ស្លាកគណបក្សសង្គ្រោះជាតិដែលត្រូវបានកាត់ផ្តាច់ (រូបថត បូ សាវី)
មន្ត្រីជាន់ខ្ពស់គណបក្សសង្គ្រោះជាតិខេត្ដសៀមរាប នៅថ្ងៃចន្ទនេះ ប្រតិកម្មចំពោះអភិបាលស្រុកសូទ្រនិគម ដែលបានកាត់ស្លាកគណបក្សមួយផ្ទាំងដែលបានដាក់នៅទីសាធារណៈ ស្ថិតនៅភូមិដំដែក ឃុំដំដែក ក្បែរការិយាល័យសុខាភិបាលប្រតិបត្ដិស្រុកសូទ្រនិគម។
ប្រតិកម្មនេះកើតឡើង បន្ទាប់ពីអភិបាលស្រុកសូទ្រនិគម លោក ឌិត ដន បញ្ជាឲ្យមន្ដ្រីរបស់ខ្លួនផ្សារផ្ដាច់ជើងក្រោម ស្លាកគណបក្ស យកទុកចោលក្បែរបង្គន់អនាម័យ នៅក្នុងសាលាស្រុក កាលពីយប់ថ្ងៃអាទិត្យម្សិលមិញ ។
តំណាងរាស្ដ្រជាប់ឆ្នោតគណបក្សសង្គ្រោះជាតិ លោកស្រី កែ សុវណ្ណរតន៏ ឲ្យដឹងថា ស្លាកនេះមានទំហំ២ម៉ែត្រx២,៥ម៉ែត្រ។ លោកស្រី ចាត់ទុកទង្វើរបស់អភិបាលស្រុករូបនោះ ជាការខុសច្បាប់ និងមិនមានភាពយុត្ដិធម៌ ព្រោះតំបន់នោះជាទីសាធារណៈ។ លោកស្រី អះអាងថា គណបក្សមានច្បាប់ត្រឹមត្រូវដើម្បីលើកស្លាកគណបក្ស ហើយគណបក្សផ្សេងទៀតក៏លើកស្លាកនៅក្បែរនោះដែរ ៖ “នៅក្នុងច្បាប់បោះឆ្នោត ផ្លូវសាធារណៈណាក៏ដោយ គណបក្សនយោបាយណាមានសិទ្ធិដាក់ គណបក្សនយោបាយផ្សេងទៀត ក៏មានសិទ្ធិដាក់ ស្មើភាពគ្នា ហើយការកាត់នេះ ទីតាំងដូចគ្នា ផ្លាក់ពីរទល់មុខគ្នា ហេតុអ្វីមកកាត់តែផ្លាក់ខ្ញុំ អញ្ជឹងជាការខុសច្បាប់ទាំងស្រុង”។
លោកស្រី បញ្ជាក់ថា លោកស្រីនឹងដាក់ពាក្យប្ដឹងទៅស្ថាប័នពាក់ព័ន្ធ ដើម្បីព្រមានដល់អាជ្ញាធរមូលដ្ឋាន ដែលមាននិន្នាការទៅរកគណបក្សកាន់អំណាចឲ្យបញ្ចប់ការគំរាមកំហែងបន្ដទៀត។ លោកស្រី បន្ដថា លោកស្រី មានភស្ដុតាងគ្រប់គ្រាន់ ពីព្រោះអភិបាលស្រុកទទួលស្គាល់ថា រូបគាត់ជាអ្នកបញ្ជាឲ្យមន្ត្រីគាត់កាត់ចោល។
អភិបាលស្រុកសូទ្រនិគម លោក ឌិត ដន បដិសេធអត្ថាធិប្បាយករណីនេះ ដោយលោកទុកឲ្យអភិបាលរង លោកស្រី ង៉ិន មុំ ជាអ្នកបកស្រាយជំនួស ។ លោកស្រី ង៉ិន មុំ អះអាងថា ការលើកស្លាកគណបក្សនោះមិនមានច្បាប់ត្រឹមត្រូវទេ។ លោកស្រីបន្ដថា លោក ឌិត ដន ជាអ្នកបញ្ជាឲ្យទម្លាក់ស្លាកនោះចោល តាមពាក្យបណ្ដឹងរបស់ប្រធានការិយាល័យសុខាភិបាលប្រតិបត្ដិស្រុក ដើម្បីទុកកន្លែងនោះ សម្រាប់លើកស្លាកអប់រំ សុខភាព ៖ “បានជាសម្រេចកាត់ចេញដោយខ្លួនឯង ព្រោះជូនដំណឹងទៅគាត់ បីដងហើយ មុននឹងបោះឆ្នោតយើងមិនឃោសនា? ការឃោសនាចប់ ត្រូវគណបក្សនោះ គាត់យកមកដាក់ថ្ងៃទី២៧ យប់”។
ទោះយ៉ាងណា បន្ទាប់ពីមានការតវ៉ានៅខាងមុខសាលាស្រុកសូទ្រនិគមរួចមក ស្លាកគណបក្សសង្គ្រោះជាតិ ត្រូវបានអ្នកគាំទ្រលើកដាក់នៅខាងកើតទីតាំងចាស់ ប្រមាណ១០០ម៉ែត្រ នៅព្រឹកថ្ងៃចន្ទនេះ ដោយមានការអនុញ្ញាតពីអាជ្ញាធរមូលដ្ឋាន។
អំឡុងយុទ្ធនាការឃោសនារកសំឡេងឆ្នោតអាណត្ដិទី៥ កន្លងមក ស្លាកគណបក្សប្រឆាំងមួយផ្ទាំង ដែលដាក់បញ្ឈរនៅក្បែររង្វង់មូល ផ្លូវទៅអាកាសយានដ្ឋានអន្ដរជាតិ ខេត្ដសៀមរាប ត្រូវបានអ្នកបើករថយន្ដបុកដួលដល់ដី ដោយពុំមានដោះស្រាយពីអាជ្ញាធរនៅឡើយទេ។
អនុប្រធានក្រុមការងារគណបក្សសង្គ្រោះជាតិខេត្ត លោក សុខ គឹមសេង ឲ្យដឹងថា ចាប់ពីអំឡុងឃោសនាបោះឆ្នោតឆ្នាំ២០១៣ មកដល់ខែតុលានេះ ស្លាកគណបក្សប្រមាណ១២ ស្ថិតនៅស្រុកពួក សូទ្រនិគម និងជីក្រែង ត្រូវបានបំផ្លាញ។
ទាក់ទងការបំផ្លាញស្លាកគណសង្គ្រោះជាតិ មុនយុទ្ធនាការរកសំទ្បេងឆ្នោត លោកនាយករដ្ឋមន្ត្រី ហ៊ុន សែន ធ្លាប់បញ្ជាឲ្យអាជ្ញាធរពាក់ព័ន្ធស៊ើបអង្កេត ដើម្បីវែកមុខជនដៃដល់យកមកផ្តន្ទាទោស ដូចជាការបំផ្លាញស្លាកគណបក្សប្រឆាំងនៅខេត្តព្រៃវែងជាដើម៕
ប្រភពពី VOD
No comments:
Post a Comment
yes