ភ្លាមៗក្រោយការស្លាប់បុរសជនជាតិវៀតណាម កើតនៅស្រុកខ្មែរ ក្នុងអំពើហិង្សាមួយ បណ្ដាលពីគ្រោះថ្នាក់ចរាចរណ៍ និងភាពអុងអាត់អាងយ៉ាងរបស់ខ្លួន (ប្រភពពីភ្នំពេញប៉ុស្តិ៍៖ លោក ហ៊ួត វណ្ណា មេប៉ុស្តិ៍រង សង្កាត់ ចាក់អង្រែលើ បានថ្លែងថា ជម្លោះបានផ្ទុះឡើងពេលលោក វ៉ាញ ជីញ ចតម៉ូតូហាក់ដូចជាដើម្បីរាំងស្ទះចរាចរណ៍) រដ្ឋាភិបាលវៀតណាមក្រុងហាណូយ ចេញសេចក្ដីថ្លែងការណ៍ជំរុញឲ្យរដ្ឋាភិបាលកម្ពុជាផ្ដល់យុត្តិធម៌ និងការពារជនជាតិវៀតណាមនៅក្នុងប្រទេសកម្ពុជា។
កាសែតញិនហ្សិនវៀតណាម បានស្រង់សេចក្ដីថ្លែងការណ៍របស់ក្រសួងការបរទេសខ្លួនថា ជំរុញឲ្យរដ្ឋាភិបាលកម្ពុជាឆាប់ផ្ដល់យុត្តិធម៌ដល់ជនរងគ្រោះ និងជួយការពារសន្តិសុខ និងសុវត្ថិភាពជនជាតិវៀតណាម ដែលរស់នៅកម្ពុជា។ សេចក្ដីថ្លែងការណ៍បន្តថា ការស្លាប់បុរសរូបនេះ ក៏ជាការរើសអើងពូជសាសន៍មួយដែរ។
លោកនាយករដ្ឋមន្ត្រីហ៊ុន សែន ធ្លាប់អះអាងថា ជនជាតិវៀតណាមនៅស្រុកខ្មែរមានប្រហែល ១០ ម៉ឺននាក់ ប៉ុន្តែតាមការស្រាវជ្រាវមួយឲ្យដឹងថា មានជនជាតិវៀតណាមនៅកម្ពុជាប្រហែល ១លាន ២សែននាក់ ចំណែកអ្នកនយោបាយបក្សប្រឆាំងថា មានជនជាតិវៀតណាមនៅកម្ពុជាយ៉ាងតិចជាង២លាននាក់ ហើយមានសមាគមតំណាងពួកគេនៅទូទាំងរាជធានីខេត្តនៃព្រះរាជាណាចក្រកម្ពុជា ដែលគេព្រួយបារម្ភថា សមាគមទាំងនោះជារដ្ឋាភិបាលស្រមោលរបស់ក្រុងហាណូយ ក្នុងការគ្រប់គ្រងជនជាតិវៀតណាមខុសច្បាប់នៅប្រទេសកម្ពុជា។
តាមទម្លាប់ឲ្យតែមានគណៈប្រតិភូវៀតណាមមកកាន់កម្ពុជាម្ដងៗ បណ្ដាញសារព័ត៌មានក្នុងស្រុកតែងតែបានចុះផ្សាយថា មេដឹកនាំទាំងនោះតែងតែក្រើនរំឭកនៅចំពោះមុខមេដឹកនាំកម្ពុជា មានលោកហេង សំរិន និងលោកហ៊ុន សែនជាដើម ឲ្យជួយការពារសន្តិសុខ សុវត្ថិភាព និងមុខជំនួញជនជាតិវៀតណាមនៅកម្ពុជា។
តាមការស្រាវជ្រាវ មានឯកសារមួយ របស់ក្រុមប្រឹក្សារដ្ឋមន្ត្រី នៃរបបសាធារណរដ្ឋប្រជាមានិតកម្ពុជា ចុះលេខ ០៥ សរណន (សារាចរណ៍ណែនាំ) ភ្នំពេញថ្ងៃទី២៦ ខែកុម្ភៈ ឆ្នាំ១៩៨៦ ជាសារាចរណ៍ណែនាំស្ដីពីការអនុវត្តគោលនយោបាយចំពោះអាណិកជនវៀតណាម នៅកម្ពុជា។
នៅក្នុងសារាចរណ៍ចំនួន៤ទំព័រ ចុះហត្ថលេខាដោយលោកហ៊ុន សែន ដែលកាលនោះជាប្រធានក្រុមប្រឹក្សារដ្ឋមន្ត្រី បានជំរុញឲ្យថ្នាក់មូលដ្ឋានជួយឧបត្ថម្ភដល់ជនជាតិវៀតណាម ឲ្យមានជីវភាពល្អប្រសើរ មានទីលំនៅសមរម្យ ជួយបង្កលក្ខណៈងាយស្រួលដល់អ្នកនេសាទវៀតណាម ត្រូវរៀបចំចុះលេខតាមទូករបស់គេ ត្រូវផ្ដល់លិខិតសម្គាល់ខ្លួន និងប័ណ្ណគ្រួសារ រួមទាំងការជួយចាត់តាំងបង្រៀនភាសាវៀតណាមផងដែរ។
តាំងពីថ្ងៃចេញសារាចរណ៍ណែនាំនោះ មកដល់ពេលនេះមានរយៈពេល២៨ឆ្នាំហើយ ការដឹកនាំនៅកម្ពុជាក៏ផ្លាស់ប្ដូរអស់ពីររបបមកដែរ គឺពីសាធារណរដ្ឋប្រជាមានិត្យកម្ពុជា ទៅជារដ្ឋកម្ពុជា ហើយក្រោយមកទៅជា ព្រះរាជាណាចក្រកម្ពុជា រហូតដល់សព្វថ្ងៃ។ ប៉ុន្តែក្រោមការដឹកនាំរបស់បុគ្គលតែម្នាក់ក្នុងរយៈពេល៣០ឆ្នាំនេះ ការឧបត្ថម្ភគាំទ្រជនជាតិវៀតណាមខុសច្បាប់នៅស្រុកខ្មែរហាក់គ្មានអ្វីប្រែប្រួល ជាហេតុធ្វើឲ្យពួកអាណិកជនខុសច្បាប់ទាំងនោះ អុងអាត់អាងយ៉ាងខ្លាំងឡើងៗ បង្កហេតុរហូតនាំឲ្យមានអំពើហិង្សានោះឡើង។
ឧត្តមប្រឹក្សាព្រះមហាក្សត្រ លោកស៊ឺន ស៊ូប៊ែរ យល់ថា សេចក្ដីថ្លែងការណ៍របស់ក្រុងហាណូយ បញ្ជាក់ពីទំនាក់ទំនងមិនស្មើភាពរវាងរដ្ឋាភិបាលវៀតណាម និងកម្ពុជា។
“រំលោភសិទ្ធិរបស់រដ្ឋាភិបាលខ្មែរ រួចលោករដ្ឋាភិបាលខ្មែរគួរណាស់លើកបញ្ហា ដែលគេធ្វើបាបខ្មែរក្រោម «ស្អីៗអស់ហ្នឹង ហើយជាពិសេសដូចខ្លួនខ្ញុំផ្ទាល់ ដែលអង្កាល់ខ្ញុំសុំច្បាប់គ្រប់គ្រាន់តាមច្បាប់ទម្លាប់ហើយ សុំទៅទស្សនកិច្ចនៅប្រទេសវៀតណាម គេអត់ឲ្យចូលហ្នឹងទៀតហ្ន៎»។
លោកស៊ឺន ស៊ូប៊ែរ បន្ថែមថា ការវាយគ្នារហូតដល់ស្លាប់ កើតមានជាទូទៅក្នុងសង្គមខ្មែរ មិនថារឿងគ្រោះថ្នាក់ចរាចរណ៍ ឬចោរលួច ចោប្លន់នោះទេ។ ដូច្នោះរឿងនោះវាមិនទាក់ទងនឹងការរើសអើងជាតិសាសន៍នោះឡើយ។
អ្នកវិទ្យាសាស្ត្រនយោបាយ លោកបណ្ឌិត សុខ ទូច យល់ថា សេចក្ដីថ្លែងការណ៍របស់ក្រុងហាណូយ មិនបញ្ជាក់ពីភាពជាម្ចាស់អាណានិគមមកលើកម្ពុជាទេ ប៉ុន្តែវាបញ្ជាក់ពីភាពរឹងមាំរបស់រដ្ឋាភិបាលវៀតណាម ដែលយកចិត្តទុកដាក់ចំពោះជនជាតិរបស់គេ។ លោកបន្ថែមថា រដ្ឋាភិបាលកម្ពុជា គួរតែរៀនធ្វើតាមរដ្ឋាភិបាលវៀតណាម មិនត្រូវព្រងើយកន្ដើយចំពោះការស្លាប់របស់ជនជាតិខ្មែរមិនថានៅក្នុងប្រទេស ឬក្រៅប្រទេសឡើយ «រៀនសូត្រតាមគេវិញ កុំឲ្យប្រជាជនខ្មែរយើងងាប់ហើយ យើងអត់មានអ្នកណាទទួលខុសត្រូវ ហើយឧទាហរណ៍ខ្មែរកម្ពុជាក្រោមអីហ្នឹង គាត់ជាខ្មែរដែរ ប៉ុន្តែស្លាប់ដោយឥតមានអ្នកណាទទួលខុសត្រូវ។ អ៊ីចឹងឃើញរដ្ឋាភិបាលគេ គេឲ្យយើងរកអ្នកទទួលខុសត្រូវ ឲ្យយើងទទួលខុសត្រូវ។ ចុះយើងគ្រាន់តែហែព្រះត្រៃបិតក ដែលជាព្រះពុទ្ធសាសនា គេមិនទាំងឲ្យហែចូលផង។ យើងយកញត្តិទៅឲ្យស្ថានទូត គេមិនចេញផង។ អាហ្នឹងហើយ យើងអត់មានជាតិនិយម យើងអត់មានស្អប់រើសអើងទេ គឺតួនាទីភារកិច្ចរបស់ជាតិសាសន៍មួយ»។
លោកបណ្ឌិតសុខ ទូច ក៏សង្កត់ធ្ងន់លើទំនាក់ទំនងមិនស្មើភាពរវាងរដ្ឋាភិបាលវៀតណាម និងរដ្ឋាភិបាលកម្ពុជាផងដែរ។
នាយកប្រតិបត្តិអង្គការនិចហ្វិច លោកហង្ស ពុទ្ធា យល់ថា រដ្ឋាភិបាលវៀតណាមអាចធ្វើសេចក្ដីថ្លែងការណ៍ស្នើឲ្យកម្ពុជារកយុត្តិធម៌បាន ក្នុងន័យការគោរពសិទ្ធិមនុស្ស ដូចករណីសម្លាប់បាតុករជាដើម ប៉ុន្តែមិនមែនបង្ខំឲ្យរកយុត្តិធម៌ឲ្យតែជនជាតិវៀតណាមម្នាក់ តែជនជាតិខ្មែរស្លាប់មិនរកយុត្តិធម៌ឲ្យនោះទេ។ លោកបន្ថែមថា បើរដ្ឋាភិបាលកម្ពុជាធ្វើតាមសេចក្ដីថ្លែងការណ៍នោះមែន វាធ្វើឲ្យខូចកិត្តិយសប្រទេសផង និងបញ្ជាក់ថា ខ្មែរបាត់បង់អធិបតេយ្យភាពផងដែរ «រឿងនេះជារឿងតុលាការកម្ពុជាសុទ្ធសាធ ដែលវៀតណាមអាចមានសិទ្ធិស្នើ ក៏ប៉ុន្តែមិនមែនមានសិទ្ធិក្នុងការបង្ខំឲ្យគេធ្វើអ្វីទៅតាមអំពើចិត្តរបស់ខ្លួនទេ ព្រោះថានេះជារឿងអធិបតេយ្យភាពនៅក្នុងប្រទេសរបស់ខ្លួន ហើយមួយទៀតគឺថា ប្រទេសកម្ពុជាហ្នឹង រដ្ឋាភិបាលកម្ពុជាត្រូវតែហ៊ានធ្វើការឆ្លើយតប អំពីការរក្សានូវអធិបតេយ្យភាពរបស់ខ្លួន បង្ហាញអំពីអំណាចរបស់ខ្លួនដែរ»។
លោកហង្ស ពុទ្ធាបន្ថែមថា បើសិនជាយើងរកយុត្តិធម៌ឲ្យជនជាតិវៀតណាមកាត់ខ្មែរម្នាក់ កើតនៅស្រុកខ្មែរ បានលឿនជាងរកយុត្តិធម៌ឲ្យជនជាតិខ្មែរ នោះវាបញ្ជាក់ពីការរើសអើងជាតិសាសន៍លើជាតិសាសន៍ខ្លួនឯងហើយ។
ទោះបីជាទាំងសង្គមស៊ីវិល ទាំងអ្នកវិទ្យាសាស្ត្រនយោបាយមិនបានបញ្ជាក់ថា សេចក្ដីថ្លែងការណ៍នោះមានលក្ខណៈដូចការបង្គាប់បញ្ជាពីម្ចាស់អាណានិគម ទៅដែនដីអាណានិគមរបស់ខ្លួនក៏ដោយ ក៏លោកយល់ស្របនឹងគ្នាថា វាបញ្ជាក់ពីទំនាក់ទំនងមិនស្មើភាពរវាងរដ្ឋាភិបាលក្រុងហាណូយ និងក្រុងភ្នំពេញ៕
No comments:
Post a Comment
yes