីធ្លី និងផលប៉ះពាល់ដោយការផ្តល់ដីសម្បទានសេដ្ឋកិច្ចជាដើម៕
No comments:
Post a Comment
yes