វិបត្តិ
នយោបាយរបស់ប្រទេសថៃ ហាក់កំពុងបង្កើនសំពាធបន្ថែមទៀតមកលើកម្ពុជា
នៅពេលដែលលោកអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់
សម្លឹងមើលប្រទេសកម្ពុជាដើម្បីបោះទីតាំងរដ្ឋាភិបាលនិរទេសមួយ។
រដ្ឋធម្មនុញ្ញរបស់កម្ពុជា
និងធម្មនុញ្ញារបស់អាស៊ានមិនអនុញ្ញាតអោយកម្ពុជាទទួលយកគម្រោង
របស់លោកថាក់ស៊ីនដែលជាមិត្តភក្តិរបស់លោកនាយករដ្ឋមន្ត្រីហ៊ុន
សែនក៏ពិតមែន តែអ្នកវិភាគអត្ថាធិប្បាយកផ្ទុយទៅវិញថា
កម្ពុជាអាចមានលទ្ធភាពធ្វើការងារទាំងនេះពីក្រោយឆាក
ដើម្បីនិយាយលើកស្ទួយលទ្ធិប្រជាធិបតេយ្យនៅក្នុងប្រទេសថៃ
និងនៅក្នុងតំបន់។
អ្នកនាំពាក្យរដ្ឋាភិបាលកម្ពុជា លោក ខៀវ កាញារីទ្ធ បានបញ្ជាក់ជាសាធារណៈហើយថា កម្ពុជាមិនអាចអនុញ្ញាតអោយគណបក្សភឿថៃបង្កើតរដ្ឋាភិបាលនិរទេសនៅលើ ទឹកដីកម្ពុជានោះឡើយ។ អ្នកនាំពាក្យក្រសួងមហាផ្ទៃ លោកនាយឧត្តមសេនីយ ខៀវ សុភ័គ ក៏បានលើកយកមាត្រា៥៣នៃរដ្ឋធម្មនុញ្ញរបស់កម្ពុជាដែលចែង មិនអនុញ្ញាតអោយកម្ពុជាជ្រៀតជ្រែកកិច្ចការផ្ទែក្នុងប្រទេសដទៃឡើយ។ ចំណែកឯលោក ឯម សុវណ្ណារ៉ា ដែលជាប្រធានផ្នែកទំនាក់ទំនងអន្តរជាតិ និងសន្តិសុខនៃរាជបណ្ឌិតសភាកម្ពុជាវិញ លោកក៏បានបញ្ជាក់ថា ធម្មនុញ្ញអាស៊ានក៏មិនអនុញ្ញាតអោយកម្ពុជាធ្វើតាមការចង់បានរបស់លោក ថាក់ស៊ីន ស៊ីណាវ៉ាត់ឡើយ។ ប៉ុន្តែសម្រាប់លោកឯម សុវណ្ណារ៉ា មនុស្សភាគច្រើនអាចដឹងកម្ពុជានឹងធ្វើការងារខ្លះនៅពីក្រោយរូបភាព ផ្លូវការ ទាក់ទងនឹងវិបត្តិនយោបាយក្នុងប្រទេសថៃ។
«វាអាស្រ័យលើភាពប៉ិនប្រសព្វរបស់ថ្នាក់ដឹកនាំរបស់កម្ពុជា។ កម្ពុជាមានសារៈប្រយោជន៍ក្នុងការធ្វើការងារនេះនៅពីក្រោយឆាក ដើម្បីលើកស្ទួយលទ្ធិប្រជាធិបតេយ្យនៅក្នុងតំបន់និយាយជារួម និងលើកស្ទួយលទ្ធិប្រជាធិបតេយ្យនៅក្នុងប្រទេសថៃនិយាយដោយឡែក»។ នេះជាការពន្យល់របស់លោក ឯម សុវណ្ណារ៉ា។
ប្រសិនបើលោកអតីតនាយករដ្ឋមន្ត្រីថៃថាក់ស៊ីន ស៊ីណាវ៉ាត់ ត្រូវបានគេដឹងលឺថាជាមិត្តភក្តិជិតស្និទ្ធរបស់លោកនាយករដ្ឋមន្ត្រី ខ្មែរ ហ៊ុន សែន នោះ ប្រធានផ្នែកទំនាក់ទំនងអន្តរជាតិនៃរាជបណ្ឌិតសភាកម្ពុជាដដែលបាន រម្លឹកឡើងវិញថា រដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា និងជាសម្ព័ន្ធមិត្តជាមួយគណបក្សភឿថៃរបស់លោកថាក់ស៊ីននោះ ធ្លាប់បានជួយលោកថាក់ស៊ីនដោយប្រយោលជាច្រើនលើកមកហើយដែរ។ ប៉ុន្តែសម្រាប់លោក ឯម សុវណ្ណារ៉ា ក្នុងករណីបច្ចុប្បន្នរបស់ប្រទេសថៃ កម្ពុជាក៏គួរស្វែងរកការគាំទ្រពីសហគមអន្តរជាតិថែមទៀត ចំពោះមុខវិបត្តិនៅក្នុងប្រទេសថៃ។
បើនិយាយថា កម្ពុជាកំពុងមានសំពាធពីវិបត្តិនៅក្នុងប្រទេសជិតខាងដែលត្រូវ ការជួយជ្រោមជ្រែងពីកម្ពុជានោះ អ្នកវិភាគសង្គមនយោបាយខ្មែរ លោក កែម ឡី បាននិយាយបញ្ជាក់ត្រង់ៗតែម្តងថា អ្នកដែលមានសំពាធពិតប្រាកដ គឺមេដឹកនាំរបស់កម្ពុជា តែមិនមែនជាកម្ពុជាទាំងមូលទេ។ លោក កែម ឡី បានពន្យល់ថា៖«យើងរៀបការស៊ីជម្រៅជាមួយវៀតណាម ជាមួយចិន និងជាមួយថាក់ស៊ីន។ បើយើងជួយយួន យើងនឹងមានបញ្ហាសេដ្ឋកិច្ច ដោយសារមានយើងប្រើប្រាស់ជំនួយចិនច្រើន។ ប៉ុន្តែប្រសិនបើយើងជួយចិន យើងអាចមានបញ្ហាជាមួយជាមួយវៀតណាម។ ងាកមកលោកថាក់ស៊ីនវិញ យើងមិនបានធ្វើមិត្តភក្តិជាមួយប្រទេសថៃទេ តែយើងធ្វើមិត្តភក្តិជាមួយបុគ្គល ដូច្នេះវាអាចខាតបង់ប្រយោជន៍ដល់ប្រជាជនខ្មែរ ប្រសិនបើពលរដ្ឋថៃភាគច្រើនមិនចូលចិត្តលោកថាក់ស៊ីន»។
អ្នកវិភាគសង្គមនយោបាយរូបនេះបានអត្ថាធិប្បាយថា រដ្ឋាភិបាលកម្ពុជាគួរអនុវត្តសេចក្តីព្រមព្រៀង ឬសេចក្តីប្រកាសរបស់អាស៊ាន ដើម្បីរក្សាជំហរ និងផលប្រយោជន៍របស់កម្ពុជា៕
មាត្រា ៥៣ នៃរដ្ឋធម្មនុញ្ញកម្ពុជា
ព្រះរាជាណាចក្រកម្ពុជាប្រកាន់ខ្ជាប់ជានិច្ចនូវនយោបាយអព្យាក្រិត អចិន្ត្រៃយ៍និងមិនចូលបក្សសម្ព័ន្ធ។ ព្រះរាជាណាចក្រកម្ពុជា រួមរស់ដោយសន្តិសហវិជ្ជមានជាមួយប្រទេស ជិតខាង និងប្រទេសដ៏ទៃទៀតទាំងអស់លើសកលលោក។ ព្រះរាជាណាចក្រកម្ពុជាមិនឈ្លានពានប្រទេសណាដាច់ខាត មិនជ្រៀតជ្រែកកិច្ចការផ្ទៃក្នុងនៃប្រទេសដ៏ទៃដោយផ្ទាល់រឺដោយ ប្រយោលទោះបីក្រោមរូបភាពណាក៏ដោយដោះស្រាយរាល់បញ្ហាដោយសន្តិវិធី និងគោរពផលប្រយោជន៍ផងគ្នាទៅវិញទៅមក។ព្រះរាជាណាចក្រកម្ពុជាមិន ចងសម្ព័ន្ធយោធា រឺចូលក្នុងកិច្ចព្រមព្រៀងយោធាណាមួយដែលមិនស្របនឹងអព្យាក្រឹតភាព របស់ខ្លួនទ្បើយ។ ព្រះរាជាណាចក្រកម្ពុជាមិនអនុញ្ញាតឱ្យមានមូលដ្ឋានយោធាបរទេសលើទឹកដី របស់ខ្លួន ហើយក៏មិនអនុញ្ញាតឱ្យមានមូលដ្ឋានរបស់ខ្លួននៅបរទេសដែរលើកលែងតែក្នុង ក្របខ័ណ្ឌនៃសំណូមពររបស់អង្គការសហប្រជាជាតិ។ ព្រះរាជាណាចក្រកម្ពុជារក្សាសិទ្ធិទទួលយកជំនួយបរទេសជាសម្ភារៈយោធា អាវុធ គ្រាប់រំសេវ ការហ្វឹកហ្វឺនកងកម្លាំងប្រដាប់ អាវុធ និងជំនួយផ្សេងៗទៀតដើម្បីការពារខ្លួន និងធានាសណ្តាប់ធ្នាប់ និងសន្តិសុខសាធារណៈនៅផ្ទៃក្នុងប្រទេស។
No comments:
Post a Comment
yes