គណៈកម្មការចម្រុះកែទម្រង់ការបោះឆ្នោត មកពីគណបក្សទាំងពីរ
ធ្វើសន្និសីទសារព័ត៌មាន បន្ទាប់ពីកិច្ចប្រជុំរួច (រូបថត៖ តាំង វីដា)
កិច្ចប្រជុំគណៈកម្មការចម្រុះរបស់គណបក្សប្រជាជនកម្ពុជា (CPP) និងគណបក្សសង្គ្រោះជាតិ (CNRP) ទៅលើការកែទម្រង់ប្រព័ន្ធបោះឆ្នោត នៅព្រឹកថ្ងៃចន្ទនេះ មិនបានរកឃើញនូវចំណុចឯកភាព ដោយសាររបៀបវារៈចំនួន២ ដែលបានលើកឡើងហួសដែនសម្រេចរបស់ក្រុមការងារបក្សទាំងពីរ។
បន្ទាប់ពីជំនួបលើកទី២ របស់គណៈកម្មការចម្រុះកែទម្រង់ការបោះឆ្នោត របស់គណបក្សទាំងពីរ ដែលធ្វើឡើងរយៈពេលបីម៉ោង នៅព្រឹទ្ធសភា ប្រធានក្រុមការងារគណបក្សសង្គ្រោះជាតិ លោក សុន ឆ័យ ឲ្យដឹងនៅក្នុងសន្និសីទសារព័ត៌មានថា កិច្ចប្រជុំនេះ គឺមិនមានជាសេចក្តីប្រកាសរួមពីចំណុចឯកភាព ដូច លើកមុនៗឡើយ ព្រោះអំណះអំណាង ដែលភាគីទាំងពីរទាមទារ ហួសពីសមត្ថកិច្ចនៃការសម្រេចរៀងៗខ្លួន ដែលតម្រូវឲ្យថ្នាក់ដឹកនាំកំពូលជាអ្នកសម្រេច។
ចំណុចពីរនោះ រួមមាន កំណែទម្រង់ស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប) និងឯករាជ្យភាព សុចរិតភាពនៃអង្គការសង្គមស៊ីវិល ធ្វើការលើវិស័យបោះឆ្នោត។
ប្រធានគណៈកម្មការចម្រុះគណបក្សប្រជាជនកម្ពុជា លោក ប៊ិន ឈិន ឲ្យដឹងថា កំណែទម្រង់គណៈកម្មាធិការជាតិរៀបចំការបោះឆ្នោត គឺជារឿងស្មុគស្មាញ ក្នុងកិច្ចពិភាក្សាលើកនេះ ដោយសារគណបក្សសង្គ្រោះជាតិ ទាមទារឲ្យមានការដាក់បញ្ចូលច្បាប់គ្រប់គ្រងស្ថាប័ននេះ ទៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីកំណត់លម្អិតពីរចនាសម្ព័ន្ធស្ថាប័ននេះ ។
លោកថា ការទាមទារនេះ គឺមិនអាចរួចទេ ទាល់តែឲ្យថ្នាក់ដឹកនាំបក្សទាំងពីរជាអ្នកសម្រេច ៖«ព្រោះថា យើងត្រូវធ្វើកិច្ចការ ឲ្យបានច្បាស់លាស់ យើងមិនប្រថុយប្រថានទេ ម៉េចនេះ យើងបានគិតគ្នាទៀត ថាក្នុងកំឡុងពេលនៃកិច្ចពិភាក្សានេះ បើថ្នាក់ដឹកនាំកំពូល លោកសម្រេចយ៉ាងនេះ យ៉ាងនោះ ហើយមានឥទ្ធិពលល្អ មកដល់គណៈកម្មការយើង យើងក៏ទទួលយកបញ្ហានោះ។ »
សម្រាប់របៀបវារៈទី ២ ដែលជាការស្នើរបស់គណបក្សប្រជាជនកម្ពុជា ឲ្យមានច្បាប់គ្រប់គ្រងអង្គការនោះ ប្រធានគណៈកម្មការចម្រុះគណបក្សសង្គ្រោះជាតិ លោក សុន ឆ័យ យល់ថា ចំណុចនេះ ជារឿងថ្មីមួយ ដែលមិនស្ថិតក្នុងក្របខណ្ឌកំណែទម្រង់ការបោះឆ្នោត ហើយទាមទារឲ្យមានការពិគ្រោះយោបល់លម្អិត ជាមួយដៃគូពាក់ព័ន្ធផងដែរ ៖«ហេតុអីបានជាយកបញ្ហាសង្គមស៊ីវិលមក ព្រោះខាងរដ្ឋាភិបាល ក៏ធ្លាប់បានស្នើច្បាប់ស្តីពីការរៀបចំអង្គការសង្គមស៊ីវិល ហើយក៏កំពុងពិគ្រោះយោបល់ជាមួយសង្គមស៊ីវិលដែរ ហេតុអីយកមកពាក់ព័ន្ធនឹងការងារបោះឆ្នោត។ ការវិសោធន៍កន្លងទៅ ខាងរដ្ឋាភិបាល គណបក្សប្រជាជន លោកតែងតែចោទប្រកាន់ ចោទប្រកាន់ថា សង្គមស៊ីវិល កាន់ជើងបក្សប្រឆាំង សំឡេងរបស់សង្គមស៊ីវិលដូចសំឡេងរបស់គណបក្សប្រឆាំង។»
អ្នកវិភាគនយោបាយ លោកបណ្ឌិត សុខ ទូច ចាត់ទុកសំណើដែលភាគីម្ខាងៗលើកឡើង ថាសុទ្ធតែជាចំណុចថ្មី ដែលគប្បីជូនដំណឹងទៅវិញទៅមក មុនជួបពិភាក្សា ដោយមិនត្រូវលើកភ្លាមៗ នាំឲ្យកិច្ចប្រជុំពេញមួយព្រឹកគ្មានលទ្ធផលនោះទេ។ លោកយល់ថា ការអូសបន្លាយពេលនេះ គឺជាចេតនារបស់អ្នកនយោបាយ ទៅកាន់សហគមន៍អន្តរជាតិ និងជាការសំញែងពីការទាមទារគ្នាទៅវិញទៅមក៖«យើងឃើញថានេះគ្រានតែជាការអូសបន្លាយរបស់អ្នកនយោបាយ ដើម្បីបង្ហាញសាធារណជន អន្តរជាតិ ម្ចាស់ជំនួយ ឬអង្គការក្រៅរដ្ឋាភិបាល ទីមួយ អ្នកនយោបាយគិតគូរ ហើយបង្ហាញអន្តរជាតិថា កុំលូកដៃ ពីព្រោះឥលូវគេកំពុងដំណើរការហើយ បង្ហាញអង្គការក្រៅរដ្ឋាភិបាល ថាគេកំពុងបន្តសកម្មភាពនៅក្នុងដំណោះស្រាយជាប់គាំងនេះ ប៉ុន្តែផ្ទុយទៅវិញ អ្នកនយោបាយ អត់មានបានអ្វីដែលសម្រេចទេ។»
យ៉ាងណាក៏ដោយ គណៈកម្មការចម្រុះកែទម្រង់ការបោះឆ្នោតបក្សទាំងពីរ អះអាងថា នឹងជួបគ្នាជាថ្មីទៀត នៅថ្ងៃទី១៧ ខែមីនា ដើមសប្តាហ៍ក្រោយ ដើម្បីទុកឱកាសពិភាក្សាជាមួយថ្នាក់ដឹកនាំ និងលើករបៀបវារៈទាំងនេះ ទៅពិចារណាបន្ត។
កាលពីថ្ងៃទី៣ ខែមីនា ក្រុមការងារគណៈកម្មការចម្រុះបក្សទាំងពីរ បានឯកភាពគ្នាលើ ការធ្វើកំណែទម្រង់ការចុះឈ្មោះបោះឆ្នោត និងបញ្ជីឈ្មោះបោះឆ្នោត រួមនឹងការរៀបចំបង្កើតច្បាប់ស្តីពីហិរញ្ញវត្ថុគណបក្ស ដោយគ្រោងនឹងពិភាក្សាបន្តលើការកែទម្រង់ស្ថាប័នបោះឆ្នោត យន្តការដោះស្រាយវិវាទ និងការធានាភាពស្មើគ្នាលើប្រព័ន្ធផ្សព្វផ្សាយជាដើម ដែលបានពិភាក្សា ប៉ុន្តែ បញ្ហាលម្អិតលើចំណុចទាំងបីនេះ គឺមិនត្រូវបានលើកឡើងក្នុងកិច្ចប្រជុំទី២នេះឡើយ៕
No comments:
Post a Comment
yes