មន្រ្តីរបស់គណបក្សជាតិនិយម (NP) ដែលបានច្របាច់បញ្ចូលជាមួយគណបក្សរាជានិយម ហ៊្វុនស៊ិនប៉ិច បាននិយាយថា សមាជិកបក្សភាគច្រើនបានជំរុញឲ្យក្រុមមេដឹកនាំរបស់ពួកគេផ្តាច់ខ្លួនពី ហ៊្វុនស៊ិនប៉ិច ហើយត្រឡប់មកដឹកនាំគណបក្សនេះដើម្បីធានាឯករាជភាពរបស់ខ្លួន។
អតីតអ្នកនាំពាក្យគណបក្ស នរោត្តម រណឫទ្ធិ (NRP) ពីចន្លោះឆ្នាំ ២០០៦ ដល់ ២០០៨ លោក មុត ចន្ថា ដែលពេលនេះត្រូវបានតែងតាំងជាអគ្គលេខាគណបក្សជាតិនិយម បានប្រាប់ ភ្នំពេញ ប៉ុស្តិ៍ កាលពីថ្ងៃម្សិលមិញថា បើទោះបីសមាជគណបក្សកាលពីសប្តាហ៍មុន មានការចូលរួមពីអ្នកតំណាង និងសមាជិកក្រុមប្រឹក្សាទាំង ២២ ខេត្ត-ក្រុង និងស្រុកក៏ដោយ ក៏ពួកគេនូវបានជំរុញឲ្យក្រុមមេដឹកនាំគណបក្សជាតិនិយម ត្រឡប់មកដឹកនាំគណបក្សនេះវិញ ដោយបានធ្វើការកត់សម្គាល់ឃើញថា សមាជិកទាំងនោះ មិនចង់ឲ្យគណបក្សជាតិនិយម ស្ថិតនៅក្រោមគណបក្សរាជានិយម ហ៊្វុនស៊ិនប៉ិច ទេ។
លោក មុត ចន្ថា បានមានប្រសាសន៍ថា៖ «សមាជិក សមាជិកាគណបក្ស ៩០ ភាគរយ បានទាមទារឲ្យក្រុមមេដឹកនាំគណបក្សជាតិនិយមពិចារណាឡើងវិញ អំពីការចងសម្ព័ន្ធភាពជាមួយនិង ហ៊្វុនស៊ិនប៉ិច។ ពួកគេចង់បានគណបក្សមួយដែលមានឯករាជភាពនិងហ៊ាននិយាយអ្វី ដែលជាការពិត។ ខ្ញុំ យល់ឃើញថា ការបង្កើតគណបក្សនយោបាយ គឺត្រូវតែឯករាជ្យ ហើយក៏មិនអាចស្ថិតនៅក្រោមនរណាម្នាក់បានដែរ»។
លោក ផេង ហេង ជាអតីតអគ្គលេខាធិការរងគណបក្សជាតិនិយម ត្រូវបានតែងតាំងជាសមាជិកគណៈកម្មាធិការអចិន្រៃ្តយ៍របស់ គណបក្ស ហ៊្វុនស៊ិនប៉ិច និងជាទីប្រឹក្សារាជរដ្ឋាភិបាល បន្ទាប់ពីគណបក្សជាតិនិយម បានច្របាច់បញ្ចូលគ្នាជាមួយគណបក្ស ហ៊្វុនស៊ិនប៉ិច ហើយនៅពេលនេះបានផ្តាច់ខ្លួនពី ហ៊្វុនស៊ិនប៉ិច ដើម្បីក្លាយជាមេគណបក្ស ជាតិនិយមវិញបានប្រាប់ ភ្នំពេញ ប៉ុស្តិ៍ កាលពីម្សិលមិញ អំពីមូលហេតុដែលលោកផ្តាច់ខ្លួនពី ហ៊្វុនស៊ិនប៉ិច ដើម្បីមកដឹកនាំគណបក្សជាតិនិយមថា គឺដោយសារតែមានសំណើពីសមាជិកជាច្រើននៅតាមខេត្ត ក្រុង និង ស្រុក។
លោកអះអាងបន្ថែមថា សមាជិកជាច្រើនរបស់ NP នៅមូលដ្ឋាន មានការលំបាកច្រើននៅក្នុងការបំពេញកិច្ចការនយោបាយជាមួយ ហ៊្វុនស៊ិនប៉ិច ព្រោះសមាជិករបស់បក្សទាំងពីរ ទំនងជាមិនយល់គ្នា។
នៅពេលគេសួរថា តើគោលជំហររបស់គណបក្សជាតិនិយម នឹងរួមកម្លាំងជាមួយបក្សប្រឆាំងសង្គ្រោះជាតិឬអត់? លោក ផេង ហេង បានឆ្លើយថា៖ «ខ្ញុំ ជាកូនរបស់ប្រជាពលរដ្ឋ។ ខ្ញុំដឹកនាំទាល់តែមានខ្នង គឺប្រជាពលរដ្ឋ ដូច្នេះខ្ញុំ ត្រូវការគំនិតរបស់ប្រជាពលរដ្ឋ គំនិតរបស់សកម្មជន។ ប្រសិនបើមតិភាគច្រើនតម្រូវឲ្យធ្វើអ្វីនោះខ្ញុំនឹងធ្វើតាម»។
ទាក់ទិននិងការចង់បំបែកបក្សវិញនេះលោក ទុំ សម្បុរ អ្នកនាំពាក្យគណបក្ស ហ៊្វុនស៊ិនប៉ិច បានបញ្ជាក់ថា ហ៊្វុនស៊ិនប៉ិច មិនមានការបែកបាក់ទេ ហើយថា ការផ្តាច់ខ្លួននេះ គឺជាបញ្ហារបស់បុគ្គល វាមិនមែនជាបញ្ហារបស់គណបក្ស ហ៊្វុនស៊ិនប៉ិច ទេ។
លោក សម្បុរ បានបញ្ជាក់ថា៖ «នេះជាសំឡេងភាគច្រើនតែម្ខាងដែលពួកគេចង់ទៅ។ ខ្ញុំ ធានាថា ហ៊្វុនស៊ិនប៉ិច មិនមានបញ្ហាទេ។ ហ៊្វុនស៊ិនប៉ិច នៅតែជា ហ៊្វុនស៊ិនប៉ិច»៕
No comments:
Post a Comment
yes