សកម្មជនដីធ្លី និយាយតាមប្រព័ន្ធឧគ្ឃោសនាសព្ទ ទាមទារឲ្យមត្ថកិច្ចស្វែងរក
និងចាប់ខ្មាន់កាំភ្លើង មកផ្តន្ទាទោស (រូបថត៖ ញឹម សុខន)
ប្រតិកម្មរបស់អ្នកមានជម្លោះដីធ្លីមកពីតំបន់បឹងកក់ បុរីកីឡា សហគមន៍ថ្មគោល បានធ្វើឡើង ដោយពួកគេប្រមូលផ្តុំគ្នា ស្រែកតាមឧបករណ៍បំពងសំឡេង មុខស្នាក់ការប៉ុស្តិ៍នគរបាលសង្កាត់ស្រះចកខណ្ឌដូនពេញ រាជធានីភ្នំពេញ ដើម្បីជំរុញឲ្យពន្លឿនបើកការស៊ើបអង្កេតរកការពិត។
អ្នកស្រី បូវ សាភា តំណាងអ្នកភូមិបឹងកក់ ប្រាប់ VOD ថា មន្ត្រីរដ្ឋាភិបាលច្រើនរូប បានប្រាប់អ្នកសារព័ត៌មានជាបន្តបន្ទាប់ថា ករណីជនមិនស្គាល់មុខបើកការបាញ់ប្រហារនោះថា ជារឿងដែលអ្នកភូមិបំលែងទៅជារឿងនយោបាយ ដើម្បីទម្លាក់កំហុសដាក់រដ្ឋាភិបាល «ចុះថ្ងៃនិងគេបាញ់កញ្ចក់ ឡាន ចុះបើថ្ងៃណាមួយគេបាញ់ពួកខ្ញុំទៅ គាត់មិនអ្នកការពារឃាតករពេញទំហឹងហើយ ឥតសម័ត្ថភាពដោះស្រាយយើងនៅឲ្យស្ងៀមទៅ យើងពួននៅនិងផ្ទះទៅ យើងកុំនិយាយផ្តេសផ្តាស»។
ស្ត្រីរូបនោះអះអាងទៀតថា មន្ត្រីរដ្ឋាភិបាលដែលមិនទទួលស្គាល់ការពិតនោះ មាន មន្ត្រីប៉ូស្តិ៍សង្កាត់ស្រះចក និងស្នងការរងនគរបាលរាជធានីភ្នំពេញ លោក ជួន ណារិន ជាដើម។
អ្នកស្រី យ៉ោម បុប្ផា ជាសកម្មជនដីធ្លី នៅតំបន់បឹងកក់ដែលធ្លាប់ជាប់ពន្ធនាគារ ដោយសារតវ៉ាប្រឆាំងនឹងការបណ្តេញចេញ ឲ្យដឹងដែរថា ការសន្និដ្ឋានខុសពីការពិតបែបនេះ ហាក់បង្ហាញថា ព្រឹត្តិការណ៍ដេញបាញ់សកម្មជនដីធ្លីនៅពេលនោះ ទំនងជាការរៀបចំទុក « អាជ្ញាធរសន្និដ្ឋានផ្តេសផ្តាសអញ្ចិងបានន័យថា អាជ្ញាធរកំពុងតែឃុបខិតជាមួយនិងជនល្មើសហើយបង្ករឲ្យមានអាណាធិតេយ្យ ការបាញ់បោះនិងដោយសេរី»។
VOD មិនអាចសុំប្រតិកម្មតបពីលោក ជួន ណារិន ជុំវិញការចោទប្រកាន់នេះបានទេ ដោយលោកអះអាងថាកំពុងជាប់រវល់។
នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ យល់ថា ការទាមទារ រកយុត្តិធម៌ របស់សកម្មជនដីធ្លី ក៏ដូចជាសកម្មជនសិទ្ធិមនុស្ស ទំនងជាការលំបាកបើអាជ្ញាធរគ្មានជំហរឯករាជ្យនោះ «មន្ត្រី សមត្ថកិច្ចដែលមានការលំអៀង ដោយសារពួកគាត់ស្ថិតនៅឆាកនយោបាយរបស់គណបក្សកាន់អំនាច អញ្ចិងហើយគាត់មិនបានផ្តល់សេវាកម្ម ជូនប្រជាពលរដ្ឋទូទៅទេ គឺគាត់ផ្តល់សេវាកម្មការពារតែ ផលប្រយោជន៏ គណបក្សប្រជាជនកម្ពុជាតែប៉ុណ្ណោះឯង»។
កាលពីម៉ោង ៨យប់ ថ្ងៃទី២២ ខែមីនា សកម្មជនដីធ្លីប្រមាណជា៥០នាក់បានជិះរថយន្តក្រុង មកពីខេត្តសៀមរាប ក្រោយពីពួកគេទៅចូលរួមប្រារព្ធពិធីរម្លឹកខួប៥ឆ្នាំ នៃការបណ្តេញ អ្នកភូមិជីក្រែង។
ក្នុងពាក្យបណ្តឹងអ្នកភូមិសរសេរថា មកដល់មន្ទីរពេទ្យមួយជិតស្ពានជ្រោយចង្វា រាជធានីភ្នំពេញ ពួកគេត្រូវបានខ្មាន់កាំភ្លើង ដកកាំភ្លើងខ្លីបាញ់ត្រូវកញ្ចក់រថយន្តខាងមុខឈាងខាងស្តាំមួយគ្រាប់ រួចប្តឹងទៅសមត្ថកិច្ចដើម្បីរកយុត្តិធម៌ ដោយទាមទារឲ្យចាប់ជនដៃដល់មកផ្តន្ទាទោស។
កន្លងទៅ សកម្មជនការពារសិទ្ធិកម្មករ អង្គការការពារបរិដ្ឋាន និងសកម្មជនដីធ្លីមួយចំនួនទៀត ត្រូវគេបាញ់សម្លាប់ ក្រៅច្បាប់ ដូចករណីបាញ់សម្លាប់អតីតប្រធានសហជីពសេរីកម្មករ លោក ជា វិជ្ជា នៅកណ្តាលរាជធានីភ្នំពេញ បាញ់សម្លាប់លោក ឈុត វុទ្ធី នៅខេត្តកោះកុង ជាដើម ដែលរហូតមកដល់ពេលនេះ ក្រុមគ្រួសារជនរងគ្រោះ អះអាងថា ពួកគេមិនទាន់ទទួលបានយុត្តិធម៌នៅឡើយទេ៕
No comments:
Post a Comment
yes