សំទុះចលនានៃគណបក្សប្រឆាំងនៅលើពិភពលោក កំពុងតែវិវត្តន៍ខ្លួន ក្លាយជាអ្នកដឹកនាំប្រទេស តាមរយៈការផ្លាស់ប្ដូរបែបប្រជាធិបតេយ្យ

ដោយ៖សស៊ីណា

របត់នយោបាយរបស់ប្រទេសសេរីនិយម កំពុងតែមានការវិវឌ្ឍន៍គួរឲ្យកត់សម្គាល់ និងបានផ្ដល់ ឱកាស សម្រាប់មេដឹកនាំគណបក្សប្រឆាំង ដើម្បីឈានទៅរកការផ្លាស់ប្ដូរសមាសភាព ថ្នាក់ដឹក នាំរដ្ឋពិតប្រាកដនៅក្នុងសង្គម ។ ជាក់ស្ដែងគណបក្សសេរីនិយម ដែលជាគណបក្សប្រឆាំង​ធំ​មួយ​នៅ​កាណាដា ដឹកនាំដោយ​លោក Justin Trudeau បានក្លាយជានាយករដ្ឋមន្រ្ដីវ័យ​ក្មេងបំផុត​នៅក្នុងប្រទេសរបស់ខ្លួន។

ក្រោយទទួលបានលទ្ធផលជោគជ័យ លោក Justin Trudeau បានថ្លែង​សារនយោបាយ​ច្បាស់ៗ​ថា នេះជាពេលវេលានៃការផ្លាស់ប្ដូរ ហើយលោកឆ្លៀតឱកាសនេះ ថ្លែង​អំណរគុណដល់​ប្រជា​ពល​រដ្ឋកាណាដា ដែលបានបោះឆ្នោតគាំទ្ររូបលោក ឲ្យក្លាយជានាយក​រដ្ឋ​មន្រ្ដីកាណាដា​ផង​ដែរ​។

ស្របពេលដែលលោក Justin Trudeau ឈ្នះឆ្នោតក្លាយជានាយករដ្ឋមន្រ្ដីថ្មីរបស់កាណាដា  អតី​ត​នាយករដ្ឋមន្រ្ដីនិងជាគណបក្សដៃគូរប្រកួតប្រជែង លោក Stephen Harper បានអបអរ​សាទ​រ​ចំពោះជោគជ័យ និងគោរពការសម្រេចចិត្តរបស់ប្រជាពលរដ្ឋកាណាដា​ដែលបាន​បោះ​ឆ្នោត​ជូន​គណបក្សប្រឆាំងដែលដឹកនាំដោយលោក Justin Trudeau។

ទាក់ទិននឹងការឈ្នះឆ្នោតរបស់គណបក្សប្រឆាំងនៅកាណាដានេះ គឺជាសញ្ញាណថ្មីនៃរបត់​នយោ​បាយ សម្រាប់ចលនារបស់គណបក្សប្រឆាំង និងជាគំរូសម្រាប់គណបក្សប្រឆាំង​នានា​នៅ​លើពិភពលោក សម្រាប់ការផ្លាស់ប្ដូរ ជាពិសេសនៅក្នុងតំបន់អាស៊ីអាគ្នេយ៍។

បើសិនជាយើងក្រលេកមើលទិដ្ឋភាពទូទៅ និងសកម្មភាពនានានៃការតស៊ូប្រយុទ្ធប្រឆាំង​ទាម​ទារ​ឲ្យអនុវត្តន៍លទ្ធិប្រជាធិបតេយ្យ របស់មេដឹកនាំគណបក្សប្រឆាំងអាស៊ីអាគ្នេយ៍ យើង​នឹង​ឃើញ​ពីសំទុះ និងចលនាគាំទ្រយ៉ាងខ្លាំងក្លាពីសំណាក់ប្រជាពលរដ្ឋ ជាក់ស្ដែងប្រធានគណបក្ស​សម្ព័ន្ធជាតិដើម្បីលទ្ធិប្រជាធិបតេយ្យ ដែលជាគណបក្សប្រឆាំងធំបំផុតនៅមីយ៉ាន់ម៉ាគឺលោកស្រី អ៊ុងសាន ស៊ូជី បានប្រឹងប្រែងឲ្យប្រទេសរបស់ខ្លួនគោរព និងអនុវត្តតាមបែប​លទ្ធិប្រជាធិ​ប​តេយ្យ​ពិតប្រាកដ ដើម្បីឈានដល់ការដឹកនាំជាតិសម្រាប់ពេលខាងមុខ។

ជុំវិញករណីនេះដែរ ចលនាគណបក្សប្រឆាំងនៅប្រទេសកម្ពុជា គណបក្សសង្គ្រោះជាតិ​ដែល​មាន​លោកប្រធាន សម រង្ស៊ី និង​អនុ​ប្រធាន កឹម សុខា ក៏បានធ្វើឲ្យមានសំទុះចល​នាយ៉ាង​ខ្លាំង​ក្លា​ដឹកនាំប្រជាពលរដ្ឋខ្មែរតស៊ូ ដើម្បីការផ្លាស់ប្ដូរនៅក្នុងសង្គមកាលពីឆ្នាំ២០១៣ ហើយចលនានេះ​នឹងបន្ដរហូតដល់មានការផ្លាស់ប្ដូរមួយពិតប្រាកដតាមរយៈការបោះឆ្នោតបែបប្រជាធិបតេយ្យ ដូច​នៅប្រទេសកាណាដាពេលនេះផងដែរ។

គួរជម្រាបថា បច្ចុប្បន្នចលនាគណបក្សប្រឆាំងជាច្រើនប្រទេសនៅលើពិភពលោក​នេះកំពុង​តែ​មានសំទុះយ៉ាងខ្លាំងក្លា និងទទួលបានជោគជ័យជាបន្ដបន្ទាប់ ដើម្បីចូលខ្លួនជាប្រមុខដឹកនាំរដ្ឋ ដែលជំរុញឲ្យមានការផ្លាស់ប្ដូរសមាសភាពថ្នាក់ដឹកនាំរដ្ឋ ស្របតាមគោលការណ៍​ប្រជាធិបតេ​យ្យ​សេរី ៕