ហិង្សានៅថ្ងៃរវាងក្រុមបាតុករ និងបាតុករ (រូបថត thegardian)
នគរបាលថៃ បានប្រើឧស្ម័នបង្ហូរទឹកភ្នែក និងទឹកបាញ់លើហ្វូងបាតុករ នៅព្រឹកថ្ងៃអាទិត្យនេះ ខណៈបាតុករព្យាយាមចូលកាន់កាប់វិមានរដ្ឋាភិបាល ដើម្បីបណ្តេញ លោកស្រី យីងឡាក់ ចុះចេញពីតំណែង បណ្តាលឲ្យអ្នកស្លាប់កើនដល់២នាក់ និង ៤៥នាក់ផ្សេងទៀតរងរបួស។
សារព័ត៌មាន Channel News Asia ចុះផ្សាយថា នៅថ្ងៃអាទិត្យនេះ បាតុករបានប្រមូលផ្តុំនៅក្រៅវិមានរដ្ឋាភិបាល ហើយព្យាយាមចូលទៅខាងក្នុងដើម្បីដាក់សម្ពាធឲ្យលោកស្រី យីងឡាក់ ចុះចេញពីតំណែងនាំឲ្យមានហិង្សាផ្ទុះឡើង។ នៅតំបន់ផ្សេងៗនៃទីក្រុងបាងកក ក៏ស្ថិតក្នុងការឃ្លាំមើលយ៉ាងយកចិត្តទុកដាក់ពីសមត្ថកិច្ចដែរ។
នគរបាលបានប្រើឧស្ម័នបង្ហូរទឹកភ្នែក និងបាញ់ទឹកជាបន្តបន្ទាប់ នៅពេលដែលបាតុករ ព្យាយាមទម្លុះរបាំង កាត់ខ្សែខណ្ឌការពារវិមានរដ្ឋាភិបាល ដែលមានការការពារយ៉ាងតឹងរឹង ពីសន្តិសុខ និងយោធា មិនមានអាវុធនៅក្នុងដៃ។ ឧស្ម័នបង្ហូរទឹកភ្នែក ក៏បានប្រើរហូតដល់កន្លែងជិតស្នងការនគរបាលក្រុងបាងកក ជាកន្លែងដែលបាតុករតែងប្រមូលផ្តុំគ្នានៅទីនោះផងដែរ។
ហិង្សាហាក់មានកំដៅឡើង បន្ទាប់ពីក្រុមបាតុករអាវលឿងប្រឆាំង លោកស្រី យីងឡាក់ ប៉ះទង្គិចជាមួយក្រុមបាតុករអាវក្រហម គាំទ្រលោកស្រី យីងឡាក់ កាលពីថ្ងៃសៅរ៍ម្សិលមិញ។
ក្រុមទាំងពីរកំពុងចោទប្រកាន់គ្នាទៅវិញទៅមក ជុំវិញការបង្កឲ្យមានហិង្សានេះ។ សមត្ថកិច្ច នៅមិនទាន់កំណត់បានថា អ្នកណាក្រុមណាជាបង្កឡើងនោះទេ។
កាលពីឆ្នាំ២០១០ យោធាធ្លាប់បង្ក្រាបបាតុករ ក្រុមអាវក្រហមដែលគាំទ្រលោក ថាក់ ស៊ីន បងប្រុសរបស់ លោកស្រី យីងឡាក់ បណ្តាលឲ្យមនុស្ស៩១នាក់ស្លាប់៕
No comments:
Post a Comment
yes