លោក ជួន សុវណ្ណ(ខាងមុខ) អគ្គស្នងការរងនគរបាលជាតិ និងជា
ស្នងការនគរបាលរាជធានីភ្នំពេញ(រូបភាពពី ហ្វេសប៊ុក អគ្គស្នងការនគរបាលជាតិ)
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ជួន សុវណ្ណ ឲ្យដឹងថា កម្លាំងនគរបាលជាតិត្រូវតែហ្វឹកហាត់បន្ថែមទៀត ដើម្បីធ្វើឲ្យការងារការពារ និងប្រឆាំងនឹងបាតុករដោយអហិង្សា កាន់តែមានប្រសិទ្ធភាពថែមទៀត។
គេហទំព័រហ្វេសប៊ុករបស់អគ្គស្នងការនគរបាលជាតិ ចុះផ្សាយដោយដកស្រង់សម្តីរបស់លោក ជួន សុវណ្ណ នៅព្រឹកថ្ងៃអង្គារនេះថា កម្លាំងនគរបាលជាតិ ត្រូវតែហ្វឹកហាត់ បន្ថែមទៀតនៃយុទ្ធវិធីការពារ ប្រឆាំងបាតុករ ដែលធ្វើបាតុកម្មដោយហិង្សា ដោយសារការប្រឈមមុខជាច្រើនលើកច្រើនសារ ដែលមានការប៉ះទង្គិចគ្នារវាងកម្លាំងការពារសន្តិសុខសណ្ដាប់ធ្នាប់ និងក្រុមបាតុករ។ លោក ជួន សុវណ្ណ បានលើកឧទាហរណ៍ករណីការប៉ះទង្គិចចំនួនពីរ គឺ កាលពីថ្ងៃទី ១៥ កញ្ញា ការប៉ះទង្គិចគ្នា យ៉ាងធ្ងន់ធ្ងរ នៅស្ពានអាកាស ក្បលថ្នល ហើយនឹងការប៉ះទង្គិចគ្នាធ្ងន់ធ្ងរមួយទៀត គឺនៅ ថ្ងៃទី១២ វិច្ឆិកា ស្ថិតនៅមុខ វត្តស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ។ លោកបញ្ជាក់ថា៖ «ដើម្បីទុកជាការឆ្លើយតបនឹងការពារសន្តិសុខ សុវត្ថិភាព ជូនប្រជាពលរដ្ឋ កម្លាំងនគរបាលជាតិ ត្រូវហ្វឹកហ្វឺនបន្ថែមទៀត ដើម្បីងាយស្រួលក្នុងការអន្តរាគមន៍បានភ្លាមៗ»។
គេហទំព័រអគ្គស្នងការនគរបាលជាតិ ឲ្យដឹងទៀតថា កម្លាំងនគរបាលជាតិ បានហ្វឹកហ្វឺនបាញ់គ្រាប់ពិត និងពង្រឹងសមត្ថភាពបន្ថែមនូវយុទ្ធវិធីប្រឆាំងបាតុករ ដែលធ្វើបាតុកម្ម ដោយហិង្សា ដើម្បីងាយស្រួលក្នុងការការពារសុវត្ថិភាព សន្តិសុខ សណ្ដាប់ធ្នាប់។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ការហ្វឹកហាត់នេះ ជាការល្អមួយ តែលោកសង្ឃឹមថា ការទប់ស្កាត់នឹងបាតុកម្មលើកក្រោយៗទៀត មិនត្រូវបង្កឲ្យមានបាតុកររងរបួស និងស្លាប់ ដូចកាលនៅលើស្ពានស្ទឹងមានជ័យ។ លោកបញ្ជាក់ថា៖ «.....មានភាពយោគយល់អត់ធ្មត់ កុំអាងតែមានអាវុធបាញ់បោះតាមចិត្ត។ ការធ្វើបាតុកម្មមិនមែនឲ្យប្រើអំពើហិង្សាលើគ្នាទេ គឺគ្រាន់ចង់រកយុតិ្តធម៌ជូនប្រជាពលរដ្ឋ និងសង្គមជាតិ »។
កន្លងទៅ លោក ជួន សុវណ្ណ រងការរិះគន់ច្រើនពីប្រជាជនតាមបណ្តាញហ្វេសប៊ុក បន្ទាប់ពីហិង្សាកើតឡើងពីរកន្លែងផ្សេងគ្នា ក្នុងរយៈបីខែចុងក្រោយនេះ។ ហិង្សាទីមួយកើតឡើងកាលពីថ្ងៃទី១៥ ខែកញ្ញា រវាងសមត្ថកិច្ច និងអ្នកដំណើរនៅត្រង់ចំណុចស្ពានអាកាសក្បាលថ្នល់ ដែលបណ្តាលឲ្យយុវជនឈ្មោះ ម៉ៅ សុចាន់ អាយុ២៩ឆ្នាំស្លាប់ និងជាង២០នាក់រងរបួស។ ចំណែកហិង្សាទី២ កើតឡើងកាលពីថ្ងៃទី១២ ខែវិច្ឆិកា រវាងកម្មករ និងសមត្ថកិច្ចនៅត្រង់ចំណុចស្ពានស្ទឹងមានជ័យ បណ្តាលឲ្យស្ត្រីអ្នកលក់បាយឈ្មោះ អេង សុខុម វ័យ៤៩ឆ្នាំម្នាក់ បានស្លាប់ និង ប្រជាជនជិត១០នាក់ផ្សេងទៀតរបួស៕
No comments:
Post a Comment
yes