លោក កឹម សុខា ក្នុងឱកាសចុះជួបប្រជាពលរដ្ឋដែលរងគ្រោះដោយទឹកជំនន់
(រូបភាពដោយ បូសាវី)
មន្ដ្រីជាន់ខ្ពស់នៃគណបក្សសង្គ្រោះជាតិ នៅថ្ងៃអាទិត្យនេះ ជំរុញឲ្យគណបក្សប្រជាជនកម្ពុជា ធ្វើប្រជាមតិ ដើម្បីឲ្យដឹងពីចំនួនអ្នកគាំទ្រគណបក្សទាំងពីរថា ខាងណាច្រើនជាងខាងណា។
ថ្លែងទៅកាន់ប្រជាជន រងគ្រោះដោយគ្រោះទឹកជំនន់ នៅស្រុកពួក ខេត្ដសៀមរាប នៅថ្ងៃអាទិត្យប្រធានស្ដីទី គណបក្សសង្គ្រោះជាតិ លោក កឹម សុខា មានប្រសាសន៍ថា គណបក្សប្រឆាំងមួយនេះ នឹងប្រមូលស្នាមមេដៃប្រជាពលរដ្ឋឲ្យបានជាងបីលាននាក់ ដើម្បីដាក់ទៅអង្គការសហប្រជាជាតិ ឲ្យដោះស្រាយបញ្ហានយោបាយនៅកម្ពុជា។ លោកបន្ដថា គណបក្សប្រឆាំង មានពលរដ្ឋគាំទ្រច្រើនជាងគណបក្សកាន់អំណាច តែបើគណបក្សប្រជាជនមិនជឿ លោកជំរុញឲ្យគណបក្សប្រជាជនកម្ពុជា ធ្វើប្រជាមតិ ដោយដាក់គណបក្សទាំងពីរទន្ទឹមគ្នា ហើយឲ្យពលរដ្ឋជ្រើសរើស។ លោកបន្ថែមថា ពលរដ្ឋលែងមានជំនឿលើគណបក្សកាន់អំណាចទៀតហើយ ដោយសារតែគណបក្សនេះ យកដីពលរដ្ឋ និងបំផ្លាញធនធានធម្មជាតិស្ទើទាំងស្រុង ៖ "ខាងនេះ ខាងគណបក្សប្រជាជន ខាងនេះ គណបក្សសង្គ្រោះជាតិឲ្យប្រជារាស្ដ្រយកមួយណា បុមគណបក្សប្រជាជនរក២០កីអៅមិនបាន មែនមិនមែនបងប្អូន អ្នកណាគេបោះឆ្នោតឲ្យគាត់ទៀត បើគេឃើញនិងភ្នែកយកដី យកឈើអស់ហើយ។ប្រជារាស្ដ្រគេមិនឆ្កួតបោះឲ្យទេយកដីបំ ផ្លាញធម្មជាតិ អស់ហើយនោះ គេដឹងអស់ហើយ កាលពីមួយអាណត្ដិពីរអាណត្ដិគេមិនទាន់ដឹង គេនៅបោះឲ្យ ។ប្រជារាស្ដ្រស្អប់គ្រប់តែកន្លែងហ្នឹងកាប់ឈើយកដីគេអស់ហើយ ឥឡូវប្រជារាស្ដ្រខឹងប៉ុនភ្នំមិនមែន មានគុណប៉ុនភ្នំទេ ដូច្នេះគុណនឹងអស់រលីងហើយ មកពីខូចពេក"។
លោក កឹម សុខា បញ្ជាក់បន្ថែមថា គណបក្សប្រឆាំង នឹងដកដីពីក្រុមហ៊ុនជូនពលរដ្ឋវិញ បន្ទាប់ពីអង្គការសហប្រជាជាតិរកឃើញថា គណបក្សសង្គ្រោះជាតិឈ្នះឆ្នោត ដែលលោកចោទថា គ.ជ.ប លួចបន្លំសន្លឹកឆ្នោត ឲ្យគណបក្សប្រជាជនកម្ពុជា កាលពីថ្ងៃទី២៨ ខែកក្កដា ឆ្នាំ២០១៣នេះ ៖ "អញ្ចឹងហើយបានជាគណបក្សសង្គ្រោះជាតិយើងនេះ សម្រេចចិត្ដនឹងដឹកនាំមហាបាតុកម្មទូទាំងប្រទេស ដើម្បីប្ដឹងទៅអន្ដរជាតិ ដើម្បីឲ្យគេដឹងថា ស្រុកខ្មែរនេះអយុត្ដិធម៌ណាស់ ប្រជារាស្ដ្រខំបោះឆ្នោតឲ្យសង្គ្រោះជាតិហើយបែគេលួចអស់ អញ្ចឹងហើយបងប្អូនជនរួមជាតិមិនព្រមទេ បងប្អូនជនរួមជាតិទាំងអស់សុំគណបក្សសង្គ្រោះជាតិឈ្នះ ឥឡូវនេះបងប្អូនផ្ដិតមេដៃ ដើម្បីសុំអង្គការសហប្រជាជាតិ ដើម្បីសុំឲ្យប្រទេសដែលធ្លាប់ជួយខ្មែរកន្លងមកនេះ ហត្ថលេខីទីក្រុងប៉ារីសនោះ ដើម្បីជួយខ្មែរវិញ ដើម្បីរកយុត្ដិធម៌ជូនម្ចាស់ឆ្នោត ដើម្បីធ្វើការសិក្សាស្រាវជ្រាវវាខុសយ៉ាងណា?"។
សមាជិកអចិន្ត្រៃយ៍គណៈកម្មាធិការកណ្តាល គណបក្សប្រជាជនកម្ពុជា លោក ជាម យៀប លើកឡើងថា ការតវ៉ាគ្រប់រូបភាពរបស់ថ្នាក់ដឹកនាំគណបក្សសង្គ្រោះជាតិ ដើម្បីឲ្យអន្តរជាតិដាក់សម្ពាធលើគណបក្សប្រជាជនកម្ពុជានោះ មិនអាចទៅរួចទេ ព្រោះគណបក្សប្រជាជនរបស់លោកអនុវត្តន៍ទៅតាមរដ្ឋធម្មនុញ និងតាមព្រះរាជតំរិះ ព្រះមហាក្សត្រ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា ការធ្វើប្រជាមតិជាបញ្ហាសំខាន់ក្នុងការរកដំណោះស្រាយនយោបាយ ដែលជាប់គាំង។ ប៉ុន្ដែលោកថា មិនអាចទៅរួចទេ ព្រោះការធ្វើប្រជាមតិនេះ មិនមានច្បាប់នៅប្រទេសកម្ពុជា។ លោកផ្ដល់យោបល់ថា គួរធ្វើវិសោធនកម្មមួយក្នុងរដ្ឋធម្មនុញ្ញ ដើម្បីដោះស្រាយបញ្ហាដែលកើតឡើងក្នុងកាលៈទេសៈណាមួយ។
លោកសម រង្ស៊ី និង លោក ហ៊ុន សែន ធ្លាប់ដឹកនាំគណៈប្រតិភូ ជួបចរចាកាលពីថ្ងៃទី១៦ និង១៧ខែកញ្ញាតែមិនបានទទួលលទ្ធផលអ្វីទេ៕
No comments:
Post a Comment
yes