ប្រជាពលរដ្ឋមួយចំនួននៅខេត្តព្រះវិហារពុះកញ្ជ្រោលនៅពេលឮ លោក សម រង្ស៊ី អំពាវនាវឲ្យមានការដោះដូរក្រុមជនផ្ដាច់ការនៅកម្ពុជា ខណៈ លោកចុះជួបសំណេះសំណាលប្រជាពលរដ្ឋនៅក្នុងទីរួមខេត្តព្រះវិហារនៅ ព្រឹកថ្ងៃពុធនេះ។
ក្នុងចំណោមប្រជាពលរដ្ឋជាច្រើនរយនាក់ ដែលបានមកស្ដាប់ លោក សម រង្ស៊ី ឡើងថ្លែងអំពីបរិបទនយោបាយកម្ពុជា គឺមានស្ត្រីវ័យចំណាស់ម្នាក់ក្នុងដៃកាន់ឯកសារដីធ្លី ដែលមានជម្លោះជាមួយក្រុមអ្នកមានអំណាច ហើយដៃស្ដាំកាន់ក្បាលមេក្រូស្ទើមិនជាប់ក្នុងដៃ ហើយធ្វើកាយវិការយ៉ាងរស់រវើកនៅលើវេទិកា បានស្រែកដោយអារម្មណ៍ពុះកញ្ជ្រោល ថា ប្រជាពលរដ្ឋលែងធ្វើ់កញ្ជះគេហើយ គឺត្រូវរួមសាមគ្គីគ្នា ដើម្បីសេរីភាព និងសិទ្ធិមនុស្ស ទាន់ លោក សម រង្ស៊ី បានវិលចូលប្រទេសកម្ពុជាវិញ។ ស្ត្រីរូបនេះ បន្តថា ត្រូវនាំគ្នាក្រោកឈរឡើងកុំចុះញ៉មឲ្យសោះ ចំពោះក្រុមអ្នកមានអំណាច ដែលដើរតែគាបសង្កត់ប្រជាជន។
អារម្មណ៍របស់ស្ត្រីរូបនេះ ធ្វើឲ្យវេទិកាពោរពេញដោយភាពរីករាយ និងម្នាក់ៗដែលចូលរួមស្ដាប់មានអារម្មណ៍ក្លាហានមួយរំពេច ហើយពួកគេបានលើកដៃសុំឡើងវេទិកា ដើម្បីសម្ដែងមតិ។
ភាពពុះកញ្ជ្រោលរបស់ប្រជាពលរដ្ឋទីរួមខេត្តព្រះវិហារ ដែលមកចូលរួមវេទិការបស់គណបក្សសង្គ្រោះជាតិ និងជាខេត្តមួយមានប្រជាពលរដ្ឋ តែមួយអាសនៈសភា ហើយអ្នកនយោបាយមិនសូវឲ្យតម្លៃ គឺកើតឡើងចំពេល លោក សម រង្ស៊ី បានថ្លែងលើវេទិកានោះ អំពាវនាវឲ្យមានការផ្លាស់ប្ដូរក្រុមផ្ដាច់ការនៅកម្ពុជា ដែលលោកចោទថា ក្រុមនេះ ជាអ្នកជិះជាន់សង្កត់សង្កិនប្រជាជន ឆក់ប្លន់ដីកសិករ ដើម្បីធ្វើមានខ្លួនឯង ចង់រាស្ត្រក្រវេទនាក៏នៅតែមិនឈឺក្បាល។
ព្រះវិហារ គឺជាខេត្តមួយជាប់ព្រំដែនប្រទេសថៃ។ ខេត្តនេះ ក៏ស្ថិតនៅក្នុងចំណោមខេត្តជាច្រើនទៀតនៃប្រទេសកម្ពុជា ដែលសម្បូររឿងជម្លោះដីធ្លី ហើយម្ដងម្កាលមានការចាប់ប្រជាពលរដ្ឋឃុំខ្លួនទៀតផង។ តែទោះជាយ៉ាងណា ទាំង លោក សម រង្ស៊ី និងប្រជាពលរដ្ឋ ដែលឡើងថ្លែងលើវេទិកាមិនបាននិយាយចំៗថា ក្រុមផ្ដាច់ការកម្ពុជាដែលខ្លួនចង់ផ្លាស់ប្ដូរ គឺក្រុមណាមួយពិតប្រាកដឡើយ។ នេះជាលើកទីមួយហើយ នៃការធ្វើទស្សនកិច្ចរបស់ លោក សម រង្ស៊ី ប្រធានគណបក្សសង្គ្រោះជាតិ ដែលបានទៅកាន់ខេត្តដ៏ឆ្ងាយមួយនេះ បន្ទាប់ពីលោកបានវិលចូលកម្ពុជា នៅថ្ងៃទី១៩ ខែកក្កដា ក្រោយពីលោកស្ថិតនៅនិរទេសខ្លួនជិត៤ឆ្នាំមកនោះ៕
No comments:
Post a Comment
yes