ការប៉ះទង្គិចគ្នារវាងក្រុមសន្តិសុខសាលាខណ្ឌដូនពេញ និងពលរដ្ឋនៅ
ទីលានប្រជាធិបតេយ្យ នៅថ្ងៃទី២៦ខែមករា (រូបថត តាត ឧត្តម)
អង្គការលីកាដូ និងអង្គការលើកលែងទោសអន្តរជាតិ នៅថ្ងៃអាទិត្យទី២៦ ខែមករានេះ ចេញសេចក្ដីថ្លែងការណ៍ជាសាធារណៈ ពាក់ព័ន្ធនឹងវិបត្តិសិទ្ធិមនុស្សនៅកម្ពុជា។
ពីរថ្ងៃមុនកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិស្ដីពីកម្ពុជា ដែលនឹងប្រព្រឹត្តិធ្វើនៅថ្ងៃទី២៨ ខែមករា ឆ្នាំ២០១៤ខាងមុខ ក្រុមអ្នកច្បាប់ការពារ និងលើកស្ទួយសិទ្ធិមនុស្ស លីកាដូ និងអង្គការលើកលែងទោសអន្តរជាតិ អំពាវនាវឲ្យរដ្ឋដែលជាសមាជិកអង្គការសហប្រជាជាតិជួយដោះស្រាយវិបត្តិសិទ្ធិមនុស្សនៅកម្ពុជា។
នៅក្នុងសេចក្ដីថ្លែងការណ៍រួម ដែលផ្ញើទៅកាន់ក្រុមការងាររៀបចំកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្ដីពីសិទ្ធិមនុស្ស កាលពីខែមិថុនា ឆ្នាំ២០១៣ អង្គការលីកាដូ និងអង្គការលើកលែងទោសអន្តរជាតិ បានរំលេចឲ្យឃើញពីភាពយ៉ាប់យ៉ឺនរបស់ក្រុមអ្នកការពារសិទ្ធិមនុស្សនៅកម្ពុជា ចាប់តាំងពីឆ្នាំ២០០៩ ដល់ឆ្នាំ២០១៣ និងបានផ្ដល់អនុសាសន៍ជាបន្តបន្ទាប់។
ចាប់តាំងពីដើមឆ្នាំ២០១៤មក បញ្ហាសិទ្ធិមនុស្សនៅកម្ពុជាបានធ្លាក់ចុះយ៉ាងខ្លាំង ដោយរួមបញ្ចូលទាំងការគំរាមកំហែងទៅលើអ្នកការពារសិទ្ធិមនុស្សផងដែរ។ ការបង្ក្រាបមួយបានធ្វើឲ្យមនុស្សយ៉ាងតិចបួននាក់ស្លាប់, បាត់ខ្លួន២នាក់ រាប់សិបនាក់រងរបួស និងមនុស្ស២៣នាក់ផ្សេងទៀតត្រូវបានចាប់ឃុំឃាំង។
សេចក្ដីថ្លែងការណ៍អំពាវនាវឲ្យដោះលែងជាបន្ទាន់នូវមនុស្សទាំង២៣នាក់ ដែលត្រូវបានចាប់ខ្លួន នៅក្នុងបាតុកម្មនៅទីក្រុងភ្នំពេញ កាលពីថ្ងៃទី២ និងទី៣ ដើមខែមករា ឆ្នាំ២០១៤នេះ ហើយថា ពួកគេទាំង២៣នាក់ គួរតែទទួលបាននូវការព្យាបាលយ៉ាងឆាប់រហ័សពីគ្រូពេទ្យរបស់ពួកគេ។
សេចក្ដីថ្លែងការណ៍ក៏អំពាវនាវឲ្យរដ្ឋាភិបាលបញ្ចប់ការប្រើប្រាស់កម្លាំងសន្តិសុខ បង្ក្រាបលើបាតុករ និងការប្រមូលផ្ដុំរបស់ប្រជាពលរដ្ឋ ជាពិសេសឲ្យបញ្ចប់នូវការប្រើប្រាស់អាវុធធុនស្រាល ដើម្បីគ្រប់គ្រងមហាជន អំពាវនាវឲ្យធ្វើការស៊ើបអង្កេតលើការប្រើប្រាស់កម្លាំងប្រដាប់អាវុធប្រឆាំងនឹងបាតុករ ការទទួលខុសត្រូវក្នុងការរំលោភលើសិទ្ធិមនុស្ស និងផ្ដល់សំណងដល់ជនរងគ្រោះ ព្រមទាំងអំពាវនាវឲ្យដកបម្រាមលើការប្រមូលផ្ដុំគ្នា ដែលមិនមានមូលដ្ឋានច្បាប់ ឲ្យបញ្ឈប់ការរំលោភ និងចាប់ខ្លួនអ្នកការពារសិទ្ធិមនុស្ស។
កាលពីខែធ្នូឆ្នាំ២០១៣ កម្មកររោងចក្របានធ្វើបាតុកម្មទាមទារដំឡើងប្រាក់ខែគោល ១៦០ដុល្លារក្នុងមួយខែ ស្របពេលជាមួយនឹងការធ្វើបាតុកម្មរបស់គណបក្សសង្គ្រោះជាតិ ប្រឆាំងនឹងលទ្ធផលឆ្នោត ធ្វើឲ្យអត្រានៃការប្រមូលផ្ដុំគ្នាកើនឡើងហួសពីសព្វមួយដង។
No comments:
Post a Comment
yes