គណបក្សសង្គ្រោះជាតិ រាជធានីភ្នំពេញ រៀបចំរចនាសម្ព័ន្ធ បេក្ខជន និងវគ្គបណ្តុះបណ្តាល ដើម្បីឆ្ពស់ទៅដឹកនាំមូលដ្ឋាន និងប្រទេសនៅពេលខាងមុខ

ដោយ៖វីរជន

គណបក្សសង្គ្រោះជាតិ រាជធានីភ្នំពេញ បាននឹងកំពុងតែពង្រឹង រៀបចំរចនាសម្ព័ន្ធ ប្រមូលកម្លាំង រួមទាំងការបើកវគ្គបណ្តុះបណ្តាល ដើម្បីឈានទៅដឹកនាំមូលដ្ឋាន និងប្រទេសជាតិ​នៅពេលខាង​មុខ ដែលប្រកបដោយថ្នាក់ដឹកនាំដែលមានចំណេះ និងជំនាញយ៉ាងពិតប្រាកដ ។

នេះគឺជាការលើកឡើងរបស់លោក ម៉ន ផល្លា ប្រធានគណៈកម្មាធិការប្រតិបត្តិគណបក្សសង្គ្រោះ ជាតិ រាជធានីភ្នំពេញ ក្នុងឱកាសប្រជុំបូកសរុបការងារ សង្កាត់ទាំង៩៦ និង១២ខណ្ឌ នៅរសៀល ថ្ងៃទី២១ ខែតុលា ឆ្នាំ២០១៥ នាទីស្នាក់ការកណ្តាលគណបក្សសង្គ្រោះជាតិ ។

ដូចគ្នានេះ លោក ម៉ន ផល្លា ក៏បានជំរុញឲ្យសង្កាត់នៃខណ្ឌនីមួយៗ ត្រូវបន្ថែមក្នុងការរៀបចំរច​នាសម្ព័ន្ធភូមិទាំង៩២០ភូមិ ក៏ដូចជាបេក្ខភាពរបស់បេក្ខជន សម្រាប់ការឈរឈ្មោះបោះឆ្នោត ជ្រើសរើស ក្រុម​ប្រឹក្សាឃុំសង្កាត់​​ នៅឆ្នាំ២០១៧ខាងមុខ ឲ្យបានមុនបំណាច់ខែវិឆ្ឆិការ​​ ២០១៥​នេះ រួមទាំង​ការជម្រុញ និងការចុះជួយដល់ពលរដ្ឋ សម្រាប់ការធ្វើអត្តសញ្ញាណប័ណ្ណ ដែល​បំរើ​ដល់​​ការចុះឈ្មោះ និងការបោះឆ្នោតនាពេលខាងមុខនេះផងដែរ ។

ដូចគ្នានេះ លោក ម៉ន ផល្លា ក៏បានស្នើឲ្យថ្នាក់ដឹកនាំគណបក្សសង្គ្រោះជាតិ រាជធានីភ្នំពេញទាំង អស់ ត្រូវមានវិធានការទប់ស្តាត់ និងនយោបាយប្រជាភិថុតិរបស់គណបក្សមួយចំនួនទាំងគណ​បក្សចាស់វស្សា និងគណបក្សខ្ចីវស្សា ដើម្បីរក្សាកម្លាំងសង្គ្រោះជាតិឲ្យរឹងមាំដដែល ដោយមិន​ត្រូវទន់ជ្រាយតាមនយោបាយញុះញង់បំបែកបំបាក់របស់អ្នកទាំងនោះឡើយ ។

ការលើកឡើងរបស់លោក ម៉ន ផល្លា ដូចគ្នា ដោយហេតុថាសម្រាប់ការដឹកនាំមូលដ្ឋាន និងប្រ​ទេសជាតិ នៅឆ្នាំ២០១៧ និងឆ្នាំ២១៨ គឺ​មានតែគណបក្សសង្គ្រោះជាតិ តែមួយប៉ុណ្ណោះ ដែល​ការ​គាំទ្ររបស់ពលរដ្ឋមកលើគណបក្សនៅតែរឹងមាំ និងមានកម្លាំងកាន់តែខ្លាំងឡើងៗ ដោយ គណបក្សសង្គ្រោះជាតិ មិនក្បត់ឆន្ទៈរាស្រ្ត មិនយកខ្មែរណាជាសត្រូវ តម្កល់ផលប្រយោជន៏របស់ ជាតិ និងពលរដ្ឋជាធំ ដើម្បីដឹកនាំនាវាកម្ពុជាឆ្ពស់ទៅរកការរីកចំរើន ជឿនលឿនពិតប្រាកដ ៕