លោកហ៊ុន សែន នៅក្នុងពិធីមួយកាលពីខែមុន
រូបថត ហេង ជីវ័ន
ក្រុមយុវជនដែលមានសម្ព័ន្ធជាមួយនឹងគណបក្សប្រឆាំង បានដាក់ពាក្យបណ្តឹងទៅសាលាដំបូងរាជធានី ប្រឆាំងនឹងលោកនាយករដ្ឋមន្រ្តី ហ៊ុន សែន ដោយចោទប្រកាន់ថា មេដឹកនាំប្រទេសយូរអង្វែងរូបនេះ បានប្រគល់កោះ ត្រល់ និងកោះ ក្រចកសេះ ទៅឲ្យ វៀតណាម កាលពីក្នុងអំឡុងទស្សវត្សរ៍ ទី៨០។
ពាក្យបណ្តឹងដែលដាក់ទៅសាលាដំបូងរាជធានី កាលពីម្សិលមិញ ដោយលោក នាង សុខុម អាយុ ២៥ឆ្នាំ ជាប្រធានសហព័ន្ធយុវជនខ្មែរស្នេហាជាតិ ផ្អែកលើផែនទីឯកសារដទៃទៀត និងមាត្រា ២ មាត្រា ៥៥ នៃរដ្ឋធម្មនុញ្ញ មាត្រា ១ និង ៤ នៃសន្ធិសញ្ញា និងមាត្រា ៤៤០ នៃក្រមព្រហ្មទណ្ឌកម្ពុជា។ ពាក្យបណ្តឹងក៏បានអះអាងថា កម្ពុជាឥឡូវនេះ បានបាត់បង់បូរណភាពទឹកដី រាប់ទាំងកោះ ត្រល់ កោះ ក្រចកសេះ និងតំបន់សមុទ្រដទៃទៀត។
នៅពេលដើរចេញពីតុលាការកាលពីម្សិលមិញ លោក នាង សុខុម បានប្រាប់អ្នកយកព័ត៌មានថា មន្រ្តីតុលាការបានសម្តែងការភ័យខ្លាច ពេលពួកគេបានមើលឃើញពាក្យបណ្តឹងប្តឹងលោកនាយករដ្ឋមន្រ្តីដោយបន្ថែមថា អ្នកទទួលពាក្យបណ្តឹង មិនបានប្រាប់ឈ្មោះលោកទេ ពេលលោកសួរឈ្មោះ ប៉ុន្តែថា មន្រ្តីនោះ បានសន្យាទូរស័ព្ទប្រាប់លោក ប្រសិនបើពាក្យបណ្តឹងដំណើរការ។
លោក នាង សុខុម បន្តថា៖ «ខ្ញុំមានភ័ស្តុតាងគ្រប់គ្រាន់ ដើម្បីដាក់បន្ទុកចោទប្រកាន់លោក ហ៊ុន សែន ដែលហ៊ានប្រព្រឹត្តខុសច្បាប់ធ្ងន់ធ្ងរ។ ខ្ញុំមានឯកសារមួយចំនួនដែលលោក ហ៊ុន សែន ចុះហត្ថលេខាជាមួយនឹងនាយករដ្ឋមន្ត្រី [វៀតណាម] ក្នុងឆ្នាំ ១៩៨២»។
លោក នាង សុខុម បានអះអាងថា ពាក្យបណ្តឹងរបស់លោក បានធ្វើឡើងដោយក្រុមយុវជនខ្មែរជាច្រើន ប៉ុន្តែ យុវជនដទៃទៀតមិនបញ្ចេញឈ្មោះទេ ប៉ុន្តែ គេបានលើកទឹកចិត្ត និងគាំទ្រលោកឲ្យដាក់ពាក្យប្តឹងប្រឆាំងលោក ហ៊ុន សែន។
លោក នាង សុខុម ក៏បានព្រមានដែរថា ប្រសិនបើតុលាការមិនចាត់ការលើពាក្យបណ្តឹងរបស់លោក លោកនឹងដឹកនាំយុវជនខ្មែរ ធ្វើមហាបាតុកម្មប្រឆាំងតុលាការ។
ប៉ុន្តែ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានហៅពាក្យបណ្តឹងនេះថា ជាពាក្យបណ្តឹងគ្មានន័យ ប៉ុន្តែលោកបានបញ្ជាក់ថា ក្រុមយុវជនដាក់ពាក្យបណ្តឹងទៅតុលាការប្រឆាំងនឹងលោក ហ៊ុន សែន គឺជាសិទិ្ធរបស់ពលរដ្ឋដែលធានាដោយច្បាប់។
លោក ផៃ ស៊ីផាន បន្តថា៖ «រាជរដ្ឋាភិបាល បានធ្វើតាមការកំណត់របស់ច្បាប់ និងអ្វីគ្រប់យ៉ាង ដែលជាកិច្ចការទាក់ទងនឹងច្បាប់អន្តរជាតិ និងសន្ធិសញ្ញាអន្តរជាតិ»។ លោកបានបន្ថែមថា រដ្ឋាភិបាលមិនមានផែនការប្តឹងតបលោក នាង សុខុម ទេទុកឲ្យតុលាការជាអ្នកសម្រេច។
ព្រះអង្គ ម្ចាស់ ស៊ីសុវត្ថិ ធម្មិកោ អតីតលេខាផ្ទាល់របស់សម្តេចឪ នរោត្តម សីហនុ ដែលធ្លាប់បានលើកឡើងអំពីបញ្ហាព្រំដែន និងកោះរវាង កម្ពុជា និង វៀតណាម បានមានបន្ទូលថា ការដាក់ពាក្យប្តឹងលោក ហ៊ុន សែន មិនអាចធ្វើទៅបានទេ។
ព្រះអង្គបន្តថា៖ «ប៉ុន្តែយើងមានលទ្ធភាពតែមួយគត់ ដើម្បីដោះស្រាយបញ្ហាកោះ ត្រល់ និងកោះ ក្រចកសេះ គឺទុកឲ្យសភាអនុម័តច្បាប់លុបចោលសន្ធិសញ្ញា ដែលចុះហត្ថលេខាពីឆ្នាំ ១៩៧៩ រហូតដល់ឆ្នាំ ១៩៨៩ ដែលយើងអាចទាមទារកោះ ត្រល់ និងកោះ ក្រចកសេះ មកវិញ»។
លោក ប្រាក់ សាវុធ នាយកក្រឡាបញ្ជី បានប្រាប់ ភ្នំពេញ ប៉ុស្តិ៍ កាលពីម្សិលមិញថា ពាក្យបណ្តឹងរបស់លោក នាង សុខុម បានចុះក្នុងសៀវភៅហើយ ហើយប៉ុន្មានថ្ងៃទៀត ពាក្យបណ្តឹងនឹងត្រូវបញ្ជូនទៅព្រះរាជអាជ្ញាដើម្បីពិនិត្យ។ ប៉ុន្តែ លោកបានថ្លែងថា លោកមិនដឹងទេថា តើព្រះរាជអាជ្ញាណាដែលត្រូវចាត់ឲ្យពិនិត្យលើរឿងក្តីនេះ៕
No comments:
Post a Comment
yes