បុរសក្រីក្រម្នាក់ដើរជីកចង្រិតដែលត្រូវទាហាន និងមេព្រៃបាញ់នៅក្នុងដែនព្រៃហាមឃាត់តំបន់ក្បាលឆាយ ខេត្តព្រះសីហនុ ឱ្យរងរបួសធ្ងន់កន្លងមក ឥឡូវនេះបានស្លាប់ហើយ នៅក្នុងមន្ទីរពេទ្យកាល់ម៉ែត រាជធានីភ្នំពេញ កាលពីវេលាម៉ោង៦និង២០នាទីព្រឹកថ្ងៃទី១៧ វិច្ឆិកា ២០១១។
គួររំលឹកផងដែរថា ជនរងគ្រោះមានឈ្មោះនួន បឿក អាយុ២៩ឆ្នាំ មានប្រពន្ធឈ្មោះសេង វណ្ណី និងមានកូនប្រុសម្នាក់ មានទីលំនៅក្រុមទី១៦ ភូមិ១ សង្កាត់លេខ១ ក្រុងព្រះសីហនុ មានស្រុកកំណើតនៅស្រុកទូកមាស ខេត្តកំពត។ ត្រូវបានរងគ្រោះដោយគ្រាប់កាំភ្លើងរបស់យោធាការពារព្រៃតំបន់ក្បាលឆាយម្នាក់មានឈ្មោះហុក ថៃ ឋានៈព្រិន្ទបាលឯក និងមន្ត្រីរដ្ឋបាលព្រៃឈើម្នាក់ឈ្មោះគង់ សំអុល មានតួនាទីនាយរងសង្កាត់រដ្ឋបាលព្រៃឈើខេត្តព្រះសីហនុ ខណៈជនរងគ្រោះបានចូលព្រៃជីកចង្រិតនៅក្នុងតំបន់ក្បាលឆាយ ខេត្តព្រះសីហនុ កាលពីរសៀលថ្ងៃទី១១ វិច្ឆិកា ២០១១ ហើយត្រូវឆ្មាំការពារព្រៃឈើជាទាហានម្នាក់ និងមេព្រៃម្នាក់ជិះម៉ូតូល្បាតក៏ជួបប្រទះជនរងគ្រោះ កំពុងជីកចង្រិតនៅក្នុងព្រៃហាមឃាត់នោះ ក៏ទាញកាំភ្លើងបាញ់ប្រហារ ត្រូវចំកំប៉េះគូទបុរសរងគ្រោះ និងបៀមគ្រាប់នៅក្នុងព្រោះវៀន។ ក្រោយពីពេទ្យនៅខេត្តព្រះសីហនុ ពុំមានឧបករណ៍គ្រប់គ្រាន់ ដើម្បីសង្គ្រោះក្រុមគ្រួសារបានបញ្ជូនជាបន្តបន្ទាប់រហូតដល់មន្ទីរពេទ្យកាល់ម៉ែតរាជធានី ប៉ុន្តែនៅតែពុំអាចជួយសង្គ្រោះបាន។
តាមសម្តីស្ត្រីឈ្មោះនួន តូច អាយុ៤១ឆ្នាំ ត្រូវជាម្តាយមីង បានរៀបរាប់តាមទូរស័ព្ទថា រូបគាត់ពុំដែលបានឃើញក្រុមមន្ត្រីរដ្ឋបាលព្រៃឈើទៅអើតសួរនាំអ្វីបន្តិចនោះទេ ។ ហើយអ្វីដែលគួរឱ្យហួសចិត្តនោះគឺលោកឌី សុខុម ដែលជាប្រធានរដ្ឋបាលព្រៃឈើខេត្តព្រះសីហនុ បានធ្វើរបាយការណ៍បំផ្លៃការពិត ភូតកុហកប្រតិភូរាជរដ្ឋាភិបាលទទួលបន្ទុករដ្ឋបាលព្រៃឈើថា បានចុះមើលជនរងគ្រោះ មិនត្រឹមតែប៉ុណ្ណោះ គេបានធ្វើរបាយការណ៍ចោទបុរសរងគ្រោះថា បានកាប់ឈើចំនួន១៣ដើមទៀតផង ។
ទាក់ទិននឹងការបាញ់ប្រហារនេះ លោកវ៉ា ចាន់ថន ប្រធានការិយាល័យព្រហ្មទណ្ឌនៃទីបញ្ជាការកងរាជអាវុធហត្ថខេត្តព្រះសីហនុ ពុំបានធ្វើអត្ថាធិប្បាយអ្វីនោះទេ គ្រាន់តែឆ្លើយថា កំពុងស៊ើបអង្កេត ឯជនដៃដល់បានរត់គេចខ្លួនបាត់ហើយ នៅសល់លោកគង់ សំអុល លោកក៏បានហៅមកសួរនាំ តែពុំមានការឃុំខ្លួននោះទេ។
ដោយឡែក លោកខេង សុផល អនុប្រធានកណ្តាលព្រហ្មទណ្ឌនៃស្នងការការដ្ឋាននគរបាលខេត្តព្រះសីហនុ មានប្រសាសន៍ថា សំណុំរឿងនេះលោកនឹងស្រាវជ្រាវរកឱ្យឃើញអ្នកបញ្ជានៅពីក្រោយការបាញ់ប្រហារដ៏សាហាវនេះ៕
កោះសន្តិភាព
No comments:
Post a Comment
yes