៩ថ្ងៃក្រោយការបាញ់សម្លាប់កម្មករកាត់ដេរ សហភាពការងារកម្ពុជាដែលដឹកនាំដោយលោក អាត់ ធន់ បាន និងកំពុងរៀបចំពិធីបង្សុកូលរម្លឹកជូនដល់ព្រលឹងកម្មករដែលបានស្លាប់ក្នុងអំពើហិង្សាកាលពីថ្ងៃទី៣កន្លងមកនេះ។ ក្នុងអំពើហិង្សារវាងអាជ្ញាធរ និងកម្មករនាពេលកន្លងមក មនុស្ស៤នាក់បានបាត់បង់ជីវិត និងជាង៣០ផ្សេងទៀតបានទទួលរងរបួស។
កម្មករកាត់ដេរ និងតំណាងសហជីពជាច្រើនរយនាក់នឹងជួបប្រជុំគ្នានៅល្ងាចថ្ងៃអាទិត្យនេះដើម្បីរៀបចំពិធីបង្សុកូលរម្លឹកវិញ្ញាណក្ខន្ធកម្មករកាត់ដេរដែលបានបាត់បង់ជីវិតកាលពីថ្ងៃទី៣ខែមករានៅក្នុងអំពើហិង្សានាផ្លូវវេងស្រេង ខាងត្បូងឈាងខាងលិច ទីក្រុងភ្នំពេញ។
លោក អាត់ ធន់ ប្រធានសហភាពការងារកម្ពុជា ដែលជាអ្នករៀបចំពិធីសាសនានេះ បានថ្លែងអោយដឹងនៅថ្ងៃអាទិត្យនេះថា កម្មករ និងតំណាងសហជីពជាង៣០០នាក់នឹងរៀបចំពិធីបង្សុកូលគោរពវិញ្ញាណក្ខន្ធជូនដល់ព្រលឹងកម្មករដែលបាត់បង់ជីវិត។ បន្ទាប់មក ក្នុងពិធីដដែលនេះ កម្មករ និងសហជីពគ្រោងនឹងប្រមូលបច្ច័យរួមគ្នាដើម្បីយកទៅជួយកម្មករដែលកំពុងជាប់ពន្ធនាគារនៅក្នុងខេត្តកំពង់ចាម។
ក្រៅពីពិធីបង្សុកូលនេះ លោក អាត់ ធន់ ប្រធានសហភាពការងារកម្ពុជាបានបង្ហើបអោយដឹងថា តំណាងសហជីពជាច្រើននាក់គ្រោងនឹងចូលជួបលោក ស៊ូរិយ៉ា ប្រាសាទ ស៊ូបេឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជានៅថ្ងៃខាងមុខនេះ។ លោក ស៊ូរិយ៉ា ប្រាសាទ ស៊ូបេឌី ត្រូវបំពេញទស្សនកិច្ចលើកដំបូង នៅក្រោយការបោះឆ្នោតនៅកម្ពុជាចាប់ពីថ្ងៃទីអាទិត្យទី ១២ រហូតដល់ថ្ងៃទី១៧ ខែមករាឆ្នាំ២០១៤ខាងមុខនេះ។
ប្រធានបទដែលសហជីពត្រូវលើកយកមកជម្រាបជូនលោកតំណាងពិសេសរបស់ UN គឺបញ្ហាហិង្សាសម្លាប់កម្មករកាត់ដេរ និងបញ្ហាប្រាក់ខែទាបនៅកម្ពុជា៕
No comments:
Post a Comment
yes