លោកស្រីយី​ង​ឡាក់ត្រូវបាន​ដោះលែង​វិញ​ហើយ​​

អតីតនាយករដ្ឋមន្រ្តីថៃ លោកស្រី យីងឡាក់ កាលពីកន្លងទៅ

សារព័ត៌មាន​CNN រាយការណ៍​នៅ​ថ្ងៃ​អាទិត្យ​នេះ​ថា អតីត​នាយករដ្ឋមន្ត្រី​ថៃ លោកស្រី យី​ង​ឡាក់ ត្រូវបាន​ដោះលែង​វិញ​ហើយ​នៅថ្ងៃនេះ បន្ទាប់ពី​ត្រូវ​បាន​ឃុំខ្លួន​នៅ​កន្លែង​សម្ងាត់​មួយ​កាលពី​ថ្ងៃ​សុក្រ​។​

​ប្រភព​ជិតស្និទ្ធិ​នឹង​លោកស្រី យី​ង​ឡាក់ បាន​បញ្ជាក់​ប្រាប់​CNN​ថា លោកស្រី ត្រូវបាន​ដោះលែង​វិញ​ហើយ​។​

​លោក Prayuth Chan-ocha បាន​ជួប​ជាមួយ​មន្ត្រី​សំខាន់ៗ ដោយ​ប្រាប់​ពួកគេ​ថា កំណែទម្រង់​ត្រូវតែ​កើត​មាន​មុន​ការ បោះឆ្នោត​។​លោក Prayuth បាន​កោះហៅ​អភិបាលខេត្ត មេដឹកនាំ​ជំនួញ និង​មន្ត្រី​ស៊ីវិល ផ្សេង​ទៀត​មក​ក្រុមប្រឹក្សា​កងទ័ព​ថៃ កាលពី​ថ្ងៃ​សុក្រ​។ ក្រុមប្រឹក្សា​កងទ័ព​ថៃ បាន​សម្រេច​ដាក់​ចេញ​នូវ​បំរាម​ទៅលើ​អ្នក​នយោបាយ​ថៃ​ចំនួន​១៥៤ ហើយ​ក្នុងនោះ មាន​អតីត​នាយករដ្ឋមន្ត្រី លោកស្រី យី​ង​ឡាក់ និង​សាច់ញាតិ​របស់​ត្រកូល​ស៊ីណា​វា​ត្រា​ផងដែរ មិន​ឲ្យ​ចាកចេញ​ទៅ​បរទេស​ដោយ​គ្មាន​ការ​អនុញ្ញត​។​

​មាន​សេចក្ដីរាយការណ៍ មាន​អ្នកនយោបាយ​ថៃ​មក​ពី​ក្រុម​អាវ​ក្រហម​និង អាវ​លឿង​ជាច្រើន​នាក់ ត្រូវបាន​ឃុំខ្លួន​នៅ​បន្ទាយ​របស់​កងទ័ព ហើយ​ជាង​១០០​នាក់ ត្រូវ​បាន​កោះហៅ​ចូលខ្លួន ដើម្បី​រាយការណ៍​អំពី​សន្តិសុខ និង​គោលបំណង​ដែល​ចង់​បន្ត​ការតវ៉ា​៕