សមាគមគ្រូបង្រៀនកម្ពុជាឯករាជ្យ(CITA) នៅថ្ងៃចន្ទនេះ ស្នើរដ្ឋមន្ត្រីក្រសួងអប់រំ អង្កេតករណីមន្ត្រីអប់រំស្រុកគៀនស្វាយ និងមន្ត្រីមន្ទីរអប់រំខេត្តកណ្តាល ដែលតម្រូវឲ្យនាយកសាលាលក់កម្រងសំណួរសម្រាប់ផលិតស្ថិតិបុគ្គលិកអប់រំឆ្នាំ២០១៤ តម្លៃ១០០០រៀលមួយសន្លឹក ជូនលោកគ្រូ-អ្នកគ្រូ។
លិខិតចុះហត្ថលេខាដោយប្រធានCITA លោក រ៉ុង ឈុន ផ្ញើជូនរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ឲ្យដឹងថា កម្រងសំណួរសម្រាប់ផលិតស្ថិតិបុគ្គលិកអប់រំនោះ ទទួលការឧបត្ថម្ភពីសហភាពអឺរ៉ុប ប្រទេសស៊ុយអែត អង្គការយូនីសេហ្វ និងមូលនិធិភាពជាដៃគូសម្រាប់អភិវឌ្ឍសមត្ថភាពវិស័យអប់រំ(CDPF) ដើម្បចែកជូនលោកគ្រូ-អ្នកគ្រូ ដោយមិនគិតថ្លៃទេ។
ប្រធានមន្ទីរអប់រំខេត្តកណ្តាល លោក លី ជុងថេង ច្រានចោលការលើកទ្បើងរបស់CITA ៖ "តាមពិតក្រសួង និងមន្ទីរមានត្រូវណែនាំឲ្យលោកគ្រូលក់កិច្ចការអញ្ជឹងទេ ហើយបើលក់ក៏នៅក្នុងករណីតំលៃថត ព្រោះឧទាហរណ៍គាត់ទៅថត ពីព្រោះថតក្នុងមួយសន្លឹកពីររយ អាចថាលក់ពីរសន្លឹកប្រាំរយ វាសមរម្យក្នុងករណីដូច្នេះ យើងធ្វើមិនដឹងមិនលឺចុះ ប៉ុន្តែករណីឲ្យលក់យកចំនេញអញ្ជឹងអត់ទេ ខ្ញុំនឹងត្រួតពិនិត្យរឿងនេះ ថាតើបុគ្គលណាជាអ្នកធ្វើ រឿងនេះវាអាចមានតែបុគ្គលខ្លះ តិចតួចតែមើលទៅ"។
ចំណែក រដ្ឋមន្ត្រីក្រសួងអប់រំ លោក ហង់ ជួនណារ៉ុន មានប្រសាសន៍ថា លោកមិនទាន់ទទួលបានលិខិត CITA នៅឡើយទេ ៖ "ទាល់តែខ្ញុំឃើញសំបុត្រនេះ ខ្ញុំនឹងទៅពិនិត្យមើលថាតើមានរឿងអញ្ជឹងមែនឬអត់? មិនមែនមានតែករណីដែលសមាគមនេះគាត់ប្តឹងនេះវាត្រឹមត្រូវទេ មានករណីគាត់ធ្វើទៅក៏អត់មានព័ត៌មានគ្រប់គ្រាន់ដែរ ប៉ុន្តែករណីខ្លះវាអញ្ជឹងមែន ហើយករណីខ្លះវាមិនដូន្នោះទេ"។
ប៉ុន្តែ លោកថា លោកនឹងឲ្យមន្ត្រីថ្នាក់ក្រោមចុះស៊ើបអង្កេតករណីនេះ៕
No comments:
Post a Comment
yes