គណបក្សសង្គ្រោះជាតិ នៅថ្ងៃពុធនេះ ដាក់លិខិតទៅស្ថានទូតចំនួនពីរ គឺស្ថានទូតម៉ាឡេស៊ី និងសាំងហ្គាពួរ ដោយជំរុញឲ្យស្ថានទូតទាំងពីរ យកចិត្តទុកដាក់លើបញ្ហាប្រឈមរបស់ពលករខ្មែរធ្វើការនៅក្រៅប្រទេស និងស្នើឲ្យមានតម្លាភាពលើកិច្ចព្រមព្រៀង ជាមួយរាជរដ្ឋាភិបាលកម្ពុជា។
លិខិតរបស់គណបក្សសង្គ្រោះជាតិ ចុះថ្ងៃទី០៤ ខែតុលាឲ្យដឹងថា ដែលដាក់ទៅស្ថានទូតម៉ាឡេស៊ី និងស្ថានទូតសាំងហ្គាពួរ បង្ហាញពីការព្រួយបារម្ភសុវត្ថិភាពលករខ្មែរ ដែលកំពុងបម្រើការនៅក្រៅប្រទេស។ គណបក្សសង្គ្រោះជាតិ ស្នើឲ្យប្រទេសចុះហត្ថលេខីជាមួយរដ្ឋាភិបាលកម្ពុជា ត្រូវយកចិត្តទុកដាក់ និងមានតម្លាភាពលើកិច្ចព្រមព្រៀងក្នុងការការពារពលករខ្មែរ។
តំណាងរាស្ត្រជាប់ឆ្នោតរបស់គណបក្សសង្គ្រោះជាតិ លោក សុន ឆ័យ មានប្រសាសន៍ថា គោលបំណងនៃការដាក់លិខិតនេះ ដើម្បីឲ្យស្ថានទូតទាំងពីរយកចិត្តទុកដាក់គោរពសិទិ្ធពលករឆ្លងដែន ឲ្យស្របទៅតាមកិច្ចព្រមព្រៀងអង្គការសហប្រជាជាតិ និងអង្គការអន្តរជាតិខាងការងារ(ILO)។ លោកបន្តថា ការអនុវត្តកន្លងមករបស់រាជរដ្ឋាភិបាលកម្ពុជា មិនមានប្រសិទ្ធភាពក្នុងការធានាសុវត្ថិភាព និងធានាសិទិ្ធមូលដ្ឋានជូនពលករនៅឡើយទេ ៖ “គឺសព្វថ្ងៃនេះគឺអត់មានការទទួលខុសត្រូវ ក្នុងការធានាសិទ្ធិរបស់ពលករគឺដូចជាប្រើប្រាស់អំណាច យកពលករខ្មែរធ្វើដូចសត្វធាតុចឹង យកទៅបោះបង់ចោលប្រទេសគេ ហើយគ្មានកិច្ចការពារធានាសិទ្ធិរស់នៅ សិទ្ធិទទួលបានផលពីការងារត្រឹមត្រូវរបស់ពលករទេ ហើយយើងឃើញមានការសម្លាប់ក៏មាន ការរំលោភផ្លូវភេទលើពលករយើងតាមចិត្ដក៏មាន ហើយករណីខ្លះដែលមិនអាចទទួលយកបានគឺបង្ខំឲ្យពលករខ្មែរហ្នឹងទទួលទានលាមកខ្លួនឯងជាដើមអីហ្នឹង គឺវាអាក្រក់ហួសហេតុ” ។
អ្នកគ្រប់គ្រងបច្ចេកទេសឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ រដ្ឋាភិបាលកម្ពុជាមុនពេលបញ្ជូនពលករខ្មែរទៅក្រៅប្រទេស គួរតែបង្កើតយន្តការការពារណាមួយ ដើម្បីធានានូវសិទិ្ធជូនពលករពលការនីខ្មែរបាន។ លោកបន្តថា ឲ្យរដ្ឋាភិបាលបញ្ជូនទៅហើយគួរយកចិត្តទុកដាក់ និងពិនិត្យការលំបាកដែលពលករជួបប្រទះ និងរកវិធីសាស្ត្រដោះជូនពួកគាត់ ៖ “យើងជាសង្គមស៊ីវិលយើងបានទទូចយូរហើយថា សូមឲ្យមានការផ្អាកនាំពលករទៅប្រទេសហ្នឹងសិន បើសិនជាយើងអត់ទាន់មានកិច្ចព្រមព្រៀងណាមួយធានាថា ពលករខ្មែរយើងនឹងទៅអាចធានាការពារសន្ដិសុខជូន ពលករ ពលការិនីខ្មែរយើងបានណាស់ ទីពីរសូមឲ្យរដ្ឋាភិបាលបើបញ្ជូនទៅហើយសូមយកចិត្ដទុកដាក់ បានន័យថា រដ្ឋាភិបាលឫក៏ភ្នាក់ងារក្រុមហ៊ុនដូចគ្នា ក្រសួងការងារចឹងត្រូវតែមានយន្ដការដើម្បីត្រួតពិនិត្យ” ។
VOD មិនទាន់អាចទាក់ទងមន្ត្រីរដ្ឋាភិបាល ដើម្បីសុំការអត្ថាធិប្បាយលើបញ្ហានេះបាននៅឡើយទេ។ តែកន្លងទៅ ប្រធាននាយកដ្ឋានមុខរបរ នៃក្រសួងការងារ លោក ហែម ប៊ុននី ធ្លាប់ប្រាប់ VODថា កម្ពុជាមិនទាន់សម្រេចឲ្យបញ្ជូនពលការិនីទៅប្រទេសម៉ាឡេស៊ីនៅឡើយទេ ព្រោះរង់ចាំការឆ្លើយតបពីភាគីម៉ាឡេស៊ីចំពោះការចុះអនុសារណៈយោគយល់យល់គ្នាសិន។ លោកបន្ថែមថា ក្រសួងការងារបានសម្រេចប្តូរការអនុវត្តអនុក្រឹត្យចាស់លេខ៥៧ មកអនុវត្តតាម អនុក្រឹត្យថ្មីលេខ ១៩០វិញ ដោយមានចំណុចជាច្រើនបានការពារពលការិនីខ្មែរ។ លោកថា ក្រសួងសហការជាមួយអង្គការអន្តរជាតិខាងការងារ (ILO) បង្កើតប្រកាសមួយចំនួន ដើម្បីអនុវត្តបន្ថែមលើអនុក្រឹត្យនេះ ដូចជា យន្តការទទួលពាក្យបណ្តឹង អធិការរកិច្ច ការលើកសរសើរ ការដាក់វិន័យ និងការប្រើប្រាស់ប្រាក់កក់ ដើម្បីជួយពលការិនីដែលរងគ្រោះជាដើម។
គណបក្សសង្គ្រោះជាតិ ឲ្យដឹងថា ពលករខ្មែរ ដែលកំពុងបម្រើការងារនៅប្រទេសម៉ាឡេស៊ី មានជាង៦ម៉ឺននាក់ទាំងស្របច្បាប់ និងខុសច្បាប់។ មន្ត្រីក្រសួងការងារ ឲ្យដឹងថា រហូតមកដល់ពេលនេះ ក្រសួងបានបញ្ជូនពលករខ្មែរចំនួន១២នាក់ ដើម្បីទៅបម្រើការនៅទីនោះ។ ក្រសួងគ្រោងនឹងបញ្ជូនជាង៤០០នាក់ ជាការសាកល្បងលើកដំបូង។ តាមការប៉ាន់ប្រមាណ ពលរដ្ឋខ្មែរដែលទៅធ្វើការស្របច្បាប់ និងខុសច្បាប់ នៅប្រទេសថៃមានជាង៤សែននាក់៕
No comments:
Post a Comment
yes