ឧក្រិដ្ឋជនបានចាប់កុមារាម្នាក់ឈ្មោះកែវ មុនីរាជ អាយុ៤ឆ្នាំ ក្នុងសម្លៀកបំពាក់ជាសិស្សមត្តេយ្យនាំចេញពីសាលាមត្តេយ្យបោះពោធិ មកកាន់រាជធានីភ្នំពេញ ។ ប្រការនេះត្រូវបានមជ្ឈដ្ឋានជាច្រើនបានថ្កោលទោសថា សិស្សរៀននៅក្នុងមេត្តយ្យពេលនោះសាលាជាអ្នកទទួលខុសត្រូវ ខណៈអាណាព្យាបាលមិនទាន់ទៅទទួលយកកូន ហេតុអ្វីបានជាបណ្តែតបណ្តោយឱ្យមនុស្សមិនស្គាល់ទៅចាប់យកក្មេងពីសាលាទៅវិញ ។ បន្ទាប់ពីចាប់ក្មេងបានហើយឧក្រិដ្ឋជនបាននាំមកកាន់រាជធានីភ្នំពេញ ហើយគេដឹងច្បាស់ថា ជនល្មើសអាចយកក្មេងរងគ្រោះលាក់ទុកនៅម្តុំគីឡូម៉ែត្រលេខ៦ សង្កាត់ឫស្សីកែវ ខណ្ឌឫស្សីកែវ។
បានជាប្រភពព័ត៌មានអះអាងយា៉ងដូច្នេះ ពីព្រោះពេលរសៀលថ្ងៃទី២៦ តុលា ក្រុមឧក្រិដ្ឋជនបានទូរស័ព្ទទាក់ទងទៅអ្នកស្រី ជុំ វឌ្ឍនា ហៅមុំ ដែលជាម្តាយកុមារចំណាប់ខ្មាំងឱ្យដាក់ប្រាក់៥.០០០ដុល្លារ ដើម្បីជាថ្នូលោះយកកូនទៅផ្ទះវិញ ។ ដោយមានការឆ្លើយឆ្លងតាមរយៈទូរស័ព្ទនោះ ហើយបានធ្វើឱ្យសមត្ថកិច្ចនគរបាលខេត្តបាត់ដំបង ដឹកនាំដោយលោកស្នងការរងម្នាក់សហការជាមួយអ្នកស្រីជុំ វឌ្ឍនា ហៅមុំ ជិះរថយន្តដេញតាមពីក្រោយជនល្មើសរហូតបាត់ជនល្មើសនៅចំណុចគីឡូម៉ែត្រលេខ៦នោះ ។ ទាំងសមត្ថកិច្ចទាំងអាណាព្យាបាលជនរងគ្រោះបានស្នាក់នៅរាជធានីភ្នំពេញ ១យប់ដោយរង់ចាំដំណឹងយា៉ងអន្ទះសានៅពេលកូនជាទីស្រឡាញ់ស្ថិតនៅក្នុងដៃឧក្រិដ្ឋជន។
ប្រភពព័ត៌មានបានឱ្យដឹងទៀតថា នៅវេលាម៉ោងប្រមាណទៀបភ្លឺឈានចូលថ្ងៃទី ២៧ តុលា ឧក្រិដ្ឋជនបានបង្ខំទារប្រាក់ពីម្តាយចំណាប់ខ្មាំង៥.០០០ដុល្លារដដែល ប៉ុន្តែដោយសារមានការទទូចអង្វរករខ្លាំងពេកពីសំណាក់ឪពុកម្តាយជនរងគ្រោះបានត្រូវថ្លៃគ្នានៅត្រឹម២.០០០ដុល្លារ ។ បន្ទាប់ពីត្រូវថ្លៃគ្នាហើយជនល្មើសបានណាត់ឱ្យម្តាយជនរងគ្រោះយកប្រាក់ទៅប្រគល់ឱ្យគេនៅក្បែរផ្សារអូឡាំពិក លុះពេលម្តាយជនរងគ្រោះទៅតាមការកំណាត់ជនល្មើសបានប្តូរទីតាំងវិញ ព្រោះគេខ្លាចបែកការណ៍ដល់សមត្ថកិច្ច តាមពីក្រោយហើយចាប់ខ្លួនពួកគេ ។
ការផ្លាស់ប្តូរទីកន្លែងប្រគល់ប្រាក់ពីក្បែរផ្សារអូឡាំពិកទៅផ្សារទំនើបសូរិយា ពេលទៅដល់លើផ្សារស្ត្រីជាម្តាយរបស់ក្មេងរងគ្រោះបានដួលសន្លប់ ខណៈមានបុរសដែលទំនងជាឧក្រិដ្ឋជនទៅលូកយកប្រាក់ពីហោប៉ៅរបស់គាត់ ។ នៅពេលអ្នកស្រីដួលសន្លប់ត្រូវបានគេដឹកទៅសង្គ្រោះនៅមន្ទីរពេទ្យ ពេលនោះអ្នកស្រីនិយាយស្តីអ្វីដែលចេញទាំងអស់ ព្រមទាំងវង្វេងរង្វាន់បាត់បង់ស្មារតី ដែលពុំមានពាក្យពេចន៍អ្វីធ្វើឱ្យសមត្ថកិច្ចដាក់ការសង្ស័យ និងសើុបអង្កេតលើករណីនោះបានឡើយ ។ នៅមន្ទីរពេទ្យអ្នកស្រីនិយាយបានតែ២ទៅ៣មា៉ត់ថា ១, ២, ៣ ចន្ទ្រាដែលពាក្យ២ទៅ៣មា៉ត់នោះសមត្ថកិច្ចបានកំណត់ថា ជាសំដីអ្នកស្រីចង់និយាយថា កូនស្រីគាត់កំពុងស្ថិតនៅក្នុងផ្ទះសំណាក់ចន្ទ្រាបន្ទប់លេខ១២៣ ប៉ុន្តែមិនបានបញ្ជាក់នៅរាជធានីភ្នំពេញ ឬខេត្តបាត់ដំបងនោះទេ ។ ទីបំផុតកុមារារូបនោះត្រូវបានរកឃើញដោយសុវត្ថិភាព ឯចោរក៏បានយកលុយទៅបាត់ដោយសុវត្ថិភាពដែរ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព៕
ពីគេហទំព័រ៖ កោះសន្តិភាព
No comments:
Post a Comment
yes