រូបថតសកម្មជនសិទ្ធិមនុស្ស ដីធ្លី និងកម្មករ ដែលជាប់ឃុំ
(រូបថត តាត ឧត្តម)
ប្រធានអង្គជំនុំជម្រះសាលាឧទ្ធរណ៍ បដិសេធបណ្តឹងសុំនៅក្រៅឃុំរបស់អ្នកទាំង២១នាក់ ដោយតម្កល់សេចក្តីសម្រេចរបស់សាលក្រមសាលាដំបូងរាជធានីភ្នំពេញ ទុកជាបានការ។
បន្ទាប់ពីសវនាការរយៈពេល ៣ម៉ោង នៅព្រឹកថ្ងៃអង្គារនេះ ប្រធានក្រុមប្រឹក្សាអង្គជំនុំជម្រះសាលាឧទ្ធរណ៍ លោក ឃុន លាងម៉េង បានសម្រេចតម្កល់សេចក្តីសម្រេចរបស់តុលាការសាលាដំបូង ដែលបដិសេធបណ្តឹងសុំនៅក្រៅឃុំរបស់អ្នកជាប់ឃុំទាំង២១នាក់ ដោយលើកហេតុផលថា សំណុំរឿងមានសហចារីច្រើនអាចប៉ះពាល់ដល់ដំណើរការសវនាការ ប៉ះពាល់ដល់សណ្តាប់ធ្នាប់សាធារណៈ និងដោយសារសំណុំរឿងកំពុងស្ថិតក្នុងនិតិវិធីស៊ើបអង្កេត។
ទាក់ទងនឹងការសម្រេចនេះ លោក សំ សុគង់ មេធាវីនៅមជ្ឈមណ្ឌលសិទ្ធិមនុស្សកម្ពុជា និងជាមេធាវីការពារក្តីឲ្យលោកវន់ ពៅ និងកម្មករមួយចំនួនទៀត មានប្រសាសន៍ថា ក្រុមមេធាវី គ្រោងនឹងបន្តដាក់ពាក្យប្តឹងសុំនៅក្រៅឃុំរបស់អ្នកទាំង២១នាក់ ទៅតុលាការកំពូលទៀត នៅក្នុងសប្តាហ៍នេះ។
កាលពីថ្ងៃទី០៧ ខែកុម្ភៈ កន្លងទៅនេះ តុលាការសាលាដំបូង បានសម្រេចឲ្យកម្មករពីរនាក់ ឈ្មោះ ប៊ូ សារិទ្ធ អាយុ ២៧ឆ្នាំ និងឈ្មោះ ផុន សុខជា អាយុ១៧ឆ្នាំ នៅក្រៅឃុំបណ្តោះអាសន្ន។
អ្នកទាំង២៣នាក់នោះ ក្នុងនោះមានលោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន មន្ត្រីសម្របសម្រួលបណ្តាញកសិករ លោក ចាន់ ពុទ្ធីស័ក្ក សកម្មជនបឹងកក់នោះ ត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ។ ដោយឡែកកម្មករម្នាក់ ដែលអាជ្ញាធរចាប់ខ្លួននៅផ្លូវវ៉េងស្រេង ត្រូវបានចោទប្រកាន់ថែមពីរករណីទៀត ពីបទប្រមាថមន្ត្រីសាធារណៈ និងបង្កឲ្យខូចសណ្តាប់ធ្នាប់សាធារណៈ។ បច្ចុប្បន្ននេះ ពួកគេកំពុងឃុំខ្លួននៅមណ្ឌលអប់រំកែប្រែម៣ ឬពន្ធនាគារត្រពាំងផ្លុង ក្នុងខេត្តកំពង់ចាម។
អ្នកទាំង២៣នាក់ ត្រូវបានសមត្ថកិច្ចចាប់ខ្លួន នៅក្នុងហេតុការណ៍ប៉ះទង្គិចគ្នាដោយហិង្សារវាងកម្មករ និងកងកម្លាំងប្រដាប់អាវុធ នៅមុខសួនឧស្សាហកម្មកាណាឌីយ៉ា ផ្លូវវ៉េងស្រេង និងនៅមុខរោងចក្រយ៉ាកជីង ខណៈដែលពួកគេចូលរួមតវ៉ាទាមទារដំឡើងប្រាក់ខែគោល១៦០ដុល្លារ ដល់កម្មករ៕
No comments:
Post a Comment
yes