គណៈកម្មការចម្រុះកែទម្រង់ការបោះឆ្នោតរបស់គណបក្សប្រជាជនកម្ពុជា និងគណបក្សសង្គ្រោះជាតិ នៅថ្ងៃចន្ទស្អែកនេះ នឹងបន្តកិច្ចពិភាក្សារបស់ខ្លួនតាមការគ្រោងទុក។
កាលពីថ្ងៃទី៣ ខែមីនា គណៈកម្មការចម្រុះកែទម្រង់ការបោះឆ្នោតរបស់គណបក្សប្រជាជនកម្ពុជា និងគណបក្សសង្គ្រោះជាតិ បានឯកភាពគ្នាក្នុងការកែទម្រង់បញ្ជីឈ្មោះបោះឆ្នោត និងច្បាប់ស្តីពីការប្រើប្រាស់ហិរញ្ញវត្ថុសម្រាប់គណបក្ស ប៉ុន្តែបញ្ហាមួយចំនួនមិនទាន់ឯកភាពគ្នាទេ។ ក្នុងកិច្ចប្រជុំស្អែកនេះ គណបក្សទាំងពីរ នឹងពិភាក្សាបញ្ហាដែលនៅសេសសល់រួមមាន កំណែទម្រង់ស្ថាប័នរៀបចំការបោះឆ្នោត កំណែទម្រង់រចនាសម្ព័ន្ធ ការបង្កើតយន្តការដោះស្រាយវិវាទការបោះឆ្នោត កំណែទម្រង់ការប្រើប្រាស់ប្រព័ន្ធផ្សព្វផ្សាយ និងការប្រើប្រាស់តួនាទីត្រឹមត្រូវរបស់មន្ត្រីរាជការ និងកងកម្លាំងប្រដាប់អាវុធជាដើម។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឬទ្ធិ មានប្រសាសន៍ថា ថ្ងៃស្អែកនេះក្រុមការងារគណបក្សសង្គ្រោះជាតិ នឹងចូលប្រជុំតាមការគ្រោងទុក។ លោក បន្តថា នឹងយកអនុសាសន៍របស់សម្ព័ន្ធកំណែទម្រង់ការបោះឆ្នោត(ERA) អំពីការកែទម្រង់ប្រព័ន្ធចុះឈ្មោះបោះឆ្នោតបែបទំនើប និងបង្ហាញតម្លាភាពហិរញ្ញវត្ថុរបស់គណបក្ស នយោបាយ ដើម្បីដាក់ជារបៀបវារៈក្នុងការចរចាជាមួយគណបក្សប្រជាជនកម្ពុជា។
ចំណែកមន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន ប្រាប់ VODថា ក្រុមការងាររបស់ខ្លួន បានត្រៀមខ្លួនជាស្រេចសម្រាប់ចូលរួមពិភាក្សាជាមួយ គណបក្សសង្គ្រោះជាតិ លើបញ្ហាកំណែទម្រង់ស្ថាប័នរៀបចំការបោះឆ្នោត។
កិច្ចប្រជុំនេះ នឹងធ្វើឡើងនៅ វេលាម៉ោង៩ព្រឹក នៅព្រឹទ្ធសភា ដោយមានសមាសភាពគណៈកម្មការកែទម្រង់ការបោះឆ្នោតរបស់គណបក្សសង្គ្រោះជាតិ ដឹកនាំដោយលោក សុន ឆ័យ និងសមាជិករួមមាន លោក យឹម សុវណ្ណ លោក គួយ ប៊ុនរឿន លោក អេង ឆៃអ៊ាង លោក ម៉ៅ មុន្នីវណ្ណ និងលោក ហូរ វ៉ាន់។
ចំណែកក្រុមការងាររបស់គណបក្សប្រជាជនកម្ពុជា ដឹកនាំដោយលោក ប៊ិន ឈិន និងសមាជិកលោកព្រុំ សុខា លោក ជាម យៀប លោក ឈាង វុន លោក ប៉ែន បញ្ញា លោក ស៊ិក ប៊ុនហុក និងលោកស្រី គ្រួច សំអាន។
No comments:
Post a Comment
yes