តំណាងកម្មករ និង ជាប្រធានផ្នែកដេរនៃរោងចក្រ Canteran នៅតាមបណ្តោយផ្លូវវ៉េងស្រេង អះអាងថា រួបគាត់ និងកម្មករផ្សេងទៀត រងការគំរាមបាញ់សម្លាប់ពីសមត្ថកិច្ច នៅពេលដែលពួកគាត់ធ្វើកូដកម្មទាមទារឲ្យថៅកែផ្តល់ប្រាក់ឈ្នូលពាក់កណ្តាលពេលធ្វើបាតុកម្មកន្លងមក។
តំណាងកម្មករ និងជាប្រធានផ្នែកដេរ អ្នកស្រី យិន សុផា ប្រាប់ VOD ថា កាលពីយប់ថ្ងៃទី១៧ ខែមករា កម្មករប្រមាណ១០០នាក់បានតវ៉ានៅមុខរោងចក្រ ដើម្បីឲ្យថៅកែ ធ្វើសម្បទានប្រាក់៥០ភាគរយ ខណៈពេលដែលកម្មករមិនបានបំពេញការងារ ប៉ុន្តែសមត្ថកិច្ច ៥ឡាន ប្រមាណ១០០នាក់ ប្រដាប់ដោយអាវុធ បានគំរាមបាញ់សម្លាប់ ប្រសិនបើពួកគាត់នៅតែតវ៉ាមុខរោងចក្រ ។ អ្នកស្រី បន្តថា ដោយសារកម្មករភ័យខ្លាច ពួកគេក៍បានត្រឡប់ទៅផ្ទះវិញបណ្តោះអាសន្នសិន ប៉ុន្តែគាត់នឹងត្រឡប់មកតវ៉ាវិញរហូតមានដំណោះស្រាយ។ អ្នកស្រី ក៍បានស្នើឲ្យភាគីពាក់ព័ន្ធ និងតំណាងសហជីពទាំងអស់ជួយអន្តរាគមន៍ជូនពួកគាត់ផងដែរ។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា ការគំរាមកំហែងបាញ់សម្លាប់នេះ ជាករណីរំលោភសិទ្ធិមនុស្សធ្ងន់ធ្ងរទៅលើកម្មករ។ លោកថា យោធា ឬសមត្ថកិច្ច មានតូនាទីក្នុងការការពារសន្តិសុខ សុវត្ថិភាពប្រជាពលរដ្ឋ និងការពារទឹកដី មិនមែនមកគំរាមកំហែងប្រជាពលរដ្ឋនោះទេ ។ លោក ក៍បានអំពាវនាវឲ្យរដ្ឋាភិបាល បញ្ឈប់ជាបន្ទាន់ក្នុងការបង្ក្រាបកម្មករ ដោយកម្លាំងសមត្ថកិច្ចនេះ គួរតែរកដំណោះស្រាយដោយសន្តិវិធី ដើម្បីជៀសវាងបញ្ហា ចេះតែរាលដាលប៉ះពាល់ដល់សេដ្ឋកិច្ចជាតិ។
ការបាញ់បង្ក្រាបពីយោធា លើកម្មករកាលពីថ្ងៃទី២ និង ទី៣ បានបណ្តាលឲ្យកម្មករយ៉ាងហោចណាស់៥នាក់ស្លាប់ និង ប្រមាណ៤០នាក់រងរបួស។
នៅថ្ងៃទី១៩ ខែមករានេះ មជ្ឈមណ្ឌលសិទ្ធិមនុស្សកម្ពុជា ក៏បានសម្តែងការព្រួយបារម្ភ ចំពោះការប្រើកម្លាំងយោធាហួសហេតុ បង្ក្រាបលើកម្មករដែលតវ៉ាទាមទារប្រាក់ឈ្នួលនោះ ហើយទាមទារឲ្យភាគីពាក់ព័ន្ធ មានរដ្ឋាភិបាល ក្រុមហ៊ុនបញ្ជាទិញ រោងចក្រ និងសហជីព ចរចារកដំណោះស្រាយបន្ទាន់ ហើយរកវិធានការទប់ស្កាត់ហិង្សារបៀបនេះ កុំឲ្យកើតមានជាថ្មីទៀត៕
No comments:
Post a Comment
yes