ព្រះសង្ឃគង់ធ្វើសមាធិបួងសួងសុំសន្តិភាពនៅខាងមុខរនាំងរបស់សមត្ថកិច្ច
ក្រោយពីសមត្ថកិច្ចរារាំងមិនឲ្យនិមន្តទៅខាងមុខព្រះបរមរាជវាំង នៅថ្ងៃទី១៩ កញ្ញា ឆ្នាំ២០១៣
បច្ចុប្បន្នក្នុងពេលមានការជួបជុំមហាជន និងបាតុកម្មនៅទីលានសាធារណៈ គេសង្កេតឃើញមានព្រះសង្ឃចូលរួមជាមួយគ្រហស្ថ ដើម្បីគាំទ្រការតវ៉ាចំពោះរឿងរ៉ាវអយុត្តិធម៌ក្នុងសង្គមផ្សេងៗ។ ការចូលរួមរបស់ព្រះសង្ឃនេះ អាចធ្វើឲ្យមានការដាក់ទោសតបតវិញ ដូចជាការបណ្តេញចេញពីវត្តជាដើម។
ព្រះសង្ឃដែលគាំទ្រយុត្តិធម៌ និងចូលរួមបាតុកម្មសាធារណៈនានា បានប្រកាសថា នឹងប្រមូលព្រះសង្ឃទូទាំងប្រទេសធ្វើញត្តិទៅក្រសួងមហាផ្ទៃ និងធ្វើសកម្មភាពតវ៉ា បើសិនជាអាជ្ញាធរនិងមន្រ្តីជាន់ខ្ពស់សង្ឃនៅតែបន្តធ្វើសកម្មភាពបំភិតបំភ័យចំពោះព្រះសង្ឃដែលចូលរួមសម្តែងការគាំទ្រចំពោះការជួបជុំគ្នានៅតាមទីសាធារណៈនានា។
ប្រធានបណ្តាញព្រះសង្ឃឯករាជ្យដើម្បីយុត្តិធម៌សង្គម ព្រះសង្ឃ ប៊ុត ប៊ុនតិញ មានថេរដីកានៅថ្ងៃទី១៦ ខែតុលា ថា កន្លងមកមានការរារាំងព្រះសង្ឃកុំឲ្យចូលរួមបាតុកម្ម ឬការតវ៉ានានា នៅតាមទីសាធារណៈ មានការឆែកឆេរកុដិនៅតាមវត្តរកព្រះសង្ឃដែលចូលរួមបាតុកម្ម និងមានការបណ្តេញចេញពីវត្តទៀតផង។
ព្រះតេជព្រះគុណ ប៊ុត ប៊ុនតិញ មានថេរដីកាបន្តឲ្យដឹងថា ការចូលរួមរបស់ព្រះសង្ឃមួយចំនួនដើម្បីធ្វើបាតុកម្មតវ៉ានៅទីសាធារណៈនោះ គឺដើម្បីចូលរួមស្រាយបញ្ហា និងទុក្ខលំបាករបស់ប្រជាពលរដ្ឋដែលកំពុងជួបការលំបាកដោយសារអ្នកនយោបាយមានការខ្វែងយោបល់គ្នា ហើយការចូលរួមនេះ មិនមានខុសអ្វីទៅនឹងពុទ្ធបញ្ញតិ្តឡើយ។
ពន្យល់តបចំពោះការលើកឡើងរបស់ព្រះតេជព្រះគុណ ប៊ុត ប៊ុនតិញ ព្រះតេជព្រះគុណ ឃឹម សន ជាព្រះមេគណសង្ឃរាជធានីភ្នំពេញ មានថេរដីកាឲ្យដឹងថា គណៈសង្ឃអនុញ្ញាតឲ្យព្រះសង្ឃចូលរួមបោះឆ្នោតមែនតែមិនបានអនុញ្ញាតឲ្យព្រះសង្ឃចូលរួមបាតុកម្ម ឬការតវ៉ានានា នៅតាមទីសាធារណៈឡើយ។
ចំពោះការចូលរួមរបស់ព្រះសង្ឃក្នុងបាតុកម្ម ឬការតវ៉ានានានោះ តើមានទោស ឬអត់នោះ? ព្រះតេជព្រះគុណ ឃឹម សន មានថេរដីកាថា ព្រះសង្ឃមានសភាសង្ឃជាអ្នកកាត់សេចក្តី។ ដូច្នេះកាលណាព្រះសង្ឃអង្គណាបានធ្វើកំហុសអ្វីមួយនោះ ទាល់តែមានការសាកសួរ និងដេញដោល កាត់សេចក្តីពីសភាសង្ឃ បានអាចកំណត់បានថា មានកំហុសឬអត់។
ព្រះតេជព្រះគុណ ប៊ុត ប៊ុនតិញ មិនយល់ស្របតាមការលើកឡើងរបស់មេគណព្រះសង្ឃរាជធានីភ្នំពេញ ឡើយ។ លោកមានថេរដីកាថា បើសិនជាព្រះសង្ឃមានសិទ្ធិបោះឆ្នោតហើយនោះ ព្រះសង្ឃក៏ត្រូវមានសិទ្ធិការពារសំឡេងឆ្នោតដែលខ្លួនបោះនោះដែរ។
គេហទំព័ររបស់ក្រសួងធម្មការ និងសាសនា បានឲ្យដឹងថា ប្រទេសកម្ពុជា មានវត្តសរុបចំនួន ៤.៥៥៣វត្ត និងមានព្រះសង្ឃទាំង ២ គណៈ ចំនួនជាង ៥.៣ម៉ឺនអង្គ៕
No comments:
Post a Comment
yes