មេដឹកនាំសហជីពធំៗ និងសមាគមចំនួន១៦ ដែលគ្រោងនឹងធ្វើកូដកម្មទូទាំងប្រទេស ដើម្បីទាមទារដំឡើងប្រាក់ខែគោល១៦០ដុល្លារ និងទាមទារឲ្យដោះលែងអ្នកជាប់ឃុំទាំង២១នាក់ នៅពន្ធនាគារត្រពាំងផ្លុង ខេត្តកំពង់ចាម សង្ឃឹមយ៉ាងមុតមាំថា នឹងមានកម្មករចូលរួមធ្វើកូដកម្មនាពេលខាងមុខនេះច្រើនម៉ឺននាក់។
សហជីពធំៗ និងសមាគមចំនួន១៦ នឹងចាប់ផ្តើមចែកខិត្តប័ណ្ណពីថ្ងៃទី១៩ ខែកុម្ភៈ ដល់កម្មករ-កម្មការិនី ឲ្យចូលរួមធ្វើកូដកម្មទូទាំងប្រទេស ដើម្បីទាមទារដំឡើងប្រាក់ខែគោល និងទាមទារឲ្យដោះលែងអ្នកជាប់ទាំង២១នាក់ ។
ក្នុងខិត្តប័ណ្ណដែលសហជីពគ្រោងចែកនោះ មានបំណងទាមទារឲ្យរដ្ឋាភិបាល និងនិយោជកដោះស្រាយបញ្ហាចំនួន៧ចំណុច រួមមាន ១.សុំឲ្យដោះលែងជនជាប់ចោទទាំង២១នាក់ និងទម្លាក់ចោលរាល់ការចោទប្រកាន់ទាំងអស់លើអ្នកទាំង២៣នាក់ ២.សុំឲ្យមានការចរចាឡើងវិញលើប្រាក់ឈ្នួលគោល១៦០ដុល្លារក្នុងមួយខែ ៣.ត្រូវដាក់ទោសដល់ជនល្មើសដែលបានប្រើហិង្សានិងសម្លាប់កម្មករ ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានបាត់បង់ជីវិត រងរបួស និងជាប់ឃុំឃាំង ៤.រដ្ឋាភិបាលត្រូវដកបម្រាមនៃការជួបជុំជាសាធារណៈរបស់ប្រជាពលរដ្ឋ ចេញវិញ និងលុបចោលការព្យួរការចុះបញ្ជីការអង្គការវិជ្ជាជីវៈពីក្រសួងការងារ ៥.តំណាងក្រុមហ៊ុនទាំងអស់ត្រូវដកបណ្តឹងដែលប្រឆាំងសហជីព និងកម្មករនិយោជិត ៦.សុំឲ្យទទួលយកកម្មករដែលត្រូវបញ្ឈប់ពីការងារឲ្យចូលធ្វើការវិញ ព្រមទាំងផ្តល់ប្រាក់រម្លឹក និងអត្ថប្រយោជន៍ផ្សេងៗ និងចំនុចទី៧ ត្រូវទូទាត់ប្រាក់ឈ្នួល និងប្រាក់រង្វាន់ទៀងទាត់ជូនដល់កម្មករ ដែលនិយោជកបានកាត់ ក្នុងអំឡុងពេលធ្វើកូដកម្ម។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា បាតុកម្មដែលសហជីពគ្រោងនឹងធ្វើនៅពេលខាងមុខនេះ នឹងមានកម្មករ-កម្មការិនីយ៉ាងតិច ២០ម៉ឺននាក់ចូលរួម ព្រោះកិច្ចការទាំងនេះ គឺផ្តល់ផលប្រយោជន៍ទៅដល់ពួកគេច្រើន ជាពិសេសទាមទារឲ្យដំឡើងប្រាក់ឈ្នួលគោលដល់១៦០ដុល្លារ ដើម្បីទ្រទ្រង់ជីវភាពរស់នៅបានល្អជាងមុន។ លោក រ៉ុង ឈុន បន្តថា ប្រសិនបើមានអាជ្ញាធរណាមួយចេញមុខមករារាំងការចែកខិត្តប័ណ្ណនោះ ក៏សហជីពមិនរាថយ ព្រោះរឿងនេះមិនទាក់ទងនឹងរឿងនយោបាយនោះទេ «ខ្ញុំគិតថា ជាផលប្រយោជន៍ពួកគាត់ កម្មករ កម្មការិនី នឹងចូលរួមច្រើនហើយ ព្រោះជាប្រយោជន៍ផ្ទាល់ មិនមែនប្រយោជន៍របស់អ្នកណាទេ អញ្ចឹងសូមឲ្យកម្មករ កម្មការិនីទាំងអស់ហ្នឹង កុំមើលបំណាំគ្នា ត្រូវតែចូលរួមសហការគ្នា ទាំងអស់គ្នា ឲ្យបានសស្រាកសស្រាំ នេះហើយដែលយើងទទួលបានដំណោះស្រាយ ហើយប្រសិនយើងធ្វើហើយ មើលបំណាំគ្នា នោះវាមិនបានជោគជ័យទេ»។
ប្រធានសហព័ន្ធសហជីពជាតិ នៃឧស្សាហកម្មវាយណភ័ណ្ឌកាត់ដេរកម្ពុជា លោកស្រី ម៉ម ញឹម មានប្រសាសន៍ថា ស្របពេលដែលរដ្ឋាភិបាលកម្ពុជា នៅតែមិនព្រមដំឡើងប្រាក់ឈ្នួលកម្មករដល់១៦០ដុល្លារ ពួកគេបាននិយាយដូចៗគ្នា គឺមិនពេញចិត្តនឹងប្រាក់ឈ្នួលប៉ុណ្ណឹងនោះទេ មិនតែប៉ុណ្ណោះរដ្ឋាភិបាលបានបំបិទសិទ្ធិបញ្ចេញមតិ ប្រជាពលរដ្ឋ។ អ្នកស្រីបន្តថា នៅពេលដែលអ្នកស្រីទៅជួបជាមួយកម្មករ ពួកគេតែងតែទទូចឲ្យសហជីពដឹកនាំធ្វើកូដកម្ម ទ្រង់ទ្រាយធំ ។
ប្រធានសហភាពការងារកម្ពុជាលោក អាត់ ធន់ មានប្រសាសន៍ថា ប្រសិនបើការធ្វើកូដកម្មនេះនៅតែមិនទាន់មានដំណោះស្រាយ សហព័ន្ធសហជីព សមាគម និងកម្មករនិយោជិតគ្រប់វិស័យ ព្រមានធ្វើកូដកម្មទ្រង់ទ្រាយធំនៅទូទាំងប្រទេស ចាប់ពីថ្ងៃទី១២ដល់ថ្ងៃទី១៥ ខែមីនា ដោយកម្មករនិយោជិត និងមន្ត្រីរាជការ នឹងធ្វើកូដកម្មមិនទៅធ្វើការ។ ហើយនៅថ្ងៃទី១៦ដល់ថ្ងៃទី១៩ ខែមីនា កម្មករនិយោជិតនឹងទៅកន្លែងធ្វើការ តែមិនបំពេញការងារ៕
No comments:
Post a Comment
yes