សហភាពសហជីពកម្ពុជាអំពាវនាវឲ្យសាធារណជនចូលរួមហែក្បួនធម្មយាត្រា-សិទ្ធិយាត្រា តាមទីតាំងដែលនៅជិតដោយធ្វើដំណើរឆ្ពោះមកភ្នំពេញទាំងអស់គ្នានៅថ្ងៃអបអរទិវាសិទ្ធិមនុស្សអន្តរជាតិ១០ធ្នូ ដើម្បីជំរុញឲ្យបញ្ឈប់ការរំលោភសិទ្ធិមនុស្សបង្កើតសន្តិភាព និងយុត្តិធម៌នៅក្នុងសង្គម។
សេចក្តីអំពាវនាវរបស់សហភាពសហជីពកម្ពុជាចុះថ្ងៃទី០២ ខែធ្នូ អំពាវនាវដល់សមាជិក សមាជិកា លោកគ្រូអ្នកគ្រូ មន្ត្រីរាជការ កម្មករ កម្មការិនី និងប្រជាពលរដ្ឋខ្មែរ ទូទាំងប្រទេសចូលរួមជាមួយធម្មយាត្រា សិទ្ធិយាត្រា ដោយអហិង្សា និងសន្តិវិធីនៃទិវាសិទ្ធិមនុស្សអន្តរជាតិ គម្រប់ខួបទី៦៥ នៅថ្ងៃទី១០ ខែធ្នូ ឆ្នាំ២០១៣ ដែលរៀបចំដោយអង្គការសង្គមស៊ីវិល សមាគម និងសហជីព។
ប្រជាពលរដ្ឋហែក្បួនពីខេត្តចំនួន៥ ក្នុងរយៈពេល ១០ថ្ងៃមកកាន់រាជធានីភ្នំពេញ អបអរទិវាសិទ្ធិមនុស្សអន្តរជាតិ១០ធ្នូ ដើម្បីជំរុញឲ្យបញ្ឈប់ការរំលោភសិទ្ធិមនុស្សបង្កើតសន្តិភាព និងយុត្តិធម៌នៅក្នុងសង្គម។
ការហែក្បួននេះ ចាប់ផ្តើមពីថ្ងៃទី០១ ខែធ្នូ រហូតដល់ថ្ងៃទី១០ ខែធ្នូដដែល។ ខេត្តទាំង៥ដែលប្រជាពលរដ្ឋ និងព្រះសង្ឃកំណត់យកជាគោលដៅនោះរួមមាន ខេត្តស្វាយរៀង ហែតាមផ្លូវជាតិលេខ១ ខេត្តកំពត ហែតាមផ្លូវជាតិ៣ ខេត្តកំពង់ស្ពឺ ហែតាមផ្លូវជាតិ៤ ខេត្តពោធិ៍សាត់ ហែតាមផ្លូវជាតិ៥ និងខេត្តកំពង់ធំ ហែតាមផ្លូវជាតិ៦។
តាមគម្រោងអ្នកហែក្បួនទាំង៥ក្រុម នឹងមកជួបជុំគ្នានៅមុខរដ្ឋសភា ក្នុងរាជធានីភ្នំពេញ នៅថ្ងៃទី១០ ខែធ្នូ ដើម្បីដាក់របាយការណ៍ពីស្ថានភាពស្ថានភាពសិទ្ធិមនុស្សនៅ កម្ពុជាជូនតំណាងរាស្ត្រ៕
No comments:
Post a Comment
yes