ពលរដ្ឋខ្មែរចាប់ផ្ដើមកែប្រែផ្នត់គំនិត និងចង់ឲ្យមានការផ្លាស់ប្ដូរមួយ ដើម្បីឲ្យ ប្រទេសជាតិ មានការរីកចម្រើន

ដោយ៖ យ៉ន លីណេត

ប្រជាពលរដ្ឋខ្មែរបច្ចុប្បន្ន ចាប់ផ្តើមកែប្រែផ្នត់គំនិតរបស់ខ្លួនដោយផ្លាស់ប្តូរការគិត ឲ្យទៅជា​វិជ្ជ​មាន រៀនគិតពីការអភិវឌ្ឍន៍ ការរីកចម្រើនសម្រាប់ទាំងអស់គ្នា និងសម្រាប់សង្គមជាតិទាំង​មូល​ផងដែរ ។

អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឬទ្ធិ បានសរសេរនៅលើបណ្ដាញ​សង្គម​ហ្វេសប៊ុក ផ្ទាល់របស់លោកថា ពីសម័យកាលមួយ ទៅសម័យកាលមួយ ការវិវត្តន៍នៃផ្នត់គំ​និត​ តែងតែមានទៅតាមកាលៈទេសៈ តាមប្រព័ន្ធផ្សព្វផ្សាយ តាមគ្រួសារ សាលា សាសនា និង​សង្គម ។

លោកបន្តថា បច្ចេកវិទ្យានាពេលបច្ចុប្បន្ន មានការរីកចម្រើនជឿនលឿន យ៉ាងឆាប់រហ័ស ជា​ពិ​សេស ទៅលើការផ្សព្វផ្សាយព័ត៌មានតាមរយៈបណ្តាញសង្គម ហើយអ្នកប្រើប្រាស់បណ្តាញ​សង្គម មានគោលបំណងចង់លើកពីបញ្ហាដែលគេជួបប្រទះ ពីចំណាប់អារម្មណ៍​ទៅលើបញ្ហា​អ្វី​មួយ ដែលពួកគេចង់ឲ្យក្រុមដឹកនាំរកដំណោះស្រាយជូនពួកគេ ។

ជាងនេះទៅទៀត វាជាមធ្យោបាយ ទំនាក់ទំនងផ្លាស់ប្តូរទស្សនៈ ជំនឿ យោបល់ ដែលជាលំ​ហូរ​ព័ត៌មានមួយ ដ៏មានប្រសិទ្ធភាពផងដែរ ។ លោកបានបន្តទៀតថា ប្រជាពលរដ្ឋដែល​មាន​អា​យុតិ​ចជាង៣០ឆ្នាំ មានចំនួនប្រមាណជា៦៥% នៃចំនួនប្រជាពលរដ្ឋខ្មែរសរុប ហើយវាជា​យុគសម័យមួយ ដែលយុវជនមានជំនាញ មានមធ្យោបាយ ក្នុងការប្រើប្រាស់បណ្តាញសង្គម ដែលគេទទួលស្គាល់ថា ឥទ្ធិពលនៃបណ្តាញសង្គម នឹងអាចនាំមកនូវការផ្លាស់ប្តូរ​ផ្នត់គំនិត​ជា​វិជ្ជមាន ដល់ប្រជាជាតិយើងទាំងមូល ។

លោក យ៉ែម បុញ្ញឬទ្ធិ បានបន្តថា ការចូលរួមរបស់ប្រជាពលរដ្ឋ គឺជាមូលដ្ឋានគ្រឹះ ដោយចាប់​ផ្តើមពីការផ្លាស់ប្តូរព័ត៌មាន ចាប់ផ្តើមយកចិត្តទុកដាក់ពីបញ្ហាសង្គម សេដ្ឋកិច្ច និងនយោបាយ ។

ដូចនេះ​ ការទទួលបានព័ត៌មានឆាប់រហ័ស ព័ត៌មានពិត និងព័ត៌មានគ្រប់ជ្រុងជ្រោយ នោះនឹង​

ផ្តល់ឱកាសដល់ប្រជាពលរដ្ឋ អាចធ្វើសេចក្តីសម្រេចចិត្ត ប្រកបដោយ វិចារណញ្ញាណ និង​

ការ​ទទួលខុសត្រូវខ្ពស់ ក្នុងនាមជាពលរដ្ឋថ្លៃថ្នូរ ហើយប្រព័ន្ធផ្សព្វផ្សាយ​មានការទទួល​ខុស​ត្រូវ ក្នុងការចូលរួមចំណែកអប់រំ និងរៀបចំសង្គមឲ្យបានល្អប្រសើរ តាមរយៈអ្នកផ្តល់​ព័ត៌មាន​ដែលមានសីលធម៌ និងមានវិជ្ជាជីវៈពិតប្រាកដ ទាំងអស់នេះហើយ​ដែលធ្វើឲ្យប្រជាពលរដ្ឋខ្មែរ​បច្ចុប្បន្ន ចង់ឲ្យមានការផ្លាស់ប្ដូរមួយដើម្បីឲ្យប្រទេសជាតិមានការរីកចម្រើន រុងរឿង ។

គួរជម្រាបផងដែរថា ថ្នាក់ដឹកនាំគណបក្សសង្រ្គោះជាតិ តែងតែចុះជួប ពង្រឹង និងផ្សព្វផ្សាយ​ព័ត៌មានពិត នៅតាមបណ្ដាខេត្តនានា ដើម្បីបណ្ដុះគំនិត អប់រំ អនុវត្តន៍ ឲ្យមានប្រសិទ្ធភាព ដល់​យុវជន ឲ្យមានចំណេះដឹង ពីព្រោះគុណតម្លៃនៃចំណេះដឹង នាំមកនូវការចេះ​គិតពិចារ​ណា ដឹងខុសត្រូវ ព្រមទាំងនាំមកនូវការសម្រេចចិត្ត មួយប្រកបដោយសីលធម៌ និងគុណធម៌ ក្នុងនាមជាពលរដ្ឋថ្លៃថ្នូរ ៕