ស្ថានទូតវៀតណាម ប្រចាំកម្ពុជា
មន្ត្រីស្ថានទូតនៃសាធារណរដ្ឋសង្គមនិយមវៀតណាម ប្រចាំកម្ពុជា បានប្រតិកម្មទៅនឹងការព្រួតគ្នាវាយសម្លាប់ពលរដ្ឋជនជាតិវៀតណាម ម្នាក់ ក្នុងករណីគ្រោះថ្នាក់ចរាចរណ៍មួយ កាលពីរាត្រីថ្ងៃទី១៥ កុម្ភៈ និងបានអំពាវនាវអោយអាជ្ញាធរពាក់ព័ន្ធបើកការស៊ើបអង្កេតចំពោះករណីនេះ ព្រមទាំងស្នើឲ្យមានវិធានការជាក់ស្តែង ដើម្បីទប់ស្កាត់កុំឲ្យបញ្ហានេះកើតឡើងនៅថ្ងៃខាងមុខ។
អ្នកនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាំងថុង (Tran Vang Thong) នៅថ្ងៃទី១៨ កុម្ភៈ បានថ្លែងថ្កោលទោសចំពោះអ្នកដែលលោកហៅថា បានញុះញង់ និងអ្នកដែលចូលរួមព្រួតគ្នាប្រើអំពើហិង្សាដែលបានបណ្ដាលឲ្យជនជាតិវៀតណាម ម្នាក់ដែលកើតនៅក្នុងប្រទេសកម្ពុជា ឈ្មោះ ង្វៀន យ៉ាងង៉ុក បាត់បង់ជីវិតនៅចំណុចលើកំណាត់ផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ ក្រុងភ្នំពេញ។ តែទោះជាយ៉ាងណាក៏ដោយ មន្ត្រីរូបនេះមិនទាន់ហ៊ានចោទប្រកាន់ចំៗថា ការប្រើអំពើហិង្សានេះកើតឡើងដោយសារការរើសអើងជាតិសាសន៍ ឬក៏យ៉ាងណានោះទេ ហើយបានស្នើឲ្យអាជ្ញាធរស៊ើបអង្កេតចំពោះបញ្ហានេះ។
លោក ត្រឹង វ៉ាំងថុង៖ «អាហ្នឹងតាមព័ត៌មានដែលខ្ញុំទទួលបាននោះ គឺមន្ត្រីនគរបាលរបស់ខណ្ឌមានជ័យ ហើយនិងសាលាខណ្ឌហ្នឹង គាត់ក៏មានប្រសាសន៍ហ្នឹង គឺដូចថា មានម្នាក់ហ្នឹងគាត់និយាយ គាត់ប្រើពាក្យពេចន៍ពាក់ព័ន្ធទៅនឹងដើមកំណើតរបស់យុវជនហ្នឹង ឬមានអត្ថន័យជាការប្រកាន់ពូជសាសន៍ គឺជាការរើសអើងជាតិសាសន៍ហ្នឹង បាននាំមកនូវការអ្នកមួយចំនួនហ្នឹង មួយក្រុមហ្នឹង គឺថាត្រូវញុះញង់អុចអាលហ្នឹង គាត់ក៏បានព្រួតគ្នាវាយ ឈានដល់ការស្លាប់នៅកន្លែងហ្នឹង»។
នៅក្នុងហេតុការណ៍នេះ បុរសជនជាតិខ្មែរម្នាក់ឈ្មោះ វ៉ុន ចាន់វុត្ថា ដែលអាជ្ញាធរសង្ស័យថា ជាអ្នកប្រើពាក្យថាញុះញង់ពូជសាសន៍ ត្រូវបានចាប់ខ្លួន ដើម្បីស៊ើបអង្កេតករណីនេះ។
នៅក្នុងសេចក្តីថ្លែងការណ៍របស់ខ្លួន កាលពីថ្ងៃទី១៧ កុម្ភៈ គណបក្សសង្គ្រោះជាតិ បានប្រកាសថ្កោលទោសចំពោះការប្រើហិង្សាសម្លាប់មនុស្សក្រៅប្រព័ន្ធច្បាប់តាមគ្រប់រូបភាព ហើយថា វប្បធម៌ហិង្សានេះកំពុងកើតឡើងស្ទើរគ្រប់ទីកន្លែងក្នុងប្រទេសកម្ពុជា។ គណបក្សប្រឆាំងមួយនេះក៏បានអំពាវនាវឲ្យប្រជាពលរដ្ឋខ្មែរទាំងអស់ ចេះអត់ឱនអធ្យាស្រ័យឲ្យគ្នាទៅវិញទៅមក ហើយសម្ដែងការគោរពចំពោះអាយុជីវិត និងសេចក្តីថ្លៃថ្នូរដល់ជនគ្រប់រូប ដោយមិនប្រកាន់ជាតិសាសន៍ ដើមកំណើត ទោះជាខ្មែរក្តី បរទេសក្តី សាសនា ឬនិន្នាការនយោបាយអ្វីឡើយ។
No comments:
Post a Comment
yes