៨-មេសា-២០១២៖ លោក រ៉ុង ឈុន ប្រធានសហភាពសហជីពកម្ពុជា
និងជាប្រធានសមាគមគ្រូបង្រៀនកម្ពុជាឯករាជ្យ ផ្ដល់បទសម្ភាសន៍
នៅការិយាល័យរបស់លោក
សហភាពសហជីពចំនួន១១ គ្រោងហែញត្តិនៅថ្ងៃទី១០ ខែកុម្ភៈ ដាក់តាមស្ថាប័នពាក់ព័ន្ធឲ្យដោះស្រាយលើបញ្ហាចំនួន ៧ចំណុច ដែលក្នុងនោះរួមមាន ការដំឡើងប្រាក់ឈ្នួលឲ្យកម្មករ ការទទួលខុសត្រូវចំពោះមនុស្សស្លាប់ និងរបួស ក្នុងពេលកងកម្លាំងអាជ្ញាធរបង្ក្រាបបាតុកម្ម និងដោះលែងមនុស្សចំនួន ២៣នាក់ ដែលកំពុងជាប់ឃុំឲ្យមានសេរីភាពវិញ។
ប្រធានសហភាពសហជីពកម្ពុជា លោក រ៉ុង ឈុន ថ្លែងថ្ងៃទី៦ កុម្ភៈ ថា សហជីពចំនួន១១ បានជួបជុំគ្នារកឃើញបញ្ហាចម្បងចំនួន ៧ចំណុច ដែលរដ្ឋាភិបាលត្រូវតែដោះស្រាយជាបន្ទាន់។ លោកថា ការធ្វើនេះ គឺស្របពេលដែលសហជីពអន្តរជាតិ គ្រោងនឹងធ្វើការជួបជុំនៅតាមស្ថានទូតខ្មែរ ទាមទារឲ្យមានការដោះលែងសកម្មជនដីធ្លី សកម្មជនសិទ្ធិមនុស្ស និងកម្មករ ទាំង ២៣នាក់ នៅថ្ងៃទី១០ ខែកុម្ភៈ។
លោក រ៉ុង ឈុន បន្តទៀតថា ក្នុងចំណោមចំណុចទាំង៧ សហជីពក៏បានទាមទារឲ្យមានការដកបម្រាមដែលហាមដោយក្រសួងមហាផ្ទៃ និងសាលារាជធានី ដែលមិនឲ្យជួបប្រជុំ ទម្លាក់បណ្ដឹងមេដឹកនាំសហជីព បណ្ដារោងចក្រទាំងអស់ត្រូវតែទទួលយកកម្មករ និងសហជីពដែលរោងចក្របានបញ្ឈប់កន្លងមក ឲ្យចូលធ្វើការងារវិញ និងកុំឲ្យកាត់លុយកម្មករក្នុងកំឡុងពេលធ្វើមហាកូដកម្មក្នុងពេលកន្លងមក។
លោក រ៉ុង ឈុន បញ្ជាក់ថា គម្រោងនៃការជួបជុំធ្វើកូដកម្មនៅតែមាន បន្ទាប់ពីស្ដាប់លទ្ធផលនៃសវនាការសាលាឧទ្ធរណ៍ កាត់ក្ដីលើសំណុំរឿងសុំនៅក្រៅឃុំបណ្ដោះអាសន្នរបស់ជនសង្ស័យ ២៣រូប ដែលគ្រោងនឹងបើកសវនាការនៅថ្ងៃទី១១ កុម្ភៈ៕
No comments:
Post a Comment
yes