.jpg)
ពលរដ្ឋមានបញ្ហាដីធ្លី ក្រុមសង្គមស៊ីវិល តវ៉ាខាងមុខតុលាការកំពូលទាមទារឲ្យដោះលែងមនុស្ស ២១នាក់ជាប់ឃុំនៅគុកត្រពាំងផ្លុង នៅព្រឹកថ្ងៃ២៥ កុម្ភៈ ឆ្នាំ២០១៤
ពលរដ្ឋមកពីសហគមន៍មានបញ្ហាដីធ្លី ព្រះសង្ឃ សមាជិកសមាគមអ្នកប្រជាធិបតេយ្យ និងមន្ត្រីអង្គការសមាគមមួយចំនួន សរុបប្រមាណ ១០០នាក់ ហែក្បួនជុំវិញតុលាការកំពូល នៅថ្ងៃទី២៥ កុម្ភៈ និងបានដាក់ញត្តិស្នើសុំស្ថាប័ននេះ អោយឆាប់បើកសវនាការសំណុំរឿងសកម្មជនសិទ្ធិមនុស្ស និងកម្មករចំនួន ២១នាក់ ដែលស្នើសុំនៅក្រៅឃុំ។
ស្របពេលនៃការតវ៉ានោះ ប្រធានគណបក្សសង្គ្រោះជាតិ គឺលោក សម រង្ស៊ី បានថ្លែងនៅខាងមុខតុលាការកំពូលនោះថា គណបក្សនេះប្រកាន់ជំហរការពារសិទ្ធិកម្មករ និងអ្នកការពារសិទ្ធិមនុស្ស និងទាមទារអោយដោះលែងអ្នកជាប់ឃុំទាំងនោះ។
ក្រុមអ្នកហែក្បួន ដែលក្នុងដៃកាន់ផ្កាឈូក រូបថត លោក វន់ ពៅ លោក ថេង សាវឿន និងលោក ច័ន្ទ ពុទ្ធិសក្តិ រួមនឹងបដាមួយចំនួន បានស្រែកប្រកូកប្រកាសលាន់ឮកងរំពងនៅតាមផ្លូវ ព័ទ្ធជុំវិញតំបន់ដែលតុលាការកំពូលតាំងនៅ។ ចំណុចសំខាន់ គឺពួកគេចង់បានយុត្តិធម៌ពីតុលាការកំពូល៖«យុត្តិធម៌ ២១នាក់! ដោះលែង ២១នាក់! ដោះលែង ២១នាក់! សេរីភាព ២១នាក់! ដោះលែងវីរកម្មករ ២១នាក់»។
បន្ទាប់ពីហែក្បួនបាន ៣ជុំ តំណាងអ្នកតវ៉ា ៤រូប បានចូលយកញត្តិទៅជូនមន្ត្រីនៃតុលាការកំពូល។ តំណាងប្រជាពលរដ្ឋបឹងកក់ អ្នកស្រី ទេព វន្នី មានប្រសាសន៍ក្រោយដាក់ញត្តិថា អ្នកស្រីសង្ឃឹមថា តុលាការកំពូលនឹងពិចារណាតាមសំណើក្នុងញត្តិ៖ «យើងមិនត្រឹមតែអោយគាត់ហ្នឹងបាននៅក្រៅឃុំទេ គឺសុំអោយទម្លាក់ចោលការចោទប្រកាន់ដាក់ទោសទៅលើពួកគាត់ហ្នឹងចោលទាំងស្រុងតែម្តង ព្រោះអីពួកគាត់ជាជនរងគ្រោះ មិនមែនអ្នកដែលប្រព្រឹត្តបទល្មើសខុសទេ។ អ៊ីចឹងយើងទាំងអស់គ្នា ត្រូវតែពន្លឿនដាច់ខាតអោយតុលាការកំពូលហ្នឹងឆាប់បើកសវនាការកាត់ក្តីពួកគាត់ទាំង២១ អោយបានឆាប់ ជាពិសេសយើងសុំអោយផ្តល់យុត្តិធម៌អោយពិតប្រាកដ»។
ញត្តិទាមទារនោះបានបញ្ជាក់ថា សកម្មជនសិទ្ធិមនុស្សទាំង ៣នាក់ គឺជាអ្នកដែលឃ្លាំមើលសិទ្ធិមនុស្សនៅពេលមានបាតុកម្មកម្មករទាមទារដំឡើងប្រាក់ឈ្នួលកម្មករនៅរោងចក្រ យ៉ាក ជីន (Yak Jin)។ ពួកគេត្រូវកម្លាំងពិសេសទ័ពឆត្រយោង នៅក្រោមការដឹកនាំរបស់ លោក ចាប ភក្តី ចាប់ខ្លួន។
ប្រធានសមាគមអ្នកប្រជាធិបតេយ្យ និងវិទ្យុសំបុកឃ្មុំ លោក ម៉ម សូណង់ដូ ដែលចូលរួមហែក្បួនថ្លែងថា លោកស្នើអោយអាជ្ញាធរត្រូវអនុវត្តច្បាប់អោយបានត្រឹមត្រូវ ចៀសវាងចាប់ខ្លួនអ្នកស្លូតត្រង់ដាក់ពន្ធនាគារ៖ «ក្នុងនាមពូជាប្រជាពលរដ្ឋខ្មែរធ្លាប់ជាប់គុកដោយអយុត្តិធម៌ជាទីបំផុត មិនមែនតែពូទេ ដូចអ្នក ២១នាក់ និងអ្នកដទៃទៀត។ ហើយផ្ទុយទៅវិញ អ្នករងគ្រោះគេចាប់ឡើងតុលាការ ហើយពេជ្ឈឃាតនៅដើរច្រៀងខារ៉ាអូខេ»។
លោក សម រង្ស៊ី ប្រធានគណបក្សសង្គ្រោះជាតិ ដែលចូលទៅរកក្រុមអ្នកតវ៉ា បានថ្លែងនៅខាងមុខតុលាការកំពូលថា អាជ្ញាធរត្រូវវែកមុខអ្នកបាញ់សម្លាប់កម្មករ និងត្រូវដោះលែងអ្នកដែលគ្មានកំហុសដោយគ្មានលក្ខខណ្ឌ៖ «ក្នុងខណៈដែលយើងកំពុងស្វែងរកដំណោះស្រាយនយោបាយនេះ ត្រូវតែបញ្ឈប់រាល់អំពើហិង្សា ត្រូវតែដោះលែងអ្នកដែលកំពុងជាប់ឃុំឃាំង ហើយត្រូវតែស្រាវជ្រាវវែកមុខអ្នកដែលបានបញ្ជាអោយសម្លាប់ប្រជាពលរដ្ឋ ជាពិសេសសម្លាប់កម្មករ»។
កាលពីថ្ងៃទី១៣ កុម្ភៈ មេធាវីការពារបានដាក់បណ្ដឹងសារទុក្ខទៅតុលាការកំពូល ជំទាស់សេចក្ដីសម្រេចរបស់សាលាឧទ្ធរណ៍ ដែលបដិសេធការសុំនៅក្រៅឃុំរបស់អ្នកទាំង២១ ដែលកំពុងជាប់ឃុំក្នុងពន្ធនាគារត្រពាំងផ្លុង។
ឆ្លើយតបនឹងការទាមទារនេះ នាយកក្រឡាបញ្ជីនៃតុលាការកំពូល លោក សុខ ផល្លី បានប្រាប់តាមទូរស័ព្ទថា សំណើរបស់ពលរដ្ឋ លោកបានដាក់ជូនប្រធានក្រុមប្រឹក្សាពិចារណា។ លោកសង្ឃឹមថា អាចនឹងមានសវនាការឆាប់ៗ៖ «ដល់ដៃប្រធានហើយ ទៅតាមនីតិវិធីគេបង។ មិនដឹងថាយ៉ាងម៉េច ប៉ុន្តែយ៉ាងម៉េចក៏ត្រូវតែលឿន។ ល្បឿនវាហ្នឹងត្រូវតែលឿន»។
ភរិយា លោក វន់ ពៅ អ្នកស្រី ប្រាក់ សុវណ្ណារី ថ្លែងថា ពេលនេះសុខភាពប្ដីគាត់ គឺកាន់តែទ្រុឌទ្រោម ដែលទាមទារការព្យាបាលដិតដល់៖ «យើងចង់អោយគាត់ហ្នឹងធានាបាននៅក្រៅឃុំ ដើម្បីយកខ្លួនប្រាណរបស់គាត់ហ្នឹងមកព្យាបាលនៅមន្ទីរពេទ្យ»។
ក្នុងការបង្ក្រាបការតវ៉ារបស់កម្មករ ដែលទាមទារដំឡើងប្រាក់ខែ កាលពីដើមខែមករា មនុស្ស ២៣នាក់ ត្រូវអាជ្ញាធរចាប់ដាក់ពន្ធនាគារ ក្រោមបទចោទថាមានចេតនាប្រើហិង្សា ធ្វើអោយខូចខាតទ្រព្យសម្បត្តិ ប៉ះពាល់សណ្ដាប់ធ្នាប់ចរាចរណ៍ និងប្រមាថមន្ត្រីសាធារណៈ។ ក្នុងនោះ មនុស្ស ២នាក់ ត្រូវដោះលែងអោយនៅក្រៅឃុំបណ្ដោះអាសន្ន កាលពីដើមខែកុម្ភៈ៕
No comments:
Post a Comment
yes