ថ្នាក់ដឹកនាំគណបក្សសង្គ្រោះជាតិបន្តយកអំណោយសប្បុរសជនជូនពលរដ្ឋរងគ្រោះដោយទឹកជំនន់

ថ្នាក់ដឹកនាំគណបក្សសង្គ្រោះជាតិ ធ្វើដំណើរដោយកាណូត នាំយកអំណោយ​សប្បុរសជនចែកជូនពលរដ្ឋរងគ្រោះដោយទឹកជំនន់នៅ ឃុំអង្គរអង្គ 

ស្រុកពាមជ័រ ខេត្តព្រៃវែង

ជាបន្តបន្ទាប់ថ្នាក់ដឹកនាំរបស់គណបក្សសង្គ្រោះជាតិ បានចុះជួបពលរដ្ឋរងគ្រោះដោយទឹកជំ នន់ នៅតាមមូលដ្ឋាននានា ព្រមទាំងបាននាំយកអំណោយរបស់សប្បុរសជន ទាំងក្នុងស្រុក និងក្រៅស្រុក ដែលរួមមាន អង្ករ ត្រីខ មី ទឹកត្រី ទឹកស៊ីអ៊ាវ និងតង់ជាដើម ។

តួយ៉ាងនៅថ្ងៃទី១១ តុលា លោកអនុប្រធាន កឹម សុខា ព្រមទាំងថ្នាក់ដឹកនាំរបស់គណបក្ស​សង្គ្រោះ​ជាតិ ជា​ច្រើនរូបទៀត បានចុះចែកអំណោយសប្បុរសជន ដល់ប្រជាពលរដ្ឋនៅ​រង​គ្រោះដោយទឹកជំនន់នៅភូមិអង្គរអង្គ ឃុំអង្គរអង្គ ស្រុកពាមជ័រ ខេត្តព្រៃវែង ។

ចំណែកនៅខេត្តបាត់ដំបង លោក សោ ចាន់ដេត សមាជិកព្រឹទ្ធសភា ក៏បានដឹកនាំក្រុមការងារ ចុះចែកអំណោយសប្បុរសជន ដល់ពលរដ្ឋនៅភូមិដុកក្រសាំង ឃុំព្រៃតូច ស្រុកម៉ោងឬស្ស៊ី ផង​​ដែរ ។

រីឯលោក ពិន រតនា តំណាងរាស្រ្តជាប់ឆ្នោត មណ្ឌលបាត់ដំបង នៅថ្ងៃទី១១ តុលា ក៏បានដឹក​នាំក្រុមការងារ ពេលព្រឹកចុះចែកអំណោយសប្បុរសជនរបស់ប្រជាពលរដ្ឋរស់នៅរដ្ឋកាលី​ហ្វនីយ៉ា និងរដ្ឋតិចសាស សហរដ្ឋអាមេរិក ជូនដល់ពលរដ្ឋរងគ្រោះ ដោយទឹកជំនន់នៅភូមិ​ព្រែកជីក ឃុំព្រែកជីក ស្រុករុក្ខគិរី និងពេលរសៀល លោក ពិន រតនា បានបន្តដំណើរ ចុះចែក​អំណោយសប្បុរសជនដល់ពលរដ្ឋរងគ្រោះនៅភូមិតាពូង ឃុំតាពូង ស្រុកថ្មគោលផងដែរ ។

ព្រមជាមួយគ្នានេះ កាលពីថ្ងៃទី១០ តុលា លោកស្រី មូរ សុខហួរ តំណាងរាស្រ្តជាប់​ឆ្នោត និងជាប្រធានក្រុមការងារគណបក្សសង្គ្រោះជាតិ ខេត្តបាត់ដំបង បានដឹកនាំក្រុមការងារខេត្ត​ចុះចែកអំណោយរបស់សប្បុរសជន ជូនដល់ពលរដ្ឋរងគ្រោះដោយទឹកជំនន់ នៅឃុំម្រា ស្រុក​សង្កែ រួចបន្តដំណើរចុះពិនិត្យស្ថានភាពទឹកជំនន់ និងការរស់នៅដោយលំបាករបស់ពលរដ្ឋ​នៅ​អាងកំពីងពួយ ។

សូមជំរាបជូនផងដែរថា នៅថ្ងៃទី១២ តុលា លោកអនុប្រធាន កឹម សុខា អមតំណើរដោយ ក្រុមការងារខេត្តបាត់ដំបង និងចុះជួបសំណេះសំណាល ព្រមទាំងយកអំណោយសប្បុរសជន ចែកជូនដល់ពលរដ្ឋរងគ្រោះដោយទឹកជំនន់ ដល់ប្រជាពលរដ្ឋរស់នៅភូមិបឹងសង្កែ ឃុំអំពិល​ប្រាំដើម ស្រុកបវិលផងដែរ ៕