លោកសួន សន អនុប្រធានសហគមន៍ព្រៃឈើរុក្ខា ក្នុងក្រុងសំរោង ខេត្តឧត្តរមានជ័យ បានឲ្យដឹងកាលពីម្សិលមិញថា រូបលោក និងប្រជាសហគមន៍ព្រៃឈើរុក្ខាចំនួន ២៦ នាក់ផ្សេងទៀត បានចុះទៅល្បាតព្រៃសហគមន៍ កាលពីថ្ងៃសុក្រសប្តាហ៍មុន ហើយបានឃើញពលរដ្ឋ ៤ នាក់កំពុងប្រើប្រាស់ម៉ាស៊ីនពីរគ្រឿង អារឈើក្នុងព្រៃសហគមន៍។ លោកបញ្ជាក់ថា៖«យើងបានចាប់ម៉ាស៊ីន ២ គ្រឿង និងឈើ ១០០ បន្ទះ ពីជនលើ្មស យកទៅរក្សាទុកនៅផ្ទះសហគមន៍ក្នុងភូមិកូនដំរី»។ ស្រាប់តែមួយថ្ងៃក្រោយមក (ថ្ងៃអាទិត្យម្សិលម្ងៃ) ពលរដ្ឋទាំង ៤ នាក់ រួមនិងទាហានពីរនាក់ ប្រដាប់ដោយអាវុធបួនដើម បានមកព័ទ្ធពួកលោកនៅក្នុងព្រៃ ដើម្បីបង្ខំឲ្យប្រគល់ម៉ាស៊ីននិងឈើនោះវិញ។ លោកសនថ្លែងថា៖«ទាហានកងពលតូចលេខ ៤ មានកាំភ្លើង ៤ ដើម បានកាក់យើងចាប់ពីម៉ោង ៣ រសៀល ដល់ម៉ោងជាង ៥ ល្ងាច បង្ខំឲ្យប្រគល់ម៉ាស៊ីន និងឈើឲ្យគេវិញ បើមិនដូច្នេះទេ គេនឹងចាប់យើងយកទៅបន្ទាយ»។ ដោយការភ័យខ្លាចសុវត្ថិភាព លោកសួន សនបានសន្យាប្រគល់របស់ទាំងនោះ ឲ្យពួកគេវិញ គឺធ្វើម៉េចឲ្យតែពួកគាត់បានចេញពីព្រៃសិន។ កាលពីម្សិលមិញ ទាហានទាំងនោះ បានមកដឹកម៉ាស៊ីន និងឈើទាំង ១០០ សន្លឹក ទៅវិញ ដោយមានការធ្វើលិខិតផ្ទេរត្រឹមត្រូវ។
លោកសារ ខ្លៃ ប្រធានបណ្តាញសហគមន៍ព្រៃឈើខេត្តឧត្តរមានជ័យ បានឲ្យដឹងថា ពលរដ្ឋទាំងបួននាក់នោះ បានកាប់ឈើឲ្យពួកទាហាន ដើម្បីយកទៅធ្វើផ្ទះក្នុងបន្ទាយថ្មីមួយ។ លោកសារ ខ្លៃ បញ្ជាក់ថា៖ «អនុសេនីយ៍ឯកម្នាក់ឈ្មោះ ញឹក ផល បានអះអាងថា ដីព្រៃដែលពលរដ្ឋចូលកាប់ឈើនោះ ត្រូវបានខេត្តប្រគល់ឲ្យកងទ័ព តែយើងមិនទាន់ជឿទេ»។
លោកសារ ខ្លៃ បន្តថា កន្លែងពលរដ្ឋចូលកាប់ខុសច្បាប់នោះ ស្ថិតនៅក្នុងដីព្រៃសហគមន៍សរុប ១២២៧២ ហិកតា ដែលមានការទទួលស្គាល់ ដោយ ស.ជ.ណ របស់ទីស្តីការគណរដ្ឋមន្ត្រី។ លើសពីនោះ រដ្ឋាភិបាលតាមរយៈរដ្ឋបាលព្រៃឈើ បានចុះកិច្ចព្រមព្រៀង ជាមួយអង្គការ Pact Cambodia រក្សាទុកផ្ទៃដីព្រៃទាំងអស់នោះ ដាក់ក្នុង«គម្រោងសាកល្បងសម្បទានកាបូន រួមចំណែកក្នុងការទប់ស្កាត់បម្រែបម្រួលអាកាសធាតុ»។
លោកសារ ខ្លៃបានចាត់ទុកថា៖«ទង្វើនេះ មិនមែនជាសកម្មភាពអង្គភាពនោះទេ។ នេះជារូបភាពបុគ្គលដែលកេងប្រវ័ញ្ច ធ្វើអាជីវកម្មព្រៃឈើខុសច្បាប់។ បើធ្វើក្នុងនាមអង្គភាព មិនចាំបាច់ទៅប្រើអាវុធកាក់គំរាមកំហែងក្នុងព្រៃនោះទេ»។ លោកសារ ខ្លៃបានគូសបញ្ជាក់ថា ព្រៃសហគមន៍រុក្ខានេះ មានពលរដ្ឋ១៦ភូមិកំពុងអាស្រ័យផល និងចូលរួមការពារប្រមាណជា ១០ ឆ្នាំមកហើយ។ បើខេត្តកាត់ប្រគល់ឲ្យកងទ័ព ខេត្តត្រូវផ្តល់ដំណឹង និងពិភាក្សា ជាមួយប្រជាសហគមន៍។
លោកស្រី ណារ៉េន អ្នកសម្របសម្រួលសមាគមសិទិ្ធមនុស្សអាដហុក ប្រចាំខេត្តឧត្តរមានជ័យបានឲ្យដឹងថា ប្រជាសហគមន៍ បានទូរស័ព្ទផ្តល់ដំណឹងនេះមកអាដហុកដែរ ហើយអាដហុកក៏បានស្នើឲ្យតុលាការ មានវិធានការលើករណីនេះ។ លោក បញ្ជាក់ទៀតថា៖«តាមច្បាប់វាខុសហើយចំពោះការប្រើប្រាស់អាវុធទៅ ព័ទ្ធប្រជាសហគមន៍បែបនេះ។ ម្យ៉ាងទៀតសហគមន៍នោះ ជាសហគមន៍ស្របច្បាប់ មានកិច្ចព្រមព្រៀងត្រឹមត្រូវ»។
ភ្នំពេញ ប៉ុស្តិ៍ មិនអាចទាក់ទង មេបញ្ជាការកងពលតូចលេខ ៤ ដើម្បីសុំការបំភ្លឺបានទេ កាលពីម្សិលមិញ។ ទោះយ៉ាងណា លោកថុន ណុល អភិបាលក្រុងសំរោង បានមានប្រសាសន៍ថា អាជ្ញាធរមិនដែលកាត់ដីព្រៃសហគមន៍ណាមួយ ឲ្យអង្គភាពទាហាននោះទេ៕
No comments:
Post a Comment
yes