គណបក្សសង្គ្រោះជាតិ(CNRP) នឹងធ្វើសន្និសីទសារព័ត៌មាន នៅរសៀលម៉ោង៤នេះ នៅទីស្នាក់ការកណ្តាលគណបក្ស ក្នុងសង្កាត់ចាក់អង្រែលើ ខណ្ឌមានជ័យ ពាក់ព័ន្ធនឹងការរំខានវេទិកាសា ធារណៈ របស់គណបក្សនេះ នៅខេត្តកំពង់ចាម ក្រោមអធិបតីភាពប្រធានស្តីទី លោក កឹម សុខា។
សន្និសីទសារព័ត៌មាននេះ ត្រូវបានប្រកាសធ្វើឡើងប៉ុន្មានម៉ោង បន្ទាប់ពីវេទិកាសំណេះសំណាលជាមួយ អ្នកគាំទ្ររបស់គណបក្សសង្គ្រោះជាតិ នៅទីក្រុងកំពង់ចាម ខេត្តកំពង់ចាម ត្រូវបានប្រកាសរំសាយ ខណៈដែលសមត្ថកិច្ចក្រោមការដឹកនាំរបស់គណបក្សប្រជាជនកម្ពុជា បានចល័តកង កម្លាំងប្រដាប់អាវុធ និងកៀងគរប្រជាពលរដ្ឋនៅទីក្រុងកំពង់ចាម ដើម្បីបង្កចលាចល និងបំភិត បំភ័យប្រជាពលរដ្ឋផ្សេងទៀត ដែលចង់ចូលរួមវេទិកាសំណេះសំណាលក្រោមអធិបតីភាព លោក កឹម សុខា។
នេះជាលើកទីពីរហើយ ដែលមានការរំខានទៅលើវេទិកាសំណេះសំណាលរបស់គណបក្សសង្គ្រោះជាតិ។ កាលថ្ងៃទី២១ ខែមករានេះ គណបក្សសង្គ្រោះជាតិ ក៏បានប្រកាសលុបចោលភ្លាមៗផងដែរ ចំពោះគម្រោងជួបសំណេះសំណាលជាមួយពលរដ្ឋ ស្ថិតនៅឃុំត្រើយស្លា ស្រុកស្អាង ខេត្តកណ្តាល ខណៈសមត្ថកិច្ចរាប់រយនាក់ ត្រៀមដាក់រារាំង ការជួបសំណេះសំណាលនោះ។
ក្រោយការប្រកាសលុបចោលវេទិកានៅព្រឹកនេះ លោក ញ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានឲ្យដឹងតាមព័ត៌មានដែលលោកទទួល គឺមានរថយន្តរបស់កងទ័ពនៅខេត្តកំពង់ចាមនោះ បានបរយ៉ាងលឿន ដេញពីក្រោយរថយន្តរបស់ លោក កឹម សុខា ដែលលោកសង្ស័យថា មានការប៉ុនប៉ងក្នុងរូបភាពអាក្រក់ណាមួយ ទៅលើប្រធានស្តីទីគណបក្សសង្គ្រោះជាតិរូបនេះ ដែលអាចធ្វើឲ្យមានបញ្ហាគ្រោះថ្នាក់ ប្រសិនបើមិនមានវិធានការទប់ស្កាត់ជាមុននោះ៕
No comments:
Post a Comment
yes