សង្គម​ស៊ីវិល​ថ្កោលទោស​ការអនុម័ត​ច្បាប់​ទាក់ទង​កំណែទម្រង់​ប្រព័ន្ធតុលាការ​​

សង្គម​ស៊ីវិល​ជាតិ និង​អន្តរជាតិ​ចំនួន​៩ នៅ​ថ្ងៃ​ចន្ទ​នេះ បាន​ថ្កោលទោសបក្ស​កាន់​អំណាច​ដែល​ជំរុញ​ឲ្យមាន​ការអនុម័​ត​ច្បាប់ ស្តីពី​កំណែទម្រង់​ប្រព័ន្ធតុលាការ ខណៈ​បក្សប្រឆាំង​នៅ​បន្ត​ធ្វើ​ពហិកា​ប្រជុំ​សភា។​

​សេចក្តីថ្លែងការណ៍រួម របស់​ក្រុម​អង្គការ​សង្គម​ស៊ីវិល ចុះ​ថ្ងៃ​ទី​២៦ ​ខែ​ឧសភា ​ឆ្នាំ​២០១៤​នេះ ឲ្យដឹងថា កាលពី​ថ្ងៃ​ទី​២២​ ខែ​ឧសភា ​ឆ្នាំ​២០១៤ រដ្ឋសភាដែលមានតែ​តំណាងរាស្ត្រ​មកពី​គណបក្ស​ប្រជាជន​កម្ពុជា បានអនុម័តសេច្តីព្រាងច្បាប់​ស្តីពី​ការ​រៀបចំអង្គ​តុលាការ សេចក្តីព្រាងច្បាប់​ស្តីពី​លក្ខន្តិកៈ​នៃ​អង្គចៅក្រម និង​ព្រះរាជអាជ្ញា សេចក្តីព្រាងច្បាប់​ស្តីពី​ការរៀបចំ និង​ការប្រព្រឹត្តទៅ​នៃ​ឧត្តម​ក្រុមប្រឹក្សា​នៃ​អង្គចៅក្រម​។​

​ក្រុម​អង្គការ​សង្គម​ស៊ីវិល ដែល​មាន​គណៈកម្មាធិកា​រ​ប្រព្រឹត្តិកម្ម​នៃ​អង្គការ សមាគម​ការពារ​សិទ្ធិមនុស្ស​កម្ពុជា​(CHRAC) មជ្ឈមណ្ឌល​សិទ្ធិមនុស្ស​កម្ពុជា​(CCRH)​គណៈកម្មការ​អ្នកច្បាប់​អន្តរជាតិ​ (ICJ)​សមាគម​អាដហុក និង​អង្គការ​មួយចំនួនទៀត ឲ្យដឹងទៀតថា ច្បាប់​នោះ​នឹង​ផ្តល់​អំណាច​កាន់តែ​ទូលំទូលាយ​ដល់​ឧត្តក្រុមប្រឹក្សា​នៃ​ អង្គចៅ​ក្រម ដល់​រដ្ឋមន្ត្រី​ក្រសួង​យុត្តិធម៌ ត្រួត​លើ​ចៅក្រម និង​ព្រះរាជអាជ្ញា នឹង​ធ្វើឲ្យប៉ះពាល់​ដល់​ឯករាជ្យភាពរបស់​តុលាការ។​

​ក្រុម​អង្គការ​សង្គម​ស៊ីវិល​ទាំង​នោះ ស្នើ​ឲ្យ​ព្រឹទ្ធសភា ពន្យា​ពេល​អនុម័ត​សេចក្តីព្រាងច្បាប់​ទាំង​៣​នេះ និង​ស្នើ​ឲ្យមាន​ការពិគ្រោះ​យោបល់​ជា​មួយសាធារណៈ​ជន​សង្គម​ស៊ីវិល​នានា ដើម្បី​ធានា​ថាច្បាប់​ទាំងនេះ​អនុលោម​តាម​បទដ្ឋាន​អន្តរជាតិ។​

ច្បាប់​ស្តីពី​កំណែទម្រង់​ប្រព័ន្ធ​តុលាការ​នេះ ក្រុម​អង្គការ​សង្គម​ស៊ីវិល ធ្លាប់​ស្នើ​ឲ្យ​រដ្ឋាភិបាល ពន្យា​ពេលបញ្ជូន​មក​សភា​អនុម័ត ដើម្បី​ប្រមូល​យកអនុសាសន៍​បន្ថែមពី​សង្គម​ស៊ីវិល និងគណបក្ស​សង្គ្រោះ​ជាតិ ដែល​បាន​ឈ្នះ​ការបោះឆ្នោត​នីតិកាល​ទី​៥​នេះ​ផង​ដែរ ដើម្បី​ធានា​ថាច្បាប់​មិន​បំរើ​ប្រយោជន៍​ឲ្យតែ​មនុស្ស​មួយ​ក្រុម​។

​ទោះជា​យ៉ាងនេះក្តី សំណើ​នេះ ត្រូវបាន​លោកនាយក​រដ្ឋមន្ត្រី​​ ហ៊ុន សែន ច្រានចោលដោយ​អះអាង​ថា រដ្ឋធម្មនុញ្ញ​មិន​តម្រូវ​ឲ្យធ្វើ​បែបនេះ ។​

​យ៉ាង​ណា​ក៏​ដោយ​ក្រុម​អង្គការ​សង្គម​ស៊ីវិល បាន​ចាត់ទុកថា សេចក្តីព្រាងច្បាប់​ស្តីពី​កំណែទម្រង់​ប្រព័ន្ធ​តុលាការ ដែល​សភា​បាន​អនុម័ត​នេះ បំពាន​លើ​គោ​ការណ៍​នៃ​ការបែងចែក​អំណាច និង​ឯករាជ្យភាព​របស់​តុលាការ​ដែល​ចែង​ក្នុង​មាត្រា​៥១​ មាត្រា​១២៨ ​និង​មាត្រា​១៣២​នៃ​រដ្ឋធម្មនុញ្ញ​។ ព្រម​គ្នា​នោះ ក៏​បំពាន​លើ​ច្បាប់​និង​បទដ្ឋាន​អន្តរជាតិ​មួយ​ចំនួន នៃ​កតិកា​រសញ្ញា​អន្តរជាតិ​ស្តីពី​សិទ្ធិ​ពលរដ្ឋ និង​សិទ្ធិ​នយោបាយ ដែល​ធានា​អំពី​សាលាជម្រះក្តី​ឯករាជ្យ និង​ឥត​លម្អៀង៕