ព្រះអង្គម្ចាស់ស៊ីសុវត្ថិ ធម្មិកោ
ព្រះអង្គម្ចាស់ ស៊ីសុវត្ថិ ធម្មិកោ ផ្អាកគម្រោងសមាធិបង្អត់ព្រះស្ងោយ ឬកូដកម្ម បង្អត់អាហារ នៅព្រឹកថ្ងៃសុក្រនេះ ដោយសារអាជ្ញាធរបិទផ្លូវមុខព្រះបរមរាជវាំង ជាទីតាំងដែលទ្រង់ គ្រោងយកជាកន្លែង ធ្វើកូដកម្មនោះ។
អតីតជំនួយការសម្តេចឪ គឺព្រះអង្គម្ចាស់ ស៊ីសុវត្ថិ ធម្មិកោ ប្រាប់VOD ថា មូលហេតុដែលទ្រង់ផ្អាកគម្រោងកូដកម្មបង្អត់អាហារនេះ ដោយសារអាជ្ញាធរបិទផ្លូវមុខព្រះបរមរាជវាំង និងជុំវិញព្រះអង្គដងកើ។ តែទ្រង់មិនទាន់បានប្រាប់ពីគោលបំណងនៃការបង្អត់អាហារនោះឡើយ ៖“ពេលព័ត៌មានហ្នឹងធ្លាយទៅ ក៏សមត្ថកិច្ច គេបានបិទផ្លូវចូលទៅព្រះអង្គដងកើអស់ហើយ។ ដូច្នេះ គម្រោងខ្ញុំដែលធ្វើកូដកម្មអត់អាហារហ្នឹង នៅមុខព្រះអង្គដងកើហ្នឹង ខ្ញុំប្តូរ ហើយ។ ខ្ញុំកំពុងរកទីតាំងនិងម៉ោងពេល”។
ទោះជាយ៉ាងណា គម្រោងបង្អត់អាហាររបស់សមាជិកជាន់ខ្ពស់ នៃគណបក្សសង្គ្រោះជាតិនេះ ធ្វើឡើង ខណៈដែលព្រះសង្ឃជាង១០០អង្គ និងប្រជាជនរាប់រយនាក់ បានសុំព្រះរាជអន្តរាគមន៏ ពីព្រះមហាក្សត្រ ពន្យាពេលប្រជុំសភាលើកដំបូង នៅសប្តាហ៏ក្រោយនេះ។
សមត្ថកិច្ចបានបិទផ្លូវជុំវិញព្រះបរមរាជវាំង កាលពីល្ងាចថ្ងៃទី១៩ខែកញ្ញានេះ នៅពេលព្រះសង្ឃជាង១០០អង្គនិមន្តទៅធ្វើសមាធិនៅមុខវាំង។ នៅពេលនោះ មានព្រះសង្ឃចំនួន៤អង្គបានព្រមានដុតព្រះកាយ។
កាលពីថ្ងៃបញ្ចប់ មហាបាតុកម្ម លើកទី២ របស់គណបក្សសង្គ្រោះជាតិ ក៏មានព្រះសង្ឃមួយអង្គប៉ុនប៉ងដុតព្រះកាយនៅលើឆាក នៃទីលានប្រជាធិបតេយ្យ ដោយព្រះអង្គឈឺចាប់នឹងបញ្ហាអយុត្តិធម៌ដែលកើតមាននៅប្រទេសកម្ពុជាសព្វថ្ងៃ ហើយដែលអ្នកដឹកនាំរដ្ឋាភិបាលមិនអាចដោះស្រាយ តាមការចង់បានរបស់ប្រជាជន៕
No comments:
Post a Comment
yes