មន្ត្រីជាន់ខ្ពស់គណបក្សប្រជាជនកម្ពុជា ឲ្យដឹងនៅថ្ងៃសុក្រនេះថា គណបក្សកាន់អំណាចមួយនេះ ត្រៀមដាក់សមាសភាពបន្ថែមទៀត ក្នុងគណៈកម្មការចម្រុះឲ្យស្មើគ្នានឹងគណបក្សសង្គ្រោះជាតិ សម្រាប់កែទម្រង់ការបោះឆ្នោតថ្នាក់ជាតិ នាពេលខាងមុខ។
ការចរចា កាលពីថ្ងៃទី១៨ ខែកុម្ភៈ ឆ្នាំ២០១៤ នៅព្រឹទ្ធសភា សមាសភាពគណបក្សប្រជាជនកម្ពុជា រួមមាន លោក ព្រុំ សុខា លោក សក់ សេដ្ឋា និងលោក កើត រិទ្ធ។ ចំណែកសមាសភាពរបស់គណបក្សសង្គ្រោះជាតិ រួមមាន លោក សុន ឆ័យ លោក យ៉ែម បុញ្ញឫទ្ធិ និងលោកគួយ ប៊ុនរឿន។
មន្ត្រីជាន់ខ្ពស់គណបក្សប្រជាជនកម្ពុជា លោក ជាម យៀប ឲ្យវីអូឌីដឹងថា ប្រសិនបើគណបក្សប្រឆាំងមានបំណងចង់បញ្ចប់ជម្លោះនយោបាយនៅកម្ពុជា គណបក្សកាន់អំណាចមួយនេះ ត្រៀមខ្លួនជាស្រេច ដើម្បីឆ្លើយតបទៅកាន់គណបក្សប្រឆាំង ចំពោះការដាក់សមាសភាពបន្ថែមទៀត ក្នុងគណៈកម្មការចម្រុះ សម្រាប់កែទម្រង់ការបោះឆ្នោត។ លោកបញ្ជាក់ថា គណបក្សប្រជាជនកម្ពុជា ចង់ដោះស្រាយបញ្ហា នយោបាយនៅក្នុងប្រទេស ដើម្បីបង្រួបបង្រួមជាតិ ជូនប្រជាពលរដ្ឋឲ្យបានឆាប់។
ឆ្លើយតបនឹងករណីនេះ មន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ មានប្រសាសន៍ថា លោកបានផ្តល់ព័ត៌មានទៅគណបក្សប្រជាជនកម្ពុជារួចហើយ នៅថ្ងៃសុក្រនេះ ទាក់ទឹងនឹងដាក់សមាសភាពក្នុងគណៈកម្មការចម្រុះនោះ។ ទោះជាយ៉ាងណា លោកមិនបានបញ្ជាក់ពីចំនួនសមាសភាពអ្នកចូលរួមប្រជុំ ប៉ុន្មាននាក់នៅឡើយ។ តែលោកថា យ៉ាងយូរនៅសប្តាហ៍ក្រោយ នឹងមានការជួបចចារបន្តទៀត។
ក្រោយជំនួបចរចា អស់ពេលជាងពីរម៉ោងកន្លះ កាលពីថ្ងៃទី១៨ ខែកុម្ភៈ ឆ្នាំ២០១៤ នៅវិមានព្រឹទ្ធសភា ប្រធានក្រុមការងារគណបក្សសង្គ្រោះជាតិ ដឹកនាំដោយ លោក សុន ឆ័យ និងប្រធានក្រុមការងារគណបក្សប្រជាជនកម្ពុជា ដឹកនាំដោយ លោក ព្រុំ សុខា បានសម្រេចគ្នាជាឯកច្ឆន្ទ ដោយយល់ព្រម រៀបចំយន្តការកែទម្រង់ការបោះឆ្នោត និងបង្កើតគណៈកម្មការចម្រុះ ដែលមានសមាសភាពស្មើគ្នា មកពីគណបក្សមានអាសនៈក្នុងសភា នឹងរៀបចំឲ្យមានសិក្ខាសាលាថ្នាក់ជាតិ ដើម្បីបើកទូលាយឲ្យមានការចូលរួមយោបល់ និងអនុសាសន៍ ពីប្រជាពលរដ្ឋ មជ្ឈដ្ឋានជាតិ និងអន្តរជាតិ ព្រមទាំងដៃគូរអភិវឌ្ឍន៍ ជុំវិញការកែលម្អការងារបោះឆ្នោត ដើម្បីឈានទៅរកការបោះឆ្នោតមួយ ដែលមានភាពសេរី និងយុត្តិធម៌៕
No comments:
Post a Comment
yes