ពលរដ្ឋខ្មែរធ្វើបាតុកម្មនៅប្រទេសកូរ៉េ នៅថ្ងៃទី១២ មករា ឆ្នាំ២០១៤
បាតុករខ្មែរប្រមាណ ២ពាន់នាក់ នៅប្រទេសកូរ៉េខាងត្បូង បាននាំគ្នាធ្វើបាតុកម្មនៅទីក្រុងសេអ៊ូល (Seoul) នៅថ្ងៃទី១២ ខែមករា ថ្កោលទោសចំពោះរដ្ឋាភិបាលកម្ពុជា ដែលបានបាញ់បង្ក្រាបក្រុមកម្មករតវ៉ាទាមទារដំឡើងប្រាក់ខែ ១៦០ដុល្លារ នៅផ្លូវវ៉េងស្រេង។
បណ្ដាប្រទេសនៅទ្វីបអាស៊ី និងទ្វីបអឺរ៉ុបខ្លះ ដែលមានពលរដ្ឋខ្មែររស់នៅ ក៏បាននាំគ្នាប្រឆាំងចំពោះទង្វើរបស់រដ្ឋាភិបាល និងទាមទារឲ្យរដ្ឋាភិបាលដោះលែងមនុស្ស ២៣នាក់ដែលឃុំខ្លួនឲ្យមានសេរីភាពវិញ។
ពលករខ្មែរដែលកំពុងធ្វើការនៅប្រទេសកូរ៉េខាងត្បូង ក្រុមនិស្សិត និងស្ត្រីខ្មែរដែលរៀបការទៅរស់នៅទីនោះប្រមាណ ២ពាន់នាក់ បានហែក្បួនបាតុកម្មនៅក្រោមសីតុណ្ហភាពដ៏ត្រជាក់ ក្រោមដក៧អង្សា នៅតាមផ្លូវខ្លះ ក្នុងក្រុងសេអ៊ូល ដើម្បីប្រឆាំងចំពោះទង្វើដែលរដ្ឋាភិបាលបញ្ជាឲ្យកម្លាំងសមត្ថកិច្ចបាញ់សម្លាប់ បង្ក្រាបកម្មកររោងចក្រកាត់ដេរនៅផ្លូវវ៉េងស្រេង។
តំណាងពលករខ្មែរដែលដឹកនាំធ្វើបាតុកម្មនៅប្រទេសកូរ៉េខាងត្បូង លោក យឹម ស៊ីណន ប្រាប់វិទ្យុអាស៊ីសេរី តាមទូរស័ព្ទពេលកំពុងហែក្បួនបាតុកម្មនៅថ្ងៃទី១២ ខែមករា ថា បាតុករទាំងអស់បានជួបជុំគ្នានាទីលានប្រជាធិបតេយ្យ កណ្ដាលទីក្រុងសេអ៊ូល ដោយលើកបដាទាមទារ មានរូបថតលោក ហ៊ុន សែន និងភរិយា រូបលោក បាន គីមូន (Ban Ki-moon) អគ្គលេខាធិការអង្គការសហប្រជាជាតិ និងរូបភាពនៃការបាញ់បង្ក្រាបកម្មករស្លាប់និងរបួសនៅផ្លូវវ៉េងស្រេង កាលពីថ្ងៃទី៣ មករា និងដើរហែឆ្ពោះទីសាលាក្រុងសេអ៊ូល ដែលមានចម្ងាយប្រមាណ ១គីឡូម៉ែត្រ ដើម្បីបង្ហាញទៅអន្តរជាតិនិងមន្ត្រីទូតនានា។
តំណាងពលកររូបនោះបញ្ជាក់ថា គោលបំណងសំខាន់នៃការទាមទារនោះ គឺទី១ ស្នើសុំឲ្យមានការស៊ើបអង្កេតចំពោះការបាញ់បង្ក្រាបកម្មករស្លាប់ និងរបួសនៅផ្លូវវ៉េងស្រេង។ ទី២ ទាមទារឲ្យរដ្ឋាភិបាលដោះលែងមនុស្ស ២៣នាក់ ដែលបានចាប់និងឃុំខ្លួន។ ទី៣ ទាមទារឲ្យរដ្ឋាភិបាលផ្តល់ប្រាក់ខែសមរម្យដល់មន្ត្រីរាជការនិងកម្មករ កម្មការិនី និងទី៤ ទាមទារឲ្យមានការបោះឆ្នោតឡើងវិញ។
លោក យឹម ស៊ីណន បន្តថា តាមគម្រោងបាតុករនឹងយកញត្តិទាមទារនោះទៅដាក់ជូនការិយាល័យអង្គការសហប្រជាជាតិ ប្រចាំប្រទេសកូរ៉េខាងត្បូង ក្រោយការប្រមូលស្នាមមេដៃគាំទ្ររួច។
លោកព្រមានថា ប្រសិនបើរដ្ឋាភិបាលកម្ពុជា មិនផ្លាស់ប្ដូរឥរិយាបថទេនោះ ក្រុមបាតុករនឹងធ្វើបាតុកម្មទាមទាររៀងរាល់សប្ដាហ៍នៅប្រទេសកូរ៉េខាងត្បូង។
ពលករខ្មែរម្នាក់ដែលចូលរួមធ្វើបាតុកម្មនៅប្រទេសកូរ៉េខាងត្បូង លោក ឈឿន ឌី ឲ្យដឹងថា ខាងសហជីពកម្មករប្រចាំប្រទេសកូរ៉េខាងត្បូង បានគាំទ្រការធ្វើបាតុកម្មរបស់ពលករនិងពលរដ្ឋខ្មែរ និងបានថ្កោលទោសចំពោះក្រុមហ៊ុនកូរ៉េខ្លះ ដែលឃុបឃិតជាមួយមន្ត្រីរដ្ឋាភិបាលរហូតមានការបាញ់បង្ហូរឈាមកម្មករនៅពេលដែលពួកគេធ្វើបាតុកម្មទាមទារដំឡើងប្រាក់ខែ។
នៅតាមបណ្ដាញសង្គមហ្វេសប៊ុក (Facebook) ព័ត៌មានដែលត្រូវគេចាប់អារម្មណ៍នៅចុងសប្តាហ៍ ហើយទាក់ទាញខ្លាំងនោះ គឺការធ្វើបាតុកម្មថ្កោលទោសចំពោះប្រមុខរដ្ឋាភិបាលពីបណ្ដាប្រទេសមួយចំនួន ទាំងនៅទ្វីបអាស៊ី និងទ្វីបអឺរ៉ុប។
នៅប្រទេសបារាំង ចុងសប្ដាហ៍នេះ សមាគមសាមគ្គីកូនខ្មែរច្រើនរយនាក់ បានធ្វើមហាបាតុកម្មនៅទីលានប្រជាធិបតេយ្យនៅក្រុងប៉ារីស ទាមទារឲ្យកម្ពុជា បោះឆ្នោតឡើងវិញ ទាមទារឲ្យលោក ហ៊ុន សែន ចុះចេញពីតំណែង ទាមទារឲ្យដោះលែងមនុស្ស ២៣នាក់ ដែលពួកគេយល់ឃើញថា គ្មានកំហុស ឲ្យមានសេរីភាពវិញ។
នៅឯប្រទេសអូទ្រីសវិញ ពលរដ្ឋខ្មែរនៅទីនោះ បានចេញមកធ្វើបាតុកម្មទាមទាររកយុត្តិធម៌ដល់កម្មករខ្មែរ ពិសេសស្នើសុំឲ្យមានការដំឡើងប្រាក់ខែឲ្យពួកកម្មករដល់ ១៦០ដុល្លារ។
ជនជាតិអង់គ្លេសក៏បានឈឺឆ្អាលចំពោះការបាញ់សម្លាប់កម្មករខ្មែរដែរ ដោយបានធ្វើបាតុកម្មនៅមុខស្ថានទូតកម្ពុជា ប្រចាំនៅចក្រភពអង់គ្លេស ដោយលើកបដាស្រែកទាមទារឲ្យមានការដោះលែងមនុស្ស ២៣នាក់ចេញដោយគ្មានលក្ខខណ្ឌ បញ្ឈប់ការប្រើហិង្សាលើកម្មករ និងដំឡើងប្រាក់ឈ្នួលឲ្យកម្មកររស់នៅបានសមរម្យ។
ទីផ្សារសម្លៀកបំពាក់ដែលកម្ពុជា ផលិតបានមួយផ្នែកធំយកទៅលក់នៅប្រទេសអង់គ្លេស ហើយតាមវីដេអូ គ្លីប ដែលផ្សាយតាមបណ្ដាញសង្គមហ្វេសប៊ុក ជនជាតិអង់គ្លេសទាំងនោះស្រែកទាមទារថា «យើងស្រលាញ់សម្លៀកបំពាក់របស់យើង»។ នៅឯប្រទេសចិន ជនជាតិចិនខ្លះ ក៏បានតវ៉ានៅមុខស្ថានទូតខ្មែរនៅទីនោះ និងបានថ្កោលទោសរដ្ឋាភិបាលកម្ពុជា ចំពោះការបង្ក្រាបលើកម្មករដោយអាវុធ។
វិទ្យុអាស៊ីសេរី មិនអាចទាក់ទងលោក ទិត សុធា អ្នកនាំពាក្យអង្គភាពព័ត៌មាននិងប្រតិកម្មរហ័ស និងលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ជុំវិញប្រតិកម្មដែលពលរដ្ឋនិងពលករខ្មែរនៅក្រៅស្រុកធ្វើបាតុកម្មប្រឆាំងទង្វើរបស់រដ្ឋាភិបាលបានទេ នៅថ្ងៃទី១២ មករា។
កាលពីថ្ងៃទី២ ទី៣ មករា ទាហានឆត្រយោងលេខ៩១១ និងកម្លាំងសមត្ថកិច្ចចម្រុះ បានវាយនិងបាញ់បង្ក្រាបកម្មករតវ៉ាទាមទារដំឡើងប្រាក់ឈ្នួល ដែលបណ្ដាលឲ្យកម្មករ ៤នាក់ស្លាប់ ជិត ៤០នាក់ រងរបួស និងចាប់ខ្លួនមនុស្ស ២៣នាក់។ ភ្លាមៗអង្គការសង្គមស៊ីវិលជាតិ និងអន្តរជាតិ និងបណ្ដាប្រទេសជាមិត្តមួយចំនួន បានចេញសេចក្ដីថ្លែងការណ៍ដោយសម្ដែងការព្រួយបារម្ភ និងខ្លះទៀតថ្កោលទោសចំពោះហេតុការណ៍ដែលយោធាបង្ក្រាបលើបាតុករនោះ៕
No comments:
Post a Comment
yes