ទណ្ឌិតទូទាំងប្រទេសកម្ពុជាចំនួន ៤៣២នាក់ ត្រូវបាននាយកដ្ឋានពន្ធនាគារធ្វើការស្នើរសុំក្រសួងយុត្តិធម៌ ដើម្បីលើកសំណើរទូលថ្វាយព្រះករុណាប្រទាននូវការលើកលែងទោស និងបន្ធូរបន្ថយទោសដល់ទណ្ឌិតនាឱកាសព្រះរាជពិធីបុណ្យ អុំទូក បណ្តែតប្រទីប សំពះព្រះខែ និងអកអំបុក នាពេលខាងមុខនេះ ។
លោក លីវ ម៉ូវ អគ្គនាយករង នៃអគ្គនាយកដ្ឋានពន្ធនាគារ បានប្រាប់អោយដឹងថា ការស្នើរសុំក្រសួងយុតិ្តធម៌ដើម្បីធ្វើការលើកលែងទោសនិងបន្ធូរបន្ថយទោស គឺមានចំនួនសរុប ៤៣២នាក់ ក្នុងនោះស្នើរសុំលើកលែងទោសមាន ចំនួន៦៨នាក់ និងបន្ធូរបន្ថយទោសមានចំនួន ៣៦៤នាក់ ។
លោកលីវម៉ូវបានញ្ជាក់ថា បច្ចុប្បន្នអ្នកទោសទូទាំងប្រទេសកម្ពុជាគិតត្រឹមថ្ងៃទី២៨ ខែតុលា ឆ្នាំ២០១១ មានចំនួនសរុប១ម៉ឺន៥៣១៧នាក់ ស្រី្តចំនួន ១២១៨ នាក់ ក្នុងនោះមានជនជាតិបរទេសចំនួន ៦៤៩នាក់ ស្រីចំនួន ១៤៨នាក់ ។ លោកបន្តថា អ្នកទោសជាអនិតិជនមានចំនួន ៣៩៩នាក់ ស្រី២៥នាក់ ស្រ្តីមានផ្ទៃពោះមានចំនួន ១៥នាក់ ។ លោក លីវ ម៉ូវ បានអោយដឹងទៀតថា ប្រភេទទោសរបស់ជនល្មើសមានចំនួនជាង ៥០ ប្រភេទដូចជា មនុស្សឃាត ប៉ុនប៉ងមនុស្សឃាត មនុស្សឃាតដោយចេតនា ប្លន់ប្រដាប់អាវុធ និងប្លន់សំលាប់ជាដើម ។
ទាក់ទងនិងករណីខាងលើនេះដែរ លោក ចាន់ សុវេត មន្ត្រីអង្គការសិទ្ធមនុស្សអាដហុកបានបញ្ជាក់ថា ស្ថានភាពអ្នកទោសនៅតាមបណ្តាពន្ធនាគារទាំង២៦នៅទូទាំងប្រទេសគឺមានសភាពចង្អៀតណែនដែលធ្វើឲ្យប៉ះពាល់សិទ្ធិរស់នៅក្នុងពន្ធនាគាររបស់អ្នកទោស និងប៉ះពាល់ដល់ការហូបចុកមិនគ្រប់គ្រាន់ និងគ្មានអនាម័យអាហារគ្មានរស់ជាតិ និងរបបសម្រាប់ផ្តល់ឲ្យអ្នកទោសពុំបានទាន់ពេលវេលា ។
គួរបញ្ជាក់ថា ការស្នើរសុំលើកលែងទោស និងបន្ធូរបន្ថយទោសនេះ មានចំនួន ៣លើក ក្នុងមួយឆ្នាំមានដូចជា បុណ្យចូលឆ្នាំប្រពៃណីខ្មែរ បុណ្យពិសាខបូជា និងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ៕
ពីគេហទំព័រ៖ កម្ពុជាថ្មី
No comments:
Post a Comment
yes