សហគមន៍បឹងកក់ និងភាគីពាក់ព័ន្ធផ្សេងៗទៀតដែលបានធ្វើការតវ៉ា ដើម្បីស្វែងរកយុត្តិធម៌ពីសំណាក់ស្ថាប័ន្ថហិរញ្ញវត្ថុអន្តរជាតិនានានោះ បានទទួលនូវជោគជ័យដ៏ធំមួយ ដោយសារតែសភាជាន់ទាបអាមេរិកបានអនុម័តច្បាប់មួយ ដើម្បីឲ្យមានការសើរើឡើងវិញជុំវិញ ករណីអ្នកភូមិបឹងកក់។ ច្បាប់នោះក៏បានដាក់សំពាធឲ្យថ្នាក់ដឹកនាំស្ថាប័នហិរញ្ញវត្ថុជាជនជាតិអាមេរិកទាំងអស់ ជាពិសេសធនាគារពិភពលោក ត្រូវតែធ្វើសកម្មភាពក្នុងករណីបឹងកក់នេះផងដែរ។
យោងតាមសេចក្ដីប្រកាសព័ត៌មាន របស់អង្គការសមធម៌កម្ពុជា កាលពីថ្ងៃម្សិលមិញនេះ សភាអាមេរិកបានតម្រូវឲ្យ នាយកប្រតិបត្តិជនជាតិអាមេរិក ដែលកាន់កាប់ស្ថាប័នហិរញ្ញវត្ថុអន្តរជាតិនានាត្រូវធានាថា ស្ថាប័នទាំងនោះត្រូវតែផ្ដល់សំណង និងកែសម្រួលឡើងវិញ ចំពោះបុគ្គល ឬក៏សហគមន៍ដែលរងគ្រោះដោយសារការរំលោភសិទ្ធិមនុស្ស ដែលបណ្ដាលមកពីការផ្ដល់កម្ចី ឬជំនួយរបស់ខ្លួននោះ។
សភាអាមេរិកបានកំណត់ឲ្យប្រធានធនាគារពិភពលោក ត្រូវធ្វើសកម្មភាពជាក់លាក់មួយ ដើម្បីរាយការណ៍ជាទៀតទាត់ ចំពោះដំណើរការចាប់ផ្ដើមដែលធ្វើឡើងដោយស្ថាប័ននេះ ដើម្បីផ្ដល់ឲ្យនូវការកែតម្រូវសមរម្យមួយ សម្រាប់គ្រួសារអ្នកបឹងកក់ ដែលរងទុក្ខដោយសារគម្រោងគ្រប់គ្រង និងរៀបចំដែនដី ដូចដែលមានកំណត់នៅក្នុងការងារអធិការកិច្ចរបស់ ធនាគារពិភពលោករួចមកហើយនោះ។
ក្រោយពីធ្វើការស៊ើបអង្កេតអស់រយៈពេលជាង ១១ ខែរួចមក នៅក្នុងឆ្នាំ២០១១ អ្នកឃ្លាំមើលផ្ទៃក្នុងបានរកឃើញថា ជំនួយរបស់ធនាគារពិភពលោកមានភាពអយុត្តិធម៌សម្រាប់គម្រោងផ្ដល់ប្លង់ដី ដល់គ្រួសារអ្នកបឹងកក់ ហើយធ្វើឲ្យពួកគេប្រឈមនឹងការផ្លាស់ប្ដូរទីលំនៅទៀតផង។
គួរបញ្ជាក់ថា កាលពីឆ្នាំ២០០៧ មានគ្រួសារជាង ៤ ០០០ គ្រួសារដែលរស់នៅជុំវិញបឹងកក់ បានប្រឈមមុខនឹងការបណ្ដេញចេញពីសំណាក់អាជ្ញាធររាជធានីភ្នំពេញ ដើម្បីយកតំបន់នេះទៅឲ្យក្រុមហ៊ុនឯកជនដែលត្រូវបានគេស្គាល់ថា មានទំនាក់ទំនងជិតស្និតជាមួយមន្ត្រីជាន់ខ្ពស់ ក្នុងជួររដ្ឋាភិបាលដើម្បីយកទៅធ្វើការអភិវឌ្ឍន៍ ៕
No comments:
Post a Comment
yes