សមត្ថកិច្ចស្រុកសំរោងទង ខេត្តកំពង់ស្ពឺ នៅថ្ងៃចន្ទនេះ បានបើកការស៊ើបអង្កេត ទៅលើទីតាំងមួយ ក្នុងឃុំគ្រាំងអំពិល ដែលគណបក្សសង្គ្រោះជាតិ បានរកឃើញសាកសពដុតចោលនៅក្នុងព្រៃ ហើយសង្ស័យថា ជាកម្មករម្នាក់រងរបួសធ្ងន់ ដោយសារការបង្ក្រាបលើផ្លូវវ៉េងស្រេង កាលពីថ្ងៃទី៣មករា ។
សកម្មជនគណបក្សសង្គ្រោះជាតិ បានប្រទះឃើញលលាដ៏ក្បាល និងឆ្អឹងនៅកន្លែងដុតសាកសពមួយក្នុងស្រុកសំរោងទង ដែលគេសង្ស័យថា អាចជាឆ្អឹងសពរបស់កម្មករ ឃឹម សុផាត អាយុ ១៦ឆ្នាំដែលបានបាត់ខ្លួន ក្នុងអំឡុងការបង្ក្រាបដ៏បង្ហូរឈាមដោយកងកម្លាំងរបស់រដ្ឋាភិបាល។
អធិការរងនគរបាលស្រុកសំរោងទង លោក ម៉ិច សុភ័ណ្ឌ ប្រាប់VOD នៅព្រឹកថ្ងៃចន្ទ នេះថា លោកទើបតែបាន ជ្រាបព័ត៌មាននេះទេ ហើយក្រុមការងាររបស់លោករួមទាំងថ្នាក់ខេត្ត និងស្រុកចំនួនពីរ បាននិងកំពុងនាំគ្នាទៅកាន់តាំងកើតហេតុ ដើម្បីធ្វើកោសល្យវិច្ច័យ «ព័ត៌មាននេះខ្ញុំទើបតែដឹងប្រហែលជាមួយម៉ោងមុនដែរ ក៏ប៉ុន្តែយើងជិតមកដល់ចំនុចហ្នឹងហើយ យើងបានកំពុងតែសហការជាមួយខាងខេត្ត និងស្រុក ប៉ុន្តែយើងមិនទាន់បានដល់កន្លែងកើតហេតុទេ ហើយក៏យើងអត់ទាន់ដឹងថា ជាអ្វីមួយនៅឡើយទេ ចាំមើលខ្ញុំ និងជំនាញទៅដល់កន្លែងកើតហេតុសិន។»
បេក្ខជនជាប់ឆ្នោតគណបក្សសង្គ្រោះជាតិ ខេត្តកំពង់ស្ពឺ លោក នុត រំដួល មានប្រសាសន៍ថា កាលពីថ្ងៃទី៤ ខែមករា អ្នកភូមិម្នាក់ បានរាយកាណ៍ទៅលោកថា មានរថយន្តមួយគ្រឿង បានបើកទាំងយប់ ចូលក្នុងព្រៃមួយ ជិតបន្ទាយទាហាន ស្ថិតក្នុងឃុំគ្រាំងអំពិល ស្របពេលដែលហិង្សាបង្ក្រាបបង្ហូរឈាម នៅផ្លូវវេងស្រេង ។ លោកបន្តថា ក្រុមការ ងារបក្សលោក បានប្រមូលយកកម្ទេចកម្ទីមានឆ្អឹងលលាដ៏ក្បាល ឆ្អឹងស្មងជើងជាដើម យកទៅតម្កល់ទុកនៅស្នាក់ការកណ្តាលបក្សសង្គ្រោះជាតិ ដើម្បីធ្វើការស៊ើបអង្កេតបន្តទៀត «ម៉ោង៩ព្រឹកនេះ ខ្ញុំបានទទួលព័ត៌មានពីប្រជាពលរដ្ឋ ហ្នឹងគាត់ឃើញមានឡានបើកចូលជើងភ្នំហ្នឹង ដុតស្អីគាត់មិនដឹងទេ គាត់ឃើញនាំគ្នាដុត ដុតទៅឃើញមានភ្លើងទាំងយប់។ ម៉ោង៩ព្រឹកថ្ងៃទី៤ គាត់តេមកប្រាប់ខ្ញុំ ហើយខ្ញុំក៏មិនសូវចាប់អារម្មណ៍ដែរ មិនដឹងថាជាឡានស្អី ខ្ញុំក៏បានប្រាប់ប្រជាពលរដ្ឋ ផ្សព្វផ្សាយទៅសកម្មជនគណបក្សសង្គ្រោះជាតិ ឲ្យជួយមើលក្រែងប្រទះឃើញនៅកន្លែងណា ព្រោះថ្ងៃ៣នោះមានបាញ់សម្លាប់ កម្មករនៅសួនកាណាឌីយ៉ា។»
កម្មករកាត់ដេរវ័យជំទង់ម្នាក់ឈ្មោះ ឃឹម សុផាត អាយុ១៦ ឆ្នាំបានបាត់ខ្លួន បន្ទាប់ពីការបង្ក្រាបដ៏បង្ហូរឈាម នៅលើផ្លូវវ៉េង ខណៈដែលកម្មកររូបនោះ ត្រូវបានកម្មកររួមការងារអះអាងថា ត្រូវបានបាញ់ឲ្យរបួស ហើយត្រូវកងកម្លាំងរដ្ឋាភិបាលលើកបោះចូលទៅលើឡានហើយដឹកចេញទៅបាត់កាលពីថ្ងៃទី៣ខែមករា ៕
No comments:
Post a Comment
yes