កាលពីព្រឹកថ្ងៃទី២៧ តុលា ២០១១ ប្រជាពលរដ្ឋរស់នៅបឹងកក់បាននាំគ្នាមកកាន់ទីស្នាក់នគរបាលប៉ុស្តិ៍រដ្ឋបាលស្រះចក ដើម្បីសុំកិច្ចអន្តរាគមន៍ពីមន្ត្រីនគរបាលឱ្យមន្ត្រីសាលាសង្កាត់ស្រះចកផ្តល់ម៉ាស៊ីនថត និងទូរស័ព្ទដៃ ដែលបានដកហូតពីប្រជាពលរដ្ឋមកវិញ។
តាមប្រភពព័ត៌មានបានឱ្យដឹងថា នៅព្រឹកថ្ងៃទី២៧ តុលា អ្នករស់នៅបឹងកក់បាននាំគ្នាទៅសាលាសង្កាត់ស្រះចក ដើម្បីមើលប្លង់កំណត់បែងចែកដីកម្មសិទ្ធ ដែលយោងតាមអនុក្រឹត្យសម្តេចអគ្គមហាសេនាបតីតេជោហ៊ុន សែន ខណៈនោះស្ត្រីឈ្មោះគង់ ចន្ថា បានយកម៉ាស៊ីនថតមកថតរូបភាពប្លង់ដែលដាក់តាំងនៅមុខសាលាសង្កាត់ ស្រាប់តែមានមន្ត្រីសាលាសង្កាត់ម្នាក់បញ្ជាដល់ប្រជាការពារឱ្យដកយកម៉ាស៊ីនថត ដោយមិនបានបញ្ជាក់ពីមូលហេតុ។ ទើបធ្វើឱ្យមានការតវ៉ាពីប្រជាពលរដ្ឋដែលឃើញហេតុការណ៍ ហើយមានបុរសម្នាក់ឈ្មោះចាន់ ពុទ្ធិស័ក្តបានយកទូរស័ព្ទដៃមកថតសកម្មភាពប្រតាយប្រតប់គ្នារវាងស្ត្រីឈ្មោះគង់ ចន្ថា នឹងមន្ត្រីសង្កាត់ទើបត្រូវគេចាប់ដកហូតទូរស័ព្ទដៃនោះទុក។
ដោយសារកើតទុក្ខមិនសុខចិត្តទើបស្ត្រីឈ្មោះគង់ ចន្ថា និងបុរសឈ្មោះចាន់ ពុទ្ធិស័ក្តបាននាំគ្នាមកសុំកិច្ចអន្តរាគមន៍ពីនគរបាលប៉ុស្តិ៍រដ្ឋបាលស្រះចកឱ្យជួយយកម៉ាស៊ីនថត និងទូរស័ព្ទដៃពីមន្ត្រីសង្កាត់នោះមកវិញ។
មន្ត្រីសាលាសង្កាត់ស្រះចកបានចោទទៅលើប្រជាពលរដ្ឋបឹងកក់ ដែលមកមើលប្លង់នោះថា បានបង្កភាពអនាធិបតេយ្យទើបគេដកហូតម៉ាស៊ីនថត និងទូរស័ព្ទដៃ។ ក្រោយពីតវ៉ាខ្លាំងក្លាអាជ្ញាធរបានប្រគល់ឱ្យម្ចាស់ដើមវិញ ប៉ុន្តែពួកគេមិនព្រមទទួលយកវិញទេ និងថែមទាំងចោទប្រកាន់ទៅលើលោកហ៊ុន សុធី អធិការនគរបាលខណ្ឌដូនពេញ ប្រើអំពើហិង្សាដាក់ប្រជាពលរដ្ឋបឹងកក់ទៀតផង៕
No comments:
Post a Comment
yes