ថ្នាក់ដឹកនាំសហព័ន្ធសហជីព និងសមាគមចំនួន១៦ នៅថ្ងៃសុក្រនេះ ចាប់ផ្ដើមយុទ្ធនាការរយៈពេលមួយសប្តាហ៍ ចែកខិតប័ណ្ណដល់កម្មករ-កម្មការិនី នៅតាមបណ្តារោងចក្រនានា ដើម្បីចូលរួមធ្វើកូដកម្មទូទាំងប្រទេស ទាមទារដំឡើងប្រាក់ឈ្នួលគោល ១៦០ដុល្លារ និងទាមទារឲ្យដោះលែងអ្នកជាប់ឃុំទាំង២១នាក់។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា សហព័ន្ធសហជីព និងសមាគមទាំង១៦ បានចាប់ផ្តើមចែកខិតប័ណ្ណចំនួន ២០ម៉ឺនសន្លឹក តាមរយៈក្រុមសមាជិករបស់សហជីពរៀងៗខ្លួន ដែលធ្វើការក្នុងរោងចក្រនោះផ្ទាល់ ពុំមែនបែងចែកជាក្រុម ដើរចែកតាមរោងចក្រនោះទេ។ លោកបន្តថា យុទ្ធនាការនេះ នឹងធ្វើរយៈពេលមួយសប្តាហ៍ ដើម្បីអំពាវនាវដល់កម្មករទូទាំងប្រទេស ចូលរួមធ្វើកូដកម្ម ទាមទារដំឡើងប្រាក់ឈ្នួលគោល ១៦០ដុល្លារ និងទាមទារឲ្យដោះលែងអ្នកជាប់ឃុំទាំង២១នាក់ «ច្រកមួយៗយើងសុទ្ធតែមានសកម្មជន មានប្រធានសហជីពនៅតាមរោងចក្រ យើងមិនមែនដើរចែកទៅជាក្រុម ជាពួកទាំងហ្វូងឯណា យើងមានក្រុមគោលដៅយើង»។
ជាមួយគ្នានេះដែរ ប្រធានសហភាពការងារកម្ពុជា លោក អាត់ ធន់ ឲ្យដឹងថា ការចែកខិតប័ណ្ណ នៅថ្ងៃនេះ គឺធ្វើឡើងតិចតួចប៉ុណ្ណោះ ប៉ុន្តែចាប់ពីថ្ងៃសៅរ៍ស្អែកនេះ នឹងមានការចែកខិតប័ណ្ណក្នុងទ្រង់ទ្រាយធំ។
បើតាមលោក អាត់ ធន់ និងលោក រ៉ុង ឈុន រហូតមកដល់រសៀលថ្ងៃសុក្រនេះ នៅពុំទាន់មានសេចក្តីរាយការណ៍ណាមួយ ពីការរារាំង ឬគំរាមគំហែងដល់សមាជិកសហព័ន្ធសហជីព ដែលចែកខិតប័ណ្ណនេះនៅឡើយទេ។
ទាក់ទងនឹងបញ្ហានេះ អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងពុំមានវិធានការអ្វី ដើម្បីទាប់ស្កាត់ ឬហាមឃាត់ការចែកខិតប័ណ្ណនេះទេ ហើយចំណាត់ការរបស់អាជ្ញាធរ ទៅលើការធ្វើកូដកម្មរបស់កម្មករ ក៏លោកពុំបានបញ្ជាក់ដែរ។ ប៉ុន្តែ លោកថា ការធ្វើកូដកម្មទាមទារដំឡើងប្រាក់ខែគោល១៦០ដុល្លារ ប្រហែលជាមិនអាចទៅរួចទេ ហើយអាចប្រឈមនឹងថៅកែរោងចក្របិទទ្វារទៀត «អ្នកធ្វើកូដកម្មក៏ខាត ថៅកែគេអត់ខាតទេ គេគ្រាន់បិទរោងចក្រ គេមិនពិបាកអីទេ»។
កាលពីថ្ងៃទី១៩ ខែកុម្ភៈ ប្រធានសមាគមរោងចក្រកាត់ដេរកម្ពុជា (GMAC) លោកវ៉ាន់ ស៊ូអៀង បានព្រមានថា រោងចក្រប្រមាណ ៨០ភាគរយ អាចនឹងត្រូវបិទទ្វារនៅពេលខាងមុខនេះ ហើយរោងចក្រ មួយចំនួន អាចនឹងត្រូវរត់ទៅកាន់ប្រទេសផ្សេងវិញ ប្រសិនបើក្រុមសហជីពទាំងនោះ នៅតែបន្តដឹកនាំកម្មករ ទាមទារដំឡើងប្រាក់ឈ្នួលទៀតនោះ។
នៅក្នុងខិតប័ណ្ណដែលសហជីពចែកនោះ មានបំណងទាមទារឲ្យរដ្ឋាភិបាល និងនិយោជកដោះស្រាយបញ្ហាចំនួន ៧ចំណុច រួមមាន ១.សុំឲ្យដោះលែងជនជាប់ចោទទាំង២១នាក់ និងទម្លាក់ចោលរាល់ការចោទប្រកាន់ទាំងអស់លើអ្នកទាំង២៣នាក់ ២.សុំឲ្យមានការចរចាឡើងវិញលើប្រាក់ឈ្នួលគោល១៦០ដុល្លារក្នុងមួយខែ ៣.ត្រូវដាក់ទោសដល់ជនល្មើសដែលបានប្រើហិង្សានិងសម្លាប់កម្មករ ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានបាត់បង់ជីវិត រងរបួស និងជាប់ឃុំឃាំង ៤.រដ្ឋាភិបាលត្រូវដក បម្រាមនៃការជួបជុំជាសាធារណៈរបស់ប្រជាពលរដ្ឋ ចេញវិញ និងលុបចោលការព្យួរ ការចុះបញ្ជីការអង្គការវិជ្ជាជីវៈពីក្រសួងការងារ ៥.តំណាងក្រុមហ៊ុនទាំងអស់ត្រូវដកបណ្តឹងដែលប្រឆាំងសហជីព និងកម្មករនិយោជិត ៦.សុំឲ្យទទួលយកកម្មករដែលត្រូវបញ្ឈប់ពីការងារឲ្យចូលធ្វើការវិញ ព្រមទាំងផ្តល់ប្រាក់រម្លឹក និងអត្ថប្រយោជន៍ផ្សេងៗ និងចំណុចទី៧ ត្រូវទូទាត់ប្រាក់ឈ្នួល និងប្រាក់រង្វាន់ទៀងទាត់ជូនដល់កម្មករ ដែលនិយោជកបានកាត់ ក្នុងអំឡុងពេលធ្វើកូដកម្ម៕
No comments:
Post a Comment
yes