លោកប្រធានស្ដីទី កឹម សុខា បញ្ជាក់ពីគោលជំហររបស់គណបក្សសង្រ្គោះជាតិ ចំពោះមន្រ្ដីសាធារណៈ ថាកុំឲ្យមានការព្រួយបារម្ភ ឬភ័យខ្លាចពីសមាសភាពរបស់ខ្លួន

ដោយ៖ សស៊ីណា

លោកប្រធានស្តីទី កឹម សុខា បានបង្ហាញពីគោលជំហរនយោបាយរបស់គណបក្សសង្រ្គោះជាតិ និងគោលការណ៍ទូទៅនៃរបបលទ្ធិប្រជាធិបតេយ្យ សេរីពហុបក្សនៅលើសកលលោក ស្ដីពី​ការ​ធា​នាឯករាជ្យភាព អព្យាក្រឹត្យភាព នៃមុខងាររបស់មន្រ្ដីសាធារណៈនៅកម្ពុជា។

យោងតាមទំព័រហ្វេកបុកផ្លូវការរបស់លោកប្រធានស្ដីទី កឹម សុខា ចុះផ្សាយនៅថ្ងៃទី២០ ខែតុលា ឆ្នាំ២០១៥ បានឆ្លើយតបនឹងប្រតិកម្មរបស់លោក ហ៊ុន សែន ដែលបានលើកឡើងក្នុ​ងពិធីចែក​សញ្ញាបត្រ ដល់និស្សិតនៅវិទ្យាស្ថានអប់រំនៅថ្ងៃទី១៩ ខែតុលា ឆ្នាំ២០១៥ ដែលបានរិះគន់សារ​នយោបាយរបស់លោកប្រធាន និងអនុប្រធាន ព្រមទាំងជំរុញឲ្យប្រធានគណបក្ស​សង្រ្គោះជាតិ​គោរពការសន្យារបស់ខ្លួន ចំពោះការមិនផ្លាស់ប្ដូរសមាសភាព និងតួនាទី មន្រ្ដីក្នុងរបបចាស់ បើ​មិនចង់មានភាពវឹកវរ ហើយប្រយ័ត្នមន្រ្ដីក្នុងរបបចាស់មិនសុខចិត្ដហើយប្រើកម្លាំង ដើម្បីតតាំង​ក្នុងការរក្សាតួនាទីរបស់ពួកគេ បើលោកប្រធាន សម រង្ស៊ី មិនគោរពការសន្យានោះ។

ពាក់ព័ន្ធនឹងករណីនេះ លោកប្រធានស្ដីទី កឹម សុខា ក៏បានអះអាង និងឆ្លើយតបចំពោះការ​លើក​ឡើងរបស់លោក ហ៊ុន សែន និងពន្យល់ជូនមន្រ្ដីសាធារណៈទូទាំងប្រទេសថា យោងតាម​រដ្ឋ​ធម្ម​នុញ្ញ នៃព្រះរាជាណាចក្រកម្ពុជា ឆ្នា១៩៩៣ មាត្រា ៥១ ព្រះរាជាណាចក្រកម្ពុជា​អនុវត្តនយោ​បាយ​ប្រជាធិបតេយ្យ សេរីពហុបក្ស ហេតុនេះការផ្លាស់ប្ដូរប្រមុខរាជរដ្ឋាភិបាល ឬមេដឹកនាំរដ្ឋ​ជារឿងធម្មតា និងទូទៅ ទៅហើយ សម្រាប់សង្គមដែលអនុវត្តប្រជាធិបតេយ្យ និងច្បាប់​ពិបា្រក​ដ។

លោកក៏បានបន្ដទៀតថា ការផ្លាស់ប្ដូរសមាសភាពអ្នកនយោបាយ ដែលជាក្បាលម៉ាស៊ីនដឹក​នាំ​រដ្ឋនេះ វាមិនប៉ះពាល់នឹងសមាសភាពមន្រ្ដីសាធារណៈនោះឡើយ ហើយគ្មានការផ្លាស់ប្ដូរ ឬដក​ចេញពីមុខងារមន្រ្ដីសាធារណៈដោយសារការប្ដូរមេដឹកនាំរដ្ឋនោះផងដែរ ហេតុនេះ គណបក្ស​សង្រ្គោះជាតិ គោរពរដ្ឋធម្មនុញ្ញ ច្បាប់ និងបទដ្ឋានគតិយុត្តិផ្សេងៗទៀត ដើម្បីធានានិរន្ដភាព ស្ថេរ​ភាពនយោបាយ ប្រជាធិបតេយ្យ នីតិរដ្ឋ អព្យាក្រឹត្យ ដើម្បីទទួលបានយុត្តិធម៌ និងការអភិ​វឌ្ឍន៍​ពិតប្រាកដនៅក្នុងសង្គមខ្មែរប្រកបដោយសន្ដិភាព។

ដូចនេះ មន្រ្ដីសាធារណៈមិនគួរព្រួយបារម្ភ ឬភ័យខ្លាចថាមានការផ្លាស់ប្ដូរ ឬដកចេញ ឬបញ្ឈប់​ពីមុខងាររបស់ខ្លួន ដោយសារការផ្លាស់ប្ដូរមេដឹកនាំនយោបាយឡើយ ព្រោះគណបក្ស​សង្រ្គោះ​ជាតិ គោរពរដ្ឋធម្មនុញ្ញ ច្បាប់ និងបទដ្ឋានគតិយុត្ដផ្សេង ដើម្បីការអភិវឌ្ឍន៍ដោយត្រឹមត្រូវ និង​ពិតប្រាកដ ។ ហេតុនេះ មន្រ្ដីសាធារណៈ កុំមានការភ័យខ្លាច បាក់ទឹកចិត្តចំពោះការលើកឡើង​របស់អ្នកនយោបាយក្រាញ់អំណាចណាម្នាក់ឲ្យសោះ ប្រសិនបើមន្រ្ដីសាធារណៈ​មានអារម្មណ៍​ថាខ្លាចនោះ វានឹងនាំឲ្យប្រទេសជាតិខាតបង់ប្រយោជន៍យ៉ាងធំ។

គួរជម្រាបផងដែរថា ថ្មីៗនេះលោក ហ៊ុន សែន តែងតែលើកឡើងជុំវិញករណីដែល​គណ​បក្ស​សង្រ្គោះជាតិ ឈ្នះឆ្នោតដឹកនាំរដ្ឋ រួមទាំងមានប្រតិកម្មតបចំពោះសារនយោបាយរបស់​មន្រ្ដីជាន់​ខ្ពស់គណបក្សសង្រ្គោះជាតិ ជានិច្ច ។​

នេះបញ្ជាក់កាន់តែច្បាស់ថា លោក ហ៊ុន សែន ដឹងខ្លួនយ៉ាងច្បាស់ថា​នឹងចាញ់ឆ្នោត​នៅឆ្នាំ២០​១៨​ខាងមុខ ដោយសារតែប្រជាពលរដ្ឋខ្មែរ លោកកាន់តែយល់ដឹង និងចូលរួមសកម្មភាពសង្គម​នានាជាច្រើន ដើម្បីចង់បានការផ្លាស់ប្ដូរមេដឹកនាំពិតប្រាកដ ស្របតាមគោលការណ៍​ប្រជាធិប​តេយ្យសេរីពហុបក្ស ៕