ស្ថានការណ៍ខ្មែរ-ថៃនៅតែផុយស្រួយ
ភ្នំពេញៈ សេចក្តីរាយការណ៍ព័ត៌មាន ចេញផ្សាយកាលពីថ្ងៃម្សិលមិញ បានឲ្យដឹងថា អាស៊ានបានចេញសេចក្តីថ្លែងការណ៍កាលពីថ្ងៃសៅរ៍ ដោយបានធ្វើការ «គាំទ្រចំពោះប្រទេសកម្ពុជា និងថៃ ក្នុងការដោះស្រាយបញ្ហាព្រំដែនរបស់ខ្លួនដោយសន្តិវិធី»។
ទីភ្នាក់ងារព័ត៌មានស៊ីនហួ បានដកស្រង់សេចក្ដីថ្លែងការណ៍នោះថា ភាគីទាំងពីរបានបង្ហាញនូវការគោរពរបស់ខ្លួនចំពោះសាលក្រមរបស់តុលាកាក្រុងឡាអេ និងបញ្ជាក់ពីបំណងរបស់ខ្លួនផងដែរក្នុងការអនុវត្តសាលក្រមនោះ។
លោក ផាវិន ចាក់ចាវាលពុងប៉ុន ព្រឹទ្ធាចារ្យនៅវិទ្យាស្ថានសិក្សាពីតំបន់អាស៊ីអាគ្នេយ៍ បានមានប្រសាសន៍តាមរយៈអ៊ីមែល កាលពីថ្ងៃម្សិលមិញថា ស្ថានភាពព្រំដែន កម្ពុជា និង ថៃនៅមានភាពផុយស្រួយនៅឡើយ បើទោះបីតុលាការក្រុងឡាអេ បានបញ្ជាឲ្យភាគីទាំងពីរដកទ័ពចេញពីតំបន់ដែលគ្មានយោធាក៏ដោយ។
លោក បានកត់សម្គាល់ ថា៖ «នៅមានការខឹងសម្បា ជាពិសេសពីខាងភាគីថៃ។ ចូរចងចាំថា រដ្ឋាភិបាលលោក អាភីស៊ីតនៅមិនទាន់ផុតនៅឡើយទេ។ សាលក្រម ICJ ធ្វើឲ្យពួកអ្នកគាំទ្រក្រុមពួកអាវលឿងអាក់អន់ចិត្ដ»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានឲ្យដឹងថា កម្ពុជានៅមិនទាន់ទទួលការឆ្លើយតបពីខាងភាគីថៃនៅឡើយ ចំពោះគម្រោងឲ្យមានការដកកងទ័ពចេញពីប្រាសាទព្រះវិហារព្រមពេលជាមួយគ្នានោះ។
កាលពីថ្ងៃសុក្រសប្តាហ៍មុន លោកនាយករដ្ឋមន្ត្រី ហ៊ុន សែន បានថ្លែងថា រដ្ឋាភិបាលបានបញ្ជូនសេចក្តីព្រាងវិធានការឆ្ពោះ ទៅដកទ័ពចេញពីប្រាសាទព្រះវិហារ ដែលជាគំនិតផ្តួចផ្តើមមួយសម្រាប់កិច្ចព្រមព្រៀងរវាង កម្ពុជានិងថៃ កាលពីថ្ងៃទី២១ខែកក្កដា ទៅរដ្ឋាភិបាលថៃ ឥណ្ឌូនេស៊ី និងសហគមន៍អន្តរជាតិពាក់ព័ន្ធ បន្ទាប់ពីតុលាការយុតិ្តធម៌អន្តរជាតិបានបង្គាប់ កាលពីថ្ងៃទី១៨ ខែកក្កដា ឲ្យកម្ពុជានិងថៃដកកងទ័ពភ្លាមៗចេញពីតំបន់គ្មាន យោធាជាបណ្តោះអាសន្ន នៅប្រាសាទព្រះវិហារ។
លោកនាយករដ្ឋមន្ត្រីបានថ្លែងថា អ្នកអង្កេតការណ៍ឥណ្ឌូនេស៊ី ទាំងកម្ពុជានិងថៃ រួមគ្នាត្រូវកំណត់តំបន់គ្មានយោធា ដើម្បីគោរពតាមសេចក្តីសម្រេចរបស់តុលាការយុតិ្តធម៌អន្តរជាតិពី A, B, C, D និងជំហានបន្ទាប់ត្រូវត្រួតពិនិត្យនិងធ្វើរបាយការណ៍ពី ចំនួនយោធិន និងកំណត់ថ្ងៃដកកងទ័ពចេញព្រមគ្នា។
លោក ហ៊ុន សែន បានបញ្ជាក់ថា៖ «យើងសូមបញ្ជាក់ថា យើងមិនកេងយកប្រយោជន៍ពីភាគីណាមួយទេ យើងត្រូវការសន្តិភាព និងភាពសុខដុមរមនាសម្រាប់ប្រជាជន ហើយការដកកងទ័ពទាំងកម្ពុជានិងថៃ ត្រូវធ្វើនៅពេលតែមួយនិងម៉ោងតែមួយ»។
ការអត្ថាធិប្បាយរបស់លោកនាយករដ្ឋមន្ត្រីធ្វើឡើង បន្ទាប់ពីលោកនាយករដ្ឋមន្ត្រីជិតផុតអាណត្តិថៃ អាភីស៊ីត វេចាជីវ៉ា ត្រូវប្រព័ន្ធផ្សព្វផ្សាយថៃស្រង់សម្តីពីសប្តាហ៍មុន ដែលអំពាវនាវឲ្យកម្ពុជាដកកងទ័ពពីតំបន់វិវាទជាមុន មុនអនុញ្ញាតឲ្យអ្នកអង្កេតការណ៍ឥណ្ឌូនេស៊ីចូលមកកាន់តំបន់ ប្រាសាទព្រះវិហារ។
លោក ហ៊ុន សែន បានឆ្លើយតបថា៖ «លោកនាយករដ្ឋមន្ត្រី អាភីស៊ីត ត្រូវពិនិត្យសេចក្តីសម្រេចទាំងមូលរបស់តុលាការយុតិ្តធម៌អន្តរ ជាតិឲ្យបានល្អិតល្អន់ជាមុន មុនពេលធ្វើសេចក្តីថ្លែងការណ៍។ ឯកឧត្តមត្រូវអនុវត្តឲ្យបានពេញលេញ»។
លោកបានបន្ថែមថា កម្ពុជា និងថៃ ត្រូវសហការជាមួយនឹងអ្នកអង្កេតការណ៍ឥណ្ឌូនេស៊ី និងផ្តល់សេចក្តីលម្អិតទៅតុលាការយុតិ្តធម៌អន្តរជាតិពីចំនួន និងទីតាំងយោធារាប់បញ្ចូលទាំងសព្វាវុធ ប៉ុន្តែ ពុំទាន់បានស្នើកំណត់ពេលនៅឡើយ។
លោក ហ៊ុន សែន បានបញ្ជាក់ទៀតថា អ្នកអង្កេតការណ៍ច្រើនជាង១៥នាក់ នឹងជាតម្រូវការសម្រាប់ភាគីទាំងសងខាង ព្រោះតំបន់ទាំងមូលដែលកំណត់ក្នុងដីការបស់តុលាការ យុត្តិធម៌អន្តរជាតិ មានផ្ទៃក្រឡា១៧គីឡូម៉ែត្រការ៉េជាង ដែលចំនួនអ្នកអង្កេតការណ៍តែ ១៥ នាក់ម្ខាងមិនគ្រប់គ្រាន់នោះទេ។
នៅមុនមានកិច្ចព្រមព្រៀងដកកងទ័ពពីតំបន់ កំណត់ដោយសាលក្រមតុលាការអន្តរជាតិក្រុង ឡាអេឲ្យភាគីទាំងពីរដកទ័ព។
ការប្រយុទ្ធគ្នាខ្លីមួយបានផ្ទុះឡើងរវាងកងទ័ពទាំងពីរ នៅជិតតំបន់ជម្លោះប្រាសាទព្រះវិហារប្រមាណជា១០០គីឡូម៉ែត្រ។
លោក ពក សុផល នាយទាហាននៅស្រុកត្រពាំងប្រាសាទ ខេត្តឧត្តរមានជ័យបានថ្លែងថា ការប៉ះទង្គិចបានកើតឡើងនៅម៉ោង២:៣០នាទីរសៀលប្រមាណជា១០នាទី នៅក្បែរច្រកត្រួតពិនិត្យអន្តរជាតិជាំ នៅជាប់ខេត្តសូរិន្ទ ប្រទេសថៃ។
លោកសុផល បានបញ្ជាក់ថា៖ «យើងបានកំណត់ការប្រជុំ[រវាងទាហានកម្ពុជា និងថៃ] ហើយនៅពេលយើងដើរពួកគេបាញ់មកលើទាហានយើង។ ពួកគេបានត្រៀមបាញ់កាំភ្លើងមកលើយើងមុនដោយចេតនា»។
លោក បន្ថែមថា មេបញ្ជាការកងទ័ពកម្ពុជាបានបញ្ជាទាហានតាមបណ្តោយព្រំដែនឲ្យ ត្រៀមលក្ខណៈឲ្យបានល្អ បង្ការកុំឲ្យមានការប៉ះទង្គិចបន្ថែមទៀត។ ការប៉ះទង្គិចនេះ បានកើតឡើង ក្នុងរយៈពេលតែ៣ថ្ងៃ បន្ទាប់ពីតុលាការយុតិ្តធម៌អន្តរជាតិបង្គាប់ឲ្យកងទ័ពទាំងសងខាងដកចេញពីតំបន់ក្បែរប្រាសាទព្រះវិហារ។
លោកឧត្តមសេនីយ៍ឯក ឈុំ សុជាតិ អ្នកនាំពាក្យក្រសួងការពារជាតិមិនអាចទាក់ទងសុំអត្ថាធិប្បាយបានទេកាលពីម្សិលមិញ។
លោក ផៃ ស៊ីផាន បានមានប្រសាសន៍ថា៖ «ជាផ្លូវការវាមិនមែនការប្រឈមដាក់គ្នារវាងទាហា នកម្ពុជានិងទាហានថៃនោះទេ។ ការស្លាប់នោះមិនបណ្តាលមកពីការប្រយុទ្ធគ្នានោះទេ»។
លោកបានបញ្ជាក់ថា មន្ត្រីរដ្ឋាភិបាលកំពុងស៊ើបអង្កេតពីបញ្ហានេះ ហើយចំពោះរបាយការណ៍ដែលថា មានការប្រយុទ្ធគ្នារវាងទាហានកម្ពុជានិងទាហានថៃនោះ«មិនជាការពិត» ទេ។
ទោះជាយ៉ាងណាអ្នកនាំពាក្យរបស់កងយោធាថៃ និងក្រសួងការបរទេសថៃមិនអាចសុំការបំភ្លឺបានទេ កាលពីថ្ងៃម្សិលមិញ៕TK
ពីគេហទំព័រ៖ ភ្នំពេញប៉ុស្តិ៏
No comments:
Post a Comment
yes