មន្ត្រីជាន់ខ្ពស់គណបក្សសង្គ្រោះជាតិ ប្រកាសថានឹងមិនទទួលស្គាល់ច្បាប់ថវិកាជាតិ ដែលរដ្ឋសភាគ្រោងនឹងបើកកិច្ចប្រជុំដើម្បីអនុម័តនៅថ្ងៃទី១២ ខែវិច្ឆិកា ខាងមុខនោះទេ។ ការប្រកាសបែបនេះ ធ្វើឡើងបន្ទាប់ពីគណៈកម្មាធិការអចិន្ត្រៃយ៍រដ្ឋសភា បានប្រជុំអនុម័តសេចក្តីព្រាងច្បាប់ថវិកាជាតិឆ្នាំ២០១៤ កាលពីថ្ងៃទី៨ ខែវិច្ឆិកា ដើម្បីដាក់ឲ្យអង្គប្រជុំសភាពេញអង្គអនុម័តច្បាប់ថ្មីនេះ និងអនុញ្ញាតឲ្យរាជរដ្ឋាភិបាលចាយវាយលុយជាតិជាង ៣ពាន់លានដុល្លារ។
មន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ នៅថ្ងៃទី១០ ខែវិច្ឆិកា មានប្រសាសន៍ថា រដ្ឋាភិបាលសព្វថ្ងៃជារដ្ឋាភិបាលមិនស្របច្បាប់ ហើយបក្សប្រឆាំងមិនទទួលស្គាល់រាល់កិច្ចសន្យា ឬច្បាប់ទាំងឡាយណាដែលបក្សកាន់អំណាចអនុម័តឡើយ។ លោកបន្តថា ការអនុម័តច្បាប់ថវិកាជាតិឆ្នាំ២០១៤ នាពេលខាងមុខ គឺផ្ទុយនឹងឆន្ទៈពលរដ្ឋ។
មេដឹកនាំគណបក្សប្រឆាំង លោក សម រង្ស៉ី និងលោក កឹម សុខា កំពុងស្នាក់នៅក្រៅប្រទេស ដើម្បីស្វែងរកការគាំទ្រផ្នែកនយោបាយ ហើយគ្រោងនឹងវិលមកវិញនៅថ្ងៃទី១២ ខែវិច្ឆិកា ចំថ្ងៃដែលរដ្ឋសភាបើកកិច្ចប្រជុំអនុម័តច្បាប់ថវិកាជាតិឆ្នាំ២០១៤។ ប៉ុន្តែ មេបក្សប្រឆាំងមានគម្រោងចុះជួបពលរដ្ឋនៅទីជនបទទៅវិញ ដោយមិនមានគម្រោងតវ៉ាជុំវិញការអនុម័តច្បាប់ថវិកាជាតិទេ។ បក្សប្រឆាំង និងបក្សកាន់អំណាច ក៏មិនទាន់កំណត់ថ្ងៃជួបចរចាជាថ្មី ដើម្បីរកដំណោះស្រាយនយោបាយនៅឡើយទេ។
កន្លងមក សមាជិកសភាមកពីគណបក្សប្រជាជនកម្ពុជា បានឲ្យដឹងថា ការអនុម័តថវិកាដោយមានសមាជិកសភាចំនួន ៦៨ មកពីគណបក្សប្រជាជនកម្ពុជា ចូលប្រជុំនោះ មិនខុសច្បាប់ទេ ដោយសារច្បាប់រដ្ឋធម្មនុញ្ញបានចែងថា ការអនុម័តថវិកាជាតិប្រព្រឹត្តទៅដោយមតិភាគច្រើនដាច់ខាតនៃចំនួនសមាជិករដ្ឋសភាទាំងមូល៕
No comments:
Post a Comment
yes