ក្រុមហ៊ុនសម្បទានដីមួយ ឈូសបំផ្លាញព្រៃឈើធំៗ យកដីដាំកៅស៊ូ
រូប ជីវ័ន
អាជ្ញាធរស្រុក អូរជុំ ខេត្ត រតនគិរី បានចេញលិខិតជូនដំណឹងទៅអ្នកភូមិ ១០២ គ្រួសារដែលរស់នៅក្នុងឃុំ អូរជុំ ឲ្យរុះរើលំនៅឋានចាកចេញ ដោយសំអាងថា ពួកគាត់កំពុងរស់នៅលើដីក្រុមហ៊ុន ស្វីហ្វ រ៉ាប់ប៊ើ ដែលទទួលបានសិទ្ធិពីរដ្ឋក្នុងការអភិវឌ្ឍចម្ការកៅស៊ូ។
ក៏ប៉ុន្តែកាលពីម្សិលមិញក្រុមអ្នកភូមិបាននាំគ្នាមកសុំកិច្ចអន្តរាគមន៍ពីសមាគមសិទិ្ធមនុស្ស អាដហុក ហើយអ្នកភូមិ ៥នាក់ ក្នុងចំណោម ១០២ គ្រួសារ ត្រូវបានកោះហៅឲ្យចូលជួបមន្រ្តីសាលាខេត្តដើម្បីស្វែងរកដំណោះស្រាយជូនបន្ទាប់ពីបានទទួលលិខិតជូនដំណឹងស្តីពីការបណ្តេញចេញនេះ។
យោងតាមលិខិតជូនដំណឹងរបស់សាលាស្រុក អូរជុំ បានជម្រាបថា អាជ្ញាធរអំពាវនាវឲ្យអ្នកស្រុកធ្វើការរុះរើលំនៅឋានចាកចេញមុនពេលដែលក្រុមហ៊ុន ស្វីហ្វ រ៉ាប់ប៊ើ ចាប់ផ្តើមធ្វើការសកម្មភាពណាមួយបើមិនដូច្នោះទេ អាជ្ញាធរនឹងចាត់វិធានការតាមច្បាប់។
ក្រុមហ៊ុន ស្វីហ្វ រ៉ាប់ប៊ើ នេះ មានផ្ទៃដីអភិវឌ្ឍន៍ជាង ៣ ពាន់ហិកតាជាដីចម្ការកៅស៊ូចាស់សល់ពីសម័យមុន ដោយផ្ទេរពីក្រុមហ៊ុន តាយសេង។
អ្នកភូមិម្នាក់ឈ្មោះ ឈុំ សុខជា អាយុ ៤៧ឆ្នាំ និយាយថា អ្នកភូមិបានឃើញលិខិតជូនដំណឹងរុះរើនេះនៅតាមដើមកៅស៊ូដោយគ្មានប្រាក់សំណងណាមួយឡើយខណៈដែលអ្នកភូមិភាគច្រើនមករស់នៅតាំងពីឆ្នាំ ១៩៩៣ ធ្វើជាកម្មករក្រុមហ៊ុន ៤ ជំនាន់មកហើយ។
លោកបន្តថា៖ «ពួកយើងបានឃើញលិខិតនៅតាមដើមកៅស៊ូគួរឲ្យតក់ស្លុតត្រង់ថា ការរុះរើគ្មានប្រាក់សំណងទេ»។
លោក ង៉ែត បូរិន តំណាងឲ្យក្រុមហ៊ុន ស្វីហ្វ រ៉ាប់ប៊ើ បានឲ្យដឹងថា ខាងក្រុមហ៊ុនគ្មានសមត្ថកិច្ចដោះស្រាយទេ រឿងនេះជាភារកិច្ចរបស់អាជ្ញាធរថ្នាក់មូលដ្ឋាន។
លោកបន្តថា៖ «ខ្ញុំមិនដឹងពីការតវ៉ារបស់អ្នកភូមិនោះទេ ខាងក្រុមហ៊ុនគ្មានសមត្ថកិច្ចទៅដោះស្រាយដីធ្លីទេ នេះជាសមត្ថកិច្ចរបស់អាជ្ញាធរនៅមូលដ្ឋាន»។
លោក សាក់ សុន អភិបាលស្រុក អូរជុំ មិនអាចសុំការអត្ថាធិប្បាយពីបញ្ហានេះទេ ប៉ុន្តែលោកធ្លាប់បានប្រាប់ ភ្នំពេញ ប៉ុស្តិ៍ ថា អ្នកភូមិបានរស់នៅលើដីរដ្ឋដែលរដ្ឋប្រគល់ឲ្យក្រុមហ៊ុនសម្រាប់ធ្វើការអភិវឌ្ឍ។
លោក ឆាយ ធី អ្នកសម្របសម្រួលសមាគមសិទ្ធិមនុស្ស អាដហុក ថ្លែងថា បើអាជ្ញាធរមិនចង់ឲ្យពួកគាត់រស់នៅដីនោះដូច្នេះអាជ្ញាធរគួរតែស្នើសុំរដ្ឋក្នុងការផ្តល់ដីសង្គមកិច្ចកន្លែងណាមួយផ្សេងទៀត ដល់ពួកគាត់ឲ្យដើម្បីតាំងលំនៅផង។
លោកបន្តថា៖ «ពួកគាត់សុទ្ធតែជាពលរដ្ឋខ្មែរ ដែលទទួលស្គាល់ពីភូមិ ឃុំ ហើយសុទ្ធតែក្រីក្រនិងរស់នៅធ្វើកម្មករយូរឆ្នាំហើយ អ៊ីចឹងដំណោះស្រាយគឺរដ្ឋគួរតែផ្តល់ដីសង្គមកិច្ចជូនពួកគាត់នោះជម្លោះនឹងបញ្ចប់»៕
No comments:
Post a Comment
yes