លោក យ៉ែម បុញ្ញឫទ្ធិ ជំរុញឲ្យយុវជន សិស្ស និស្សិត និងប្រជាពលរដ្ឋខ្មែរ បង្កើតវប្បធម៌នៃការអាន ដើម្បីការអភិវឌ្ឍន៍ទាំងអស់គ្នា

ដោយៈ សស៊ីណា

វិស័យអប់រំ គឺជាមូលដ្ឋានគ្រឹះ សម្រាប់ការអភិវឌ្ឍន៍ខ្លួនឯង និងប្រទេសជាតិ ហើយក៏គ្មាន ការ អភិវឌ្ឍន៍ប្រទេសណាមួយ ដែលមិនមានការចូលរួមចំណែក ពីការអប់រំដែរ ហេតុ​នេះ​ហើយ ទើបរដ្ឋទំនើបៗ និងអ្នកដឹកនាំជាតិ តែងតែយកចិត្តទុកដាក់ខ្ពស់ និង ជំរុញ​ឲ្យប្រជា​ពល​រដ្ឋ របស់ខ្លួន បង្កើតវប្បធម៌នៃការអានគ្រប់ទីកន្លែង និងគ្រប់ពេលវេលា ដើម្បីបង្កើន​នូវ​ចំណេះ ដឹងឲ្យបានទូលំទូលាយ ជាពិសេសបណ្ដុះនូវផ្នត់គំនិត​មនុស្សគ្រប់​ជំ​នាន់ ឲ្យចេះ​ស្រ​លាញ់ ជាតិ និងចូលរួមសកម្មភាពសង្គម ប្រកបដោយឧត្ដមគតិ មនសិការតាមបែប​ប្រជាធិបតេយ្យ។

លោក យ៉ែម បុញ្ញឫទ្ធិ ប្រធានគណៈទី៧ នៃរដ្ឋសភា អប់រំ យុវជនកីឡា ធម្មការ កិច្ចការ សាស​នា វប្បធម៌ និងទេសចរណ៍ បានលើកឡើងតាមបណ្ដាញសង្គម ហ្វេសបុកផ្លូវការ របស់លោក​កាលពីថ្ងៃទី១៤ ខែធ្នូ ឆ្នាំ២០១៥ ថា ប្រទេសកម្ពុជាយើង ធ្លាប់ឆ្លងកាត់សម័យ​អន្ដរកាល រង​នូវ​ការ​ឈឺចាប់ ទុក្ខលំបាក ដោយសារតែការបាត់បង់នូវធនធានមនុស្ស វប្បធម៌ ទំនាមទំលាប់ ប្រពៃ​ណី សាសនា និងប្រព័ន្ធរដ្ឋបាលគ្រប់គ្រងប្រទេសមួយចំនួនធំ ដែលទាំងអស់នេះ បាន​ជះ​ឥទ្ធិពលជាអវិជ្ជមាន និងជួបប្រទះនូវបញ្ហាស្មុគស្មាញជាច្រើន ដូចដែលយើងទាំងអស់គ្នា​បានដឹង បានឃើញ នាពេលបច្ចុប្បន្ននេះ។

ដោយសារប្រទេសកម្ពុជា ជួបប្រទះនូវបញ្ហាធនធានមនុស្សនេះហើយ ទើប​លោក យ៉ែម បុញ្ញ​ឫទ្ធិ បានបន្ដជំរុញឲ្យក្រសួងអប់រំ យុវជន និងកីឡា រួមជាមួយប្រមុខរាជរដ្ឋាភិបាល​ បង្កើនការ​យកចិត្ដទុកដាក់លើវិស័យអប់រំ និងយុវជន ដែលជាអ្នកបន្ដវេន​បន្ថែមទៀតគ្រប់​ជំនាញ ទោះបី​ជាកន្លងមក ក្រសួងអប់រំ ទទួលបាននូវភាពវិជ្ជមានពីការធ្វើ​កំណែ​ទម្រង់​នេះ​ហើយក្ដី ប៉ុន្ដែ​ការ​អប់រំ និងការបណ្ដុះទំលាប់នៃការអាន ដោយឈរលើគោល​ជំហរនៃ​ភាព​ត្រឹមត្រូវ និងប្រាកដ​និយម ប្រកដដោយសីលធម៌ នៅតែជាចំណុចអាទិភាព ដើម្បីជំរុញឲ្យ​យុវជន និងប្រជាពល​រដ្ឋ ចូលរួមការអភិវឌ្ឃន៍ជាតិ តាមបែបលទ្ធិប្រជាធិបតេយ្យ និង​បញ្ជ្រាបនូវ​ចំណេះដឹង​សាកល​ដល់ពួកគេ ។

គួរជម្រាបផងដែរថា ចំណេះដឹង និងជំនាញនេះហើយ ជាការបញ្ជាក់ពីលទ្ធផលផ្លែផ្កា​នៃវប្ប​ធម៌​​អានសៀវភៅគ្រប់ទីកន្លែង ទៅតាមពេលវេលា និងការរៀបចំឲ្យ​មានព្រឹត្ដិការណ៍​ជាតិ​ធំៗ​ស្ដីពីការអប់រំ ដូចជា កម្មវិធីពិពណ៌សៀវភៅគ្រប់ជំនាញ គ្រប់វិស័យ កាលពីថ្ងៃ​ទី១១-១៣ ខែធ្នូ ឆ្នាំ២០១៥ នៅបណ្ណាល័យជាតិ ក្រោមប្រធានបទ “អានខ្ញុំថ្ងៃនេះ ដើម្បី​ជោគជ័យ​ថ្ងៃស្អែក” គឺ​ជា​គំរូល្អមួយ ក្នុងការបំផុសស្មារតីដល់យុវជន សិស្ស និស្សិត និងប្រ​ជា​ពលរដ្ឋខ្មែរ ឲ្យចាប់យក​ការ​​អានសៀវភៅ ព្រោះវប្បធម៌នៃការអាន ជាមាគ៌ាដឹក​នាំជីវិត​មនុស្ស ឲ្យរីកចម្រើនរុងរឿង ប្រកប​​ដោយភាពថ្លៃថ្នូរក្នុងគ្រួសារ និងប្រទេសជាតិ ហើយជា​ពិសេស​ការអប់រំបែបនេះ ក៏បាន​ផ្សារ​​ភ្ជាប់​ទៅនឹងការអភិវឌ្ឍន៍ បែបលទ្ធិប្រជាធិប​តេយ្យ​ផង​ដែរ ៕