ពលរដ្ឋកំពុងផ្តិចមេដៃធ្វើជាញតិ្តដាក់ជូនអង្គការសហប្រជាជាតិ និងប្រទេស
ម្ចាស់ហត្ថលេខីកិច្ចព្រមពៀងទីក្រុងប៉ារីស
គណបក្សសង្គ្រោះជាតិ នៅទី០៦ខែតុលានេះ បានចាប់ផ្តើមប្រមូលស្នាមដៃរបស់ប្រជាពលរដ្ឋ ធ្វើជាញត្តិដាក់ជូនអង្គការសហប្រជាជាតិ និងប្រទេសហត្ថលេខី នៃកិច្ចព្រមព្រៀងទីក្រុងបារីស ២៣តុលា១៩៩១ ឲ្យជួយរកយុត្តិធម៌ជូនម្ចាស់ឆ្នោត ឲ្យស្របតាមកិច្ចព្រមព្រៀងនេះ តាមរយៈតំណាងរបស់ឧត្តមស្នងការអង្គការសហប្រជាជាតិប្រចាំនៅកម្ពុជា។
តាមរយៈសមាជមហាជនរបស់គណបក្សសង្គ្រោះជាតិ ដែលបានធ្វើឡើងនៅទីលានប្រជាធិបតេយ្យ ដែលចាប់ផ្តើមនៅម៉ោង ២រសៀលថ្ងៃទី០៦ខែតុលានេះ ប្រជាពលរដ្ឋដែលចូលរួមបាននាំប្រមូលផ្តុំគ្នាជាក្រុម ហើយបានផ្តិតមេដៃលើញត្តិ សម្រាប់ដាក់ជូនលោក បាន គីមូន អគ្គលេខាធិការអង្គការសហប្រជាជាតិ និងប្រទេសហត្ថលេខី នៃកិច្ចព្រមព្រៀងទីក្រុងបារីស ២៣តុលា១៩៩១ ជួយដោះស្រាយបញ្ហាវិបត្តិនយោបាយនៅប្រទេសកម្ពុជា ដោយឲ្យអ្នកដឹកនាំប្រទេសកម្ពុជាបច្ចុប្បន្នគោរព និងប្រតិបត្តិឲ្យបានពេញលេញនូវកិច្ចព្រមព្រៀងទីក្រុងបារីស។
នៅក្នុងញត្តិដែលគ្រោងដាក់តាមរយៈតំណាងរបស់ឧត្តមស្នងការអង្គការសហប្រជាជាតិប្រចាំនៅកម្ពុជា នៅថ្ងៃកិច្ចព្រមព្រៀងទីក្រុង ថ្ងៃទី២៣ខែតុលា ឆ្នាំ២០១៣ ខាងមុខនេះ បានលើកឡើងនូវបញ្ហាចំណុចធំៗបួន ក្នុងនោះរួមមាន ទីមួយ សមាជប្រជុំលើកដំបូងរដ្ឋសភា កាលពីថ្ងៃទី២៣ខែកញ្ញា មានតែបេក្ខជនជាប់ឆ្នោតមកពីគណបក្សតែមួយ (គណបក្សប្រជាជនកម្ពុជា) បានចូលរួម ខណៈដែលគណបក្សសង្គ្រោះជាតិបានធ្វើពហិការ ដោយសារការបោះឆ្នោតកាលពីថ្ងៃទី២៨ខែកក្កដាឆ្នាំ២០១៣ មានភាពមិនប្រក្រតីពុំទាន់បានដោះស្រាយ។ ទីពីរ រាជរដ្ឋាភិបាលអាណត្តិទី៥ ដែលអនុម័តដោយអ្នកតំណាងរាស្ត្រមកពីគណបក្សប្រជាជនកម្ពុជាតែមួយ ពុំមានលក្ខណៈស្របតាមរដ្ឋធម្មនុញ្ញនៃព្រះរាជាណាចក្រកម្ពុជានោះទេ។ ទីបី រដ្ឋសភានីតិកាលទី៥ និងរាជរដ្ឋាភិបាលអាណត្តិទី៥នេះ ពុំពេញលក្ខណៈច្បាប់ និងទីបួន ព្រះរាជាណាចក្រកម្ពុជា កំពុងឈានទៅរករបបផ្តាច់ការ ដែលផ្ទុយនឹងកិច្ចព្រមព្រាងទីក្រុងបារីសថ្ងៃ២៣តុលា១៩៩១។
បើតាមគណបក្សសង្គ្រោះជាតិ គណបក្សនេះគ្រោងនឹងប្រមូលស្នាមមេដៃប្រជាពលរដ្ឋ ប្រមាណជាង៣លាននាក់ ធ្វើជាញត្តិដាក់ជូនអង្គការសហប្រជាជាតិ និងប្រទេសហត្ថលេខី នៃកិច្ចព្រមព្រៀងទីក្រុងបារីស នៅថ្ងៃទី២៣ខែតុលាឆ្នាំ២០១៣ ខាងមុខ ដែលជាថ្ងៃគណបក្សនេះគ្រោងធ្វើមហាបាតុកម្មលើកទី៣ ដើម្បីបន្តទាមទារឲ្យមានដំណោះស្រាយ ពីភាពមិនប្រក្រតីនៃការបោះឆ្នោត។
សង្គមស៊ីវិល និងអ្នកវិភាគ យល់ថា គម្រោងដាក់ញត្តិពលរដ្ឋរបស់គណបក្សសង្គ្រោះជាតិ ទៅអង្គការសហប្រជាជាតិ (UN) ដើម្បីឲ្យជួយអន្តរាគមន៍ និងធ្វើជាអាជ្ញាកណ្តាល ដោះស្រាយភាពមិនប្រក្រតីនៃការបោះឆ្នោតកាលពីថ្ងៃទី២៨ ខែកក្កដា ឆ្នាំ២០១៣ អាចនឹងមានប្រសិទ្ធិភាព បើគណបក្សនេះមានភស្តុតាងគ្រប់គ្រាន់៕
ប្រភពពី VOD
No comments:
Post a Comment
yes